Ezekele 40:1-49
40 Kukuputuka chamwaka wakusokesa 25 muundungo+ wetu, halikumbi lyakusokesa 10, omu mwahichile myaka 14 kufuma halwola yanongele nganda,+ ngolo jaYehova jejile hali ami, kaha angutwalile kunganda.+
2 Kalunga angutwalile mulifuchi lyaIsalele muchakungumwenesa chenyi, kaha anguhakile hapili+ yayisulu chikuma haze hapwile chuma chimwe chasolokele nge nganda kusulo.
3 Omu angutwalile kuze, ngwamwene lunga umwe uze apwile nakusoloka nge unengu.+ Akwachile mukole walinyu nalihongo* lyakupimisa mulivoko lyenyi.+ Lunga kana emanyine muchikolo.
4 Uze lunga ambile kuli ami ngwenyi: “Ove mwanamutu, tala kanawa nakutengeleka matwitwi ove wivwilile kuvyuma vyosena nangukulweza, mwomwo evi vikiko vanakunehela kuno. Ulweza vaze vakuzuvo yaIsalele vyuma vyosena naumona.”+
5 Jino ngwamwene kembwe yinajingilika tembele.* Kaha mulivoko lyayauze lunga mwapwile lihongo lyakupimisa lyakusuhwa jikuvite 6 (kukuvite hikuvite vahakilileko chikapa chalivoko).* Ngocho aputukile kupima yize kembwe. Pimo yayo yapwile lihongo limwe, kaha muusuku wayo nawa yapwile lihongo limwe.
6 Kufumaho, ejile kuchikolo chakumututuko+ nakukanduka hajindondelo jacho. Jino apimine mukwilichi wamuchikolo, kaha wapwile lihongo limwe muwihi. Apimine nawa mukwilichi ukwavo, kaha wapwile lihongo limwe muwihi.
7 Kazuvo hikazuvo kamuka-kulama kapwile lihongo limwe muusuku, kaha muwihi nawa kapwile lihongo limwe. Kufuma hakazuvo kamwe nakuya hakazuvo+ kakwavo hapwile jikuvite jitanu. Kusuhwa chamukwilichi wamuchikolo chakukapete kauhichilo chapwile lihongo limwe.
8 Apimine nawa kapete kauhichilo, chakutala mukachi, kaha kapwile lihongo limwe.
9 Apimine cheka kapete kauhichilo kakuchikolo, kaha kapwile jikuvite 8. Apimine jipanda jayo, kaha japwile jikuvite jivali. Kapete kauhichilo kakuchikolo kapwililile kumutamba wakutala mukachi.
10 Kujisali josena jivali jachikolo chakumututuko kwapwile tuzuvo twavaka-kulama tutatu. Tuzuvo kana twesekele hamwe, kaha jipanda japwile kujihachi jesekele nawa hamwe.
11 Kufumaho apimine chikolo mukutohwa, kaha chapwile jikuvite 10. Muusuku chapwile jikuvite 13.
12 Chihela chize chapwile kulutwe lwatuze tuzuvo twavaka-kulama kujisali josena jivali chapwile kuvite yimwe. Kaha kazuvo hikazuvo kujisali josena jivali kapwile jikuvite 6.
13 Jino apimine chikolo kufumisa hamulungu wakazuvo kamwe kamuka-kulama* nakuheta hamulungu wakazuvo kakwavo, kaha chapwile jikuvite 25. Chikolo chakazuvo kamwe chalitalasanyine nachikolo chakazuvo kakwavo.+
14 Apimine cheka jipanda, kaha japwile jikuvite 60 muusuku. Apimine nawa jipanda jamuvikolo vyosena vyapwile kuchipango.
15 Kufuma kulutwe lwachikolo chakuwingililo nakuheta kulutwe lwakapete kauhichilo kakuchikolo chamukachi hapwile jikuvite 50.
16 Kaha tuze tuzuvo twavaka-kulama twapwile najinjanena jakutohwela mukachi+ najipanda kujihachi josena jivali jamukachi kachikolo. Mukachi katupete vauhichilo mwapwile nawa jinjanena kujisali josena, kaha hajipanda vasoneneho vifwanyisa vyamikoma.+
17 Jino angwingishile muchipango chakusali, kaha ngwamwene tupete vakulila+ nachihela chakwala malolwa chize chajingulukile chipango. Haze hachihela vatungileho tupete vakulila 30.
