Ezekele 44:1-31
44 Angukindulwishile kuchikolo chakusali chakuchihela chajila kumutamba wakumututuko,+ kaha chikolo kana chapwile chakusoka.+
2 Jino Yehova ambile kuli ami ngwenyi: “Chikolo kana nachipwanga lika chakusoka. Kaveshi kukachisokololako, kaha naumwe wauchi mwakengililako mwomwo kunengilila+ Yehova Kalunga kaIsalele. Ngocho chipwenga lika chakusoka.
3 Oloze mwata wavaIsalele mwatwamangamo nakulyanga kulya kumeso aYehova+ mwomwo napu mwata. Mwengililanga nakulovokela mukapete kauhichilo kakuchikolo.”+
4 Kufumaho anguhichishile muchikolo chakunote nakunguneha kulutwe lwatembele. Omu ngwatalile, ngwamwene upahu waYehova unazale mutembele yaYehova.+ Ngocho ngwafukamine chameso hamavu.+
5 Yehova ambile kuli ami ngwenyi: “Ove mwanamutu, nyingilila,* nakutala, nakwivwilila kanawa vyuma vyosena nangukulweza vyakupandama kujindongi najishimbi jatembele yaYehova. Nyingilila kuwingililo watembele namalovokelo achihela chajila osena.+
6 Hanjika kuli vaze vakuzuvo yakulikanga yaIsalele ngwove, ‘Mwata Wakulitulaho Yehova nambe ngwenyi: “Enu vakuzuvo yaIsalele, vyuma vyaunyengwe munalingi vinavulu.
7 Omu muli nakuneha vaka-mafuchi eka vaze vapwa vakuzeneka kujihana kumichima nakumijimba muchihela chami chajila, vali nakujilulula tembele yami. Muli nakunguhana maji namanyinga vize vinapu kulya chami, okunyi muli nakuhokola chivwasano chami mwomwo yavilinga vyenu vyaunyengwe vyosena.
8 Kamwalamine vyuma vyami vyajilako.+ Oloze munalweze vatu veka mangana vazate milimo yakuchihela chami chajila.”’
9 “‘Mwata Wakulitulaho Yehova nambe ngwenyi: “Kakweshi muka-lifuchi lyeka uze ali nakutwama muIsalele uze napu wakuzeneka kujihana kumuchima nakumujimba mwengila muchihela chami chajilako.”’
10 “‘Oloze vaLevi vaze vahandukile kuli ami+ omu vaIsalele vahandukile kuli ami hakulemesa makombelo avo aunyengwe,* nanguvazangamisa hakuhenga chavo.
11 Chipwe ngocho navanguzachilanga lika muchihela chami chajila hakulama vikolo vyatembele+ nakuzata milimo yahatembele. Navajihanga vimuna vawana wakulumba navimuna vakuvatula vaze navahananga vatu, kaha navemananga kumeso avatu nakuvazachila.
12 Oloze hakuwana nge vazachililenga vatu kumakombelo avo aunyengwe nakulilingisa kupwa chimbunji chakuhukanyisa vaze vakuzuvo yaIsalele valinge shili,+ ngocho ngunalishingi nakuvolwela livoko lyami nakuvazangamisa hakuhenga chavo.’ Omu mukiko mwanambe Mwata Wakulitulaho Yehova.
13 ‘Kaveshi kupandama kuli ami nakuzata mwavapilishitu jami chipwe kupandama kuvyuma vyami vyajila navize vyajila chikumako. Navevwa sonyi mwomwo yavyuma vyaunyengwe valingile.
14 Oloze nanguvalingisa kupwa vaka-kulama tembele mangana vazatenga milimo yiliho navyuma vyosena vyamutembele.’+
15 “Mwata Wakulitulaho Yehova nambe ngwenyi, ‘Vapilishitu vavaLevi vakutanga yaZatoke,+ vaze vazachilenga milimo hachihela chami chajila omu vaIsalele vahandukile kuli ami,+ vakiko navapandamanga kuli ami nakunguzachila. Navemananga kumeso ami nakunguhana maji+ namanyinga.+
16 Vakiko navengilanga muchihela chami chajila nakupandama kumesa yami vanguzachilenga.+ Navazatanga milimo yavo ngunavahane.+
17 “‘Omu navengilanga muvikolo vyachipango chamukachi, vavwalenga uvwalo wawanda.+ Kanda vavwalanga uvwalo wamangona amikoko omu navazachilanga muvikolo vyakuchipango chamukachi chipwe mukachi kachipangoko.
18 Valikasenga mahina kumitwe yavo, nakuvwala jiputula mangana vafwike jitungi javo.+ Kanda vavwalanga uvwalo uze nauvalingisa vatukuteko.
19 Shimbu kanda valovoke nakuya muchipango chakusali muze muli vatu veka, vazulenga uvwalo wakuzachisa+ nakuuhaka mutupete vajila vakulila.+ Vavwalenga uvwalo weka kuchina kujila chili kuuvwalo wavo nachisambukila kuvatu veka.*
20 Kanda vakakonga kumitwe yavo+ chipwe kulama jikambu jakumitwe yavoko, oloze vajikambenga.
21 Vapilishitu kanda vakanwa vinyo omu navengila muchipango chamukachiko.+
22 Kanda vakambata pwevo watuliwe chipwe uze vanalukululako.+ Oloze vakambate mujike wakutanga yaIsalele uze kanda alisavaleho lyehi nalunga chipwe tuliwe uze vambachile kuli kapilishitu.’+
23 “‘Vanangulenga vatu jami vatachikize vyuma vyajila navyevi vyakuzeneka kujila, nakuvalongesa vatachikize vyuma vyavipi navyevi vitoma.+
24 Vapwenga vaka-kusopa milonga,+ kaha vayulenga mwaya mazu ami akuyula.+ Valamenga jishimbi jami najindongi jami jakupandama kuviwanyino+ vyami vyosena nakujilika jisambata jami.
25 Kapilishitu kanda akapandama kumufuko kuchina mwapihya. Oloze nahase kulipihisa ivene nge uze nafu napu ise, chipwe naye, chipwe mwanenyi walunga, chipwe mwanenyi wapwevo, chipwe ndumbwenyi walunga, chipwe ndumbwenyi wapwevo uze kasombokako.+
26 Nge kapilishitu vanamutomesa, mukahite makumbi numba akaputuke kuzata milimo yenyi.
27 Halikumbi lize mwakengila muchihela chajila muchipango chamukachi mangana azachilemo, akahane wana wenyi wahashili.’+ Omu mukiko mwanambe Mwata Wakulitulaho Yehova.
28 “‘Ou ukiko naupwa uswana wavo: Ami yami uswana wavo.+ Kanda kuvahana luheto numba lumwe muIsaleleko, mwomwo ami yami luheto lwavo.
29 Vakiko navalyanga wana wamanona,+ nawana wahashili, nawana wahamulonga.+ Vyuma vyosena navahananga Kalunga muIsalele navipwanga vyavo.+
30 Mihako najimbuto jakulivanga jamwaza josena namawana eka namuhananga navipwanga vyavapilishitu.+ Muvahanenga nawa unga waseke wakujimbuto jenu jakulivanga.+ Kaha vaze vakujizuvo jenu navavakisula.+
31 Vapilishitu kanda vakalya kajila chipwe kanyama wakulifwila chipwe uze vanatanyeko.’+
Kwinyikila Chamwishi
^ Hepe., “haka muchima wove.”
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Hepe., “kuchina navajilika vatu veka nauvwalo wavo.”
