Ezekele 42:1-20
42 Jino uze lunga angutwalile muchipango chakusali kumutamba wakunote.+ Angutwalile kuzuvo yatupete vakulila+ yakunote yize yalihachile nalihanya nazuvo yeka.+
2 Zuvo yatupete vakulila yapwile jikuvite* 100 muusuku kumutamba wachikolo chakunote, kaha muwihi yapwile jikuvite 50.
3 Yapwililile mukachi, oku chipango chamukachi chize chapwile jikuvite 20 muwihi,+ oku chihela chakwala malolwa chamuchipango chakusali. Zuvo kana yapwile yajizuvo jitatu jakutuchika, kaha yapwile nawa namahichilo akulitalasana.
4 Kwapwile uhichilo shimbu kanda uhete kutupete vakulila. Uhichilo+ kana watohwele jikuvite 10, kaha wasuhwile jikuvite 100.* Vikolo vyatupete twakulila vyapwililile kunote.
5 Tupete vakulila vazuvo yahelu vapwile vavandende kuhambakana vaze vazuvo yahakachi, nayeyi yahamavu mwomwo mahichilo alile chihela chachinene.
6 Zuvo kana yapwile yajizuvo jitatu jakutuchika, oloze kayapwile najipanda ngana mwajipanda jachipangoko. Shikaho tupete vazuvo yahelu vapwililile vavandende kuhambakana vaze vazuvo yahamavu nayize yahakachi.
7 Chipato chamalolwa chakuweluka chize chalihachile natupete vakulila chakutala kuchipango chakusali chize chalitalasanyine natupete veka vakulila chapwile jikuvite 50 muusuku.
8 Tupete vakulila vaze vapwile chakutala kuchipango chakusali vapwile jikuvite 50 muusuku, oloze vaze vatalile kuchihela chajila vapwile jikuvite 100.
9 Tupete vakulila vapwile nawingililo kumutamba wakumututuko kufuma kuchipango chakusali.
10 Kwapwile nawa tupete vakulila mukachi* kachipato chamalolwa chachipango kumutamba wakumututuko. Tupete kana vapwililile kwakamwihi nalihanya nazuvo yeka.+
11 Kwapwile uhichilo shimbu kanda uhete kutupete vakulila ngana uze wapwile kutupete vakulila vakunote.+ Tupete kana vatesekele hamwe navaze vakunote muusuku namuwihi. Ulovokelo wavo nawa walifwanyine, kaha vavatungile ngana vaze vakunote. Vikolo vyakutupete kana
12 vyapwile nge vize vyakutupete vakulila vakumutamba wakusulo. Kumaputukilo auhichilo kwakamwihi nachipato chamalolwa kumutamba wakumututuko kwapwile chikolo chakwingilila.+
13 Jino uze lunga ambile kuli ami ngwenyi: “Tupete vakulila vakunote natupete vakulila vakusulo vaze vali kwakamwihi nalihanya+ vanapu tupete vajila vakulila mwomwo mukiko vapilishitu vaze veji kupandamanga kuli Yehova veji kulilanga mawana ajila.+ Mukiko nawa veji kuhakanga wana wamanona, nawana wahashili, nawana wahamulonga, uze unapu wana wajila chikuma, mwomwo chihela kana chajila.+
14 Omu vapilishitu navengilanga muchihela chajila, kanda valovokangamo nakuya kuchipango chakusali chakuzeneka kuzula uvwalo wavo wakuzachisako+ mwomwo uvwalo kana unapu wajila. Vavwalenga uvwalo weka numba jino vayenga kuvihela kuze kuli vatu veka.”
15 Omu akumishile kupima chihela chamukachi katembele,* angulowelele kuchikolo chakumutamba wakumututuko.+ Kaha apimine chihela chosena.
16 Apimine kumutamba wakumututuko nalihongo.* Apimine mahongo 500 muusuku kufuma hambango yimwe nakuheta hambango yikwavo.
17 Apimine mutamba wakunote, kaha wapwile mahongo 500 muusuku.
18 Apimine mutamba wakusulo, kaha wapwile mahongo 500 muusuku.
19 Kufumaho ajingulukile kumutamba wakumulauko nakupima nalihongo. Kaha mutamba kana wapwile mahongo 500 muusuku.
20 Apimine chihela chatembele kumitamba yosena yiwana. Chipato chize chajingilikile chihela kana+ chapwile mahongo 500 muusuku, kaha muwihi nawa mahongo 500.+ Chipato kana chahandunwine chihela chajila nachize chavatu vosena.+
Kwinyikila Chamwishi
^ Vali nakuvuluka jikuvite jajisuku. Tala Chihande B14.
^ Septuagint yachiHelase ngwayo, “jikuvite 100 muusuku.” Kaha visoneka vyachiHepeleu ngwavyo: “Jila yakuvite yimwe.” Tala Chihande B14.
^ Hepe., “muwihi.”
^ Hepe., “zuvo yamukachi.”
^ Tala Chihande B14.
