Ezekele 41:1-26
41 Jino angwingishile muchihela chajila,* kaha apimine jipanda jakujihachi jachikolo. Panda yakuluhachi lumwe yapwile jikuvite* 6 mukutohwa, kaha panda yakuluhachi lukwavo nawa yapwile jikuvite 6 mukutohwa.
2 Chikolo chapwile jikuvite 10 mukutohwa. Mbango yakuluhachi* lumwe lwachikolo yapwile jikuvite jitanu, kaha mbango yakuluhachi lukwavo nawa yapwile jikuvite jitanu. Apimine muze muchihela chajila, kaha mwapwile jikuvite 40 muusuku, muwihi jikuvite 20.
3 Jino engilile mukachi,* kaha apimine panda yakuluhachi lwachikolo. Pimo yapanda kana yapwile jikuvite jivali, kaha chikolo chapwile jikuvite 6 mukutohwa. Jimbango jakujihachi jachikolo kana japwile jikuvite 7.*
4 Kufumaho apimine kapete kaze kalitalasanyine namuchihela chajila, kaha kapwile jikuvite 20 muusuku, muwihi nawa jikuvite 20.+ Jino ambile kuli ami ngwenyi: “Muno mukiko Mwajila Chikuma.”+
5 Apimine mbango yatembele, kaha pimo yayo yapwile jikuvite 6. Tupete vakujihachi jatembele vapwile jikuvite jiwana jiwana muwihi.+
6 Tupete kana vapwile mujizuvo jitatu jakutuchika yimwe helu lyayikwavo. Kaha zuvo hizuvo yapwile natupete 30. Kujimbango jatembele vajingulwishileko vyalo vize vyakundwijile tupete vakujihachi, oloze vyalo kana kavyakwachile kujimbango jatembeleko.+
7 Kujisali jivali jatembele kwapwile uhichilo wajindondelo wakulijinga uze wayile nakutohwa omu wakandukile kutupete vahelu.+ Omu mutu mwakanduka kufuma hazuvo yakulivanga nakuya hazuvo yahelu, nauhichilo nawa wayile nakutohwa.
8 Ngwamwene nawa tembele vanayitungila hachihela chakulunduka, kaha vihela vize vatungilileho tupete vakujihachi jatembele vyapwile lihongo limwe lyajikuvite 6 kufuma hamavu nakuheta kuunungililo.
9 Pimo yambango yakuweluka yatupete vakujihachi yapwile jikuvite jitanu. Kukulo yavaze tupete kwapwile lihanya* lize lyapwile kutembele.
10 Mukachi katembele natupete vakulila+ mwapwile chihela chajikuvite 20 muwihi kujisali josena.
11 Kwapwile nawa wingililo mukachi katupete vakujihachi nalihanya kumutamba wakunote. Kaha kwapwile wingililo weka kumutamba wakusulo. Lihanya kana lyapwile jikuvite jitanu muwihi kujisali josena.
12 Zuvo yize yapwile kumulauko yize yalitalasanyine nalihanya yapwile jikuvite 70 muwihi, najikuvite 90 muusuku. Pimo yambango yayeyi zuvo yapwile jikuvite jitanu jingulwishi.
13 Apimine nawa tembele, kaha yapwile jikuvite 100 muusuku. Kufuma halihanya nakuheta hazuvo yakumulauko hohamwe nambango yayo hapwile nawa jikuvite 100.
14 Kaha muwihi watembele kulutwe, chakutala kumututuko, kuhakilako nalihanya mwapwile jikuvite 100.
15 Apimine kusuhwa chazuvo yize yalihachile nalihanya kunyima yatembele, namahichilo ayo kujisali josena, kaha yapwile jikuvite 100.
Apimine nawa muze muchihela chajila, namuchihela chajila chikuma,+ natupete vauhichilo vakuchipango,
16 namikwilichi, najinjanena jakutohwela mukachi,+ namahichilo aze apwile kumitamba yitatu. Kwakamwihi nayize mikwilichi kwapwile maliva+ kufuma hamavu swi nakujinjanena. Kaha jize jinjanena japwile jakufwika.
17 Apimine helu lyachikolo, namukachi katembele nakuweluka, najimbango josena jingulwishi.
18 Vayisonene vifwanyisa vyavakeluve+ namikoma.+ Vasowasanyine omu vakeluve vavali omu mukoma umwe, omu vakeluve vavali omu mukoma umwe. Kaha keluve hikeluve apwile navihanga vivali.
19 Chihanga chakufwana nge mutu chatalile kumukoma kusali yimwe, kaha chihanga chakufwana nge ndumba* chatalile kumukoma kusali yikwavo.+ Omu mukiko vavasonene mutembele mwosena jingulwishi.
20 Vasonene vifwanyisa vyavakeluve namikoma hambango yachihela chajila kuputukila hamavu nakuheta helu lyachikolo.
21 Vipamba* vyachikolo chachihela chajila* vyatesekele hamwe kujisali josena.+ Kaha kulutwe lwachihela chajila kwapwile
22 lijiko lyakulumbila+ lyamutondo. Mukujindama lyapwile jikuvite jitatu, kaha muusuku lyapwile jikuvite jivali. Lyapwile najimbango, kaha litanda lyalyo,* najihachi jalyo vyapwile vyamitondo. Jino ambile kuli ami ngwenyi: “Eyi yikiko mesa yili kumeso aYehova.”+
23 Kwapwile vikolo vivali vyakwingilila muchihela chajila, navikolo vivali nawa vyakwingilila muchihela chajila chikuma.+
24 Chikolo hichikolo chapwile namapito avali aze alikonekelenga hakuwasokolola.
25 Hamapito akuchihela chajila vasoneneho vifwanyisa vyavakeluve namikoma nge vize vyapwile hajimbango.+ Kaha kwilu lyakapete kauhichilo vatungilileko senge yamaliva.
26 Kwapwile nawa jinjanena jakutohwela mukachi+ navifwanyisa vyamikoma kujisali josena jakapete kauhichilo, nahajimbango jatupete vakujihachi jatembele nahajisenge.
Kwinyikila Chamwishi
^ Hepe., “mutembele.” Mukapetulu 41 na 42, vali nakutalisa kuchihela chajila (muze Mwajila) chipwe kuchihela chajila chosena (tembele hohamwe namuze Mwajila namuze Mwajila Chikuma).
^ Vali nakuvuluka jikuvite jajisuku. Tala Chihande B14.
^ Hepe., “yakujihachi.”
^ Kulumbununa, muchihela chajila chikuma chipwe muze Mwajila Chikuma.
^ Hepe., “Chikolo chapwile jikuvite 7 muwihi.”
^ Pamo uhichilo waundende uze wajingulukile kutembele.
^ Chipwe “nge mwevu wandumba.”
^ Hepe., “Chipamba.” Pamo kutalisa kuwingililo wamuze Mwajila.
^ Pamo muze Mwajila Chikuma.
^ Hepe., “kaha kusuhwa chalyo.”
