Ezekele 43:1-27
43 Jino angutwalile kuchikolo chize chatalile kumututuko.+
2 Kaha ngwamwene upahu waKalunga kaIsalele naufuminyina kumututuko.+ Lizu lyenyi lyapwile nge chivumo chameya amavulu.+ Hamavu hamunyikile naupahu wenyi.+
3 Vyuma ngwamwene vyalifwanyine navize ngwamwene* muchakungumwenesa omu ngwayile nakupolofweta vyakunongesa nganda.* Vyasolokele nge vize ngwamwene kwakamwihi nakalwiji Kevale,+ kaha ngwafukamine chameso hamavu.
4 Jino upahu waYehova wengilile mutembele* kuchikolo chize chatalile kumututuko.+
5 Shipilitu yanguzundwile nakungutwala muchipango chamukachi, kaha ngwamwene tembele yinazale naupahu waYehova.+
6 Jino ngwevwile mutu umwe mwahanjika kuli ami mutembele, kaha ejile nakwimana kwakamwihi nayami.+
7 Ambile kuli ami ngwenyi:
“Ove mwanamutu, chino hichihela chalitanda+ lyami, chihela chakulyata mahinji ami,+ chize nangutwamanga haya myaka yosena muli vaIsalele.+ Vaze vakuzuvo yaIsalele navamyangana javo kaveshi kukapihisa cheka lijina lyami lyajila+ haujila wavo wakushipilitu, nahakulemesa tuponya vaze vamwene kupwa vamyangana javoko.*
8 Vapihishile lijina lyami lyajila navyuma vyavo vyaunyengwe valingile, hakuhaka mukwilichi wavo kwakamwihi namukwilichi wami,+ nachipamba chachikolo chavo kwakamwihi nachipamba chachikolo chami, kaha hakachi hapwile kaha mbango. Ngocho ngwevwile matoto nakuvanongesa.+
9 Valitwamine jino ujila wavo wakushipilitu nakwecha kulemesa tuponya vaze vanamononga kupwa vamyangana javo.* Nge navalinga ngocho, kaha nangutwama muli vakiko haya myaka yosena.+
10 “Jino ove mwanamutu, lumbunwina vaze vakuzuvo yaIsalele+ vyatembele, mangana vevwenga sonyi havilinga vyavo vyakuhenga.+ Kaha valinangule jila navakatungilamo tembele.*
11 Kachi nge navevwa sonyi havyuma vyosenevi vanalinginga, kaha valumbunwine omu nayikapwa tembele, nasolokeso yayo, namalovokelo ayo, namengililo ayo.+ Valweze mwosena muze nayikapwa tembele, najindongi jayo najishimbi jayo. Yifunjike vayimone nameso avo mangana vatachikize omu nayikapwa, nakusoneka nawa jishimbi jayo josena mangana vajikavangize.+
12 Elu lukiko lushimbi lwatembele: chihela chahelu lyapili chosena chinapu chajila chikuma.+ Elu lukiko lushimbi lwatembele.
13 “Evi vikiko vipimo vyalijiko lyakulumbila mujikuvite,+ (kukuvite hikuvite vahakilileko chikapa chalivoko).* Pimo yalitanda lyayo yikapwe kuvite yimwe, kaha mukutohwa chalyo nawa kuvite yimwe. Kaha mungilingili wajinguluka kukanwa kalyo ukasuhwe chikapa vanatanduula minwe.* Omu mukiko nalikapwa litanda lyalijiko lyakulumbila.
14 Kufuma kwishi yalitanda hamavu nakuheta kumukusa waundende hakapwe jikuvite jivali. Kaha kufuma hamukusa waundende nakuheta kumukusa waunene hakapwe jikuvite jiwana, kutohwa chamukusa waunene chikapwe kuvite yimwe.
15 Chihanda chahelu chalijiko lyakulumbila chikakuname jikuvite jiwana. Kaha kwilu yalijiko kana kukapwe jimbinga jiwana.+
16 Chihanda kana chikapwe jikuvite 12 muusuku namuwihi kujisali josena jiwana.+
17 Jihachi jauze mukusa josena jiwana jikapwe jikuvite 14 muusuku namuwihi. Mungilingili uze wajingulukako ukapwe chimbwa chakuvite, kaha litanda lyalyo likapwe kuvite yimwe kujisali josena.
“Jindondelo jalyo jikatale kumututuko.”
18 Jino ambile kuli ami ngwenyi, “Ove mwanamutu, Mwata Wakulitulaho Yehova nambe ngwenyi: ‘Eji jikiko jindongi jakukavangiza omu navakalinga hivanatungu lyehi lijiko lyakulumbila, mangana vakalumbileho wana wakulumba nakusapwilaho manyinga.’+
19 “Mwata Wakulitulaho Yehova nambe ngwenyi, ‘Vapilishitu vavaLevi vakutanga yaZatoke+ vaze veji kupandamanga kuli ami nakunguzachila, ukavahana mwanangombe wakuji wakuutanga kupwa wana wahashili.+
20 Ukambata manyinga enyi amwe, ukawashila kujimbinga jiwana jalijiko lyakulumbila, nakujimbango jamukusa kwosena kuwana, nakumungilingili walyo jingulwishi, mangana ukatomese lijiko kushili nakulilingila chakufwika hashili.+
21 Jino ukahana uze ngombe wakuji wawana wahashili mangana vakamulumbe kuze vanatongola kutembele, kuweluka wachihela chajila.+
22 Halikumbi lyamuchivali ukahana chizamba chapembe walambwe kupwa wana wahashili. Kaha navakatomesa lijiko lyakulumbila kushili nge muze valitomesanga nauze ngombe wakuji.’
23 “‘Omu naukalinga hiunakumisa lyehi kutomesa lijiko lyakulumbila kushili, ukahana mwanangombe wakuji walambwe nachizamba chamukoko walambwe wakufuma kuutanga wavimuna.
24 Ukavapandamisa kumeso aYehova, kaha vapilishitu vakavakuve mungwa+ nakuvalumba kupwa wana wakulumba wakuhana kuli Yehova.
25 Ukahana pembe wachizamba wawana wahashili+ hakumbi hakumbi hamakumbi 7, namwanangombe wakuji, nachizamba chamukoko wakufuma kuutanga wavimuna. Ukahana vimuna vakuzeneka katenga.*
26 Lijiko lyakulumbila vakalilingilenga chakufwika hashili hamakumbi 7, kaha vakalitomese nakulikunjika.
27 Omu nawakakuma makumbi kana, vapilishitu navakalumbanga mawana enu* akulumba, namawana enu akusolola kuunda halijiko lyakulumbila halikumbi lyakusokesa + nakutwala kulutwe, kaha nangukamivwilanga kuwaha.’+ Omu mukiko mwanambe Mwata Wakulitulaho Yehova.”
Kwinyikila Chamwishi
^ Chipwe pamo, “amwene.”
^ Hepe., “omu ngwayile nakunongesa nganda.”
^ Hepe., “muzuvo.”
^ Hepe., “nahavivimbi vavamyangana javoko.”
^ Hepe., “kulemesa vivimbi vavamyangana javo.”
^ Hepe., “Kaha veseke omu nayikapwa.”
^ Vali nakuvuluka jikuvite jajisuku. Tala Chihande B14.
^ Kafwe jisendimita 22.2. Tala Chihande B14.
^ Chipwe “vakukupuka mwosena.”
^ Kulumbununa, mawana avatu.