18 Chihela chakwala malolwa chize chapwile kujihachi javikolo chatesekele hamwe nachikolo muusuku. Chihela kana chapwile chamwishi.
19 Jino apimine kufuma kulutwe lwachikolo chamwishi nakuheta kuwingililo wachipango chamukachi, kaha hapwile jikuvite 100 kumutamba wakumututuko nawou wakunote.
20 Chipango chakusali chapwile nawingililo watalile kunote, kaha wingililo kana aupimine muusuku namukutohwa.
21 Kwapwile tuzuvo twavaka-kulama tutatu kujisali josena jivali. Jipanda jacho jakujihachi nakapete kauhichilo vyatesekele hamwe nachikolo chakulivanga. Chikolo kana chapwile jikuvite 50 muusuku, kaha mukutohwa jikuvite 25.
22 Jinjanena jacho, nakapete kacho kauhichilo, navifwanyisa vyacho vyamikoma+ vyatesekele hamwe navize vyapwile kuchikolo chakumututuko. Vatu vanyinyinenga jindondelo 7 numba vahete hachikolo kana, kaha kapete kacho kauhichilo kapwile kulutwe lwavo.
23 Chipango chamukachi chapwile navikolo. Chikolo chimwe chalitalasanyine nachikolo chakunote, kaha chikwavo chalitalasanyine nachikolo chakumututuko. Apimine kufuma hachikolo chimwe nakuya hachikolo chikwavo, kaha hapwile jikuvite 100.
24 Kufumaho angutwalile kumutamba wakusulo, kaha ngwamwene chikolo chakumutamba kana.+ Apimine jipanda jacho nakapete kacho kauhichilo, kaha vyatesekele hamwe navize vikwavo.
25 Chapwile najinjanena kujisali josena jivali, ngana mwajize jinjanena jikwavo. Chapwile nawa nakapete kauhichilo. Chapwile jikuvite 50 muusuku, kaha mukutohwa jikuvite 25.
26 Chikolo kana chapwile najindondelo 7,+ kaha kapete kacho kauhichilo kapwile kulutwe lwavo. Jipanda jakujisali jacho josena jivali japwile navifwanyisa vyamikoma.
27 Chipango chamukachi chapwile nachikolo chatalile kusulo. Apimine kufuma hachikolo kana nakuya hachikolo chikwavo, kaha hapwile jikuvite 100.
28 Kufumaho anguhichishile muchikolo chakusulo nakungwingisa muchipango chamukachi. Kahomu apimine chize chikolo chakusulo, chatesekele hamwe navize vikolo vikwavo.
29 Tuzuvo twacho twavaka-kulama, najipanda jacho jakujihachi, nakapete kacho kauhichilo vyatesekele hamwe navize vikwavo. Chapwile najinjanena kujisali josena jivali, namukapete kacho kauhichilo. Chapwile jikuvite 50 muusuku, kaha mukutohwa jikuvite 25.+
30 Vikolo vyakwingilila muchipango chamukachi vyosena vyapwile natupete vauhichilo, kaha tupete kana vapwile jikuvite 25 muusuku, muwihi jikuvite jitanu.
31 Kapete kauhichilo kakuchikolo kana katalile hachipango chakusali, kaha hajipanda jacho jakujihachi hapwile vifwanyisa vyamikoma.+ Chikolo kana chapwile najindondelo 8.+
32 Omu anguhichishile kumututuko nakungwingisa muchipango chamukachi, apimine chikolo, kaha chatesekele hamwe navikolo vikwavo.
33 Tuzuvo twacho twavaka-kulama, najipanda jacho jakujihachi, nakapete kacho kauhichilo vyatesekele hamwe navize vikwavo. Chapwile najinjanena kujisali josena jivali, namukapete kacho kauhichilo. Chapwile jikuvite 50 muusuku, kaha mukutohwa jikuvite 25.
34 Kapete kacho kauhichilo katalile hachipango chakusali, kaha hajipanda jacho jakujihachi hapwile vifwanyisa vyamikoma. Chikolo kana chapwile najindondelo 8.
35 Angutwalile nawa kuchikolo chakunote,+ kahomu achipimine chatesekele hamwe navize vikolo vikwavo.
36 Tuzuvo twacho twavaka-kulama, najipanda jacho jakujihachi, nakapete kacho kauhichilo vyatesekele hamwe navize vikwavo. Chapwile najinjanena kujisali josena jivali. Chapwile jikuvite 50 muusuku, kaha mukutohwa jikuvite 25.
37 Jipanda jacho jakujihachi jatalile hachipango chakusali, kaha hajipanda kana hapwile vifwanyisa vyamikoma. Chikolo kana chapwile najindondelo 8.
38 Kapete kakulila nachikolo chako kapwililile kwakamwihi najipanda jakujihachi javikolo kuze vakoselelenga mawana akulumba.+
39 Kujisali josena jivali jakapete kauhichilo kakuchikolo kwapwile jimesa jivali haze vajihililenga vimuna vamawana akulumba,+ namawana ahashili,+ namawana ahamulonga.+
40 Kujila yakuya kuchikolo chakunote kwapwile jimesa jivali kuweluka. Kaha kusali yikwavo yakapete kauhichilo kakuchikolo kwapwile nawa jimesa jivali.
41 Kusali hisali yachikolo kwapwile jimesa jiwana. Ngocho jimesa josena haze vajihililenga vimuna vakuvatula japwile 8.
42 Jimesa jiwana jakujihilaho vimuna vawana wakulumba japwile jamalolwa akusonga. Muusuku japwile kuvite yimwe nachimbwa, muwihi japwile kuvite yimwe nachimbwa, kaha mukuzandama japwile kuvite yimwe. Hajimesa kana hakiko vahakilenga vinoma vyakujihisa vimuna vawana wakulumba navimuna vakuvatula.
43 Hajimbango jamukachi vatungilileho visweko vyakuteseka muchikapa chalivoko muwihi, kaha nyama yamawana vayihakilenga hajimesa.
44 Kuweluka wachikolo chamukachi kwapwile tupete vakulila vavaka-kwimba.+ Tupete kana vapwile muchipango chamukachi kwakamwihi nachikolo chakunote chize chatalile kusulo. Kapete kakwavo kakulila kapwililile kwakamwihi nachikolo chakumututuko chize chatalile kunote.
45 Kaha uze lunga ambile kuli ami ngwenyi: “Aka kapete kakulila kanatale kusulo kanapu kavapilishitu vaze vali nakuzata milimo mutembele.+
46 Kapete kakulila kaze kanatale kunote kanapu kavapilishitu vaze vali nakuzata milimo yakulijiko lyakulumbila.+ Ava vakiko vakutanga yaZatoke+ vaze vafuma kuli vaLevi vaze veji kupandamanga kuli Yehova nakumuzachila.”+
47 Jino apimine chipango chamukachi, kaha chapwile jikuvite 100 muusuku, muwihi jikuvite 100 kujihachi josena jiwana. Lijiko lyakulumbila lyapwililile kulutwe lwatembele.
48 Kufumaho angutwalile mukapete kauhichilo kakutembele.+ Apimine jipanda jakujihachi jakapete kauhichilo, kaha japwile jikuvite jitanu kusali yimwe, kusali yikwavo nawa jikuvite jitanu. Chikolo chapwile jikuvite jitatu mukutohwa kusali yimwe, kusali yikwavo nawa jikuvite jitatu.
49 Kapete kauhichilo kapwile jikuvite 20 muusuku, kaha muwihi kapwile jikuvite 11.* Vatu vanyinyinenga jindondelo numba vahete hachikolo. Kuvipamba vyakujihachi josena jivali kwapwile jipanda.+
Kwinyikila Chamwishi
^ Tala Chihande B14.
^ Hepe., “zuvo.” Mukapetulu 40 nakuheta ku 48 vanazachisa tembele kulumbununa chihela chosena chatembele chipwe tembele yivene.
^ Hepe., “lihongo lyakupimisa lyajikuvite 6, nakuvite yimwe nachikapa chalivoko.” Kupima kana chinatalisa kujikuvite jajisuku. Tala Chihande B14.
^ Pamo helu lyambango yakazuvo kamuka-kulama.
^ Chipwe pamo, “12.”
