Ezekele 45:1-25
45 “‘Omu namukalipulila lifuchi kupwa uswana wenu,+ mukapulila nawa Yehova musuka wamavu wajila kupwa wana wenyi.+ Musuka kana ukapwe jikuvite* 25,000 muusuku, kaha muwihi jikuvite 10,000.+ Ou musuka wosena* naukapwa wajila.
2 Hamusuka kana mukapulaho chihela chajila chajikuvite 500 muusuku namuwihi,+ kaha chihela kana chikapwe nachipapa chajikuvite 50 kumitamba yosena jingulwishi.+
3 Musuka kana ukapwe jikuvite 25,000 muusuku, kaha muwihi jikuvite 10,000. Hamusuka kana hakiko nahakapwa chihela chajila chikuma.
4 Musuka kana naukapwa wajila mulifuchi, kaha naukapwa wavapilishitu+ vaze veji kuzachilanga kuchihela chajila nakupandama kuli Yehova nakumuzachila.+ Hakiko nahakapwa jizuvo javo nachihela chajila.
5 “‘VaLevi vaze veji kuzachilanga kutembele, navakapwa namusuka wamavu wajikuvite 25,000 muusuku, kaha muwihi jikuvite 10,000.+ Navakaheta nawa tupete vakulila 20.+
6 “‘Mukapula nawa musuka wamavu wajikuvite 25,000 muusuku, (wakweseka hamwe nauze namukahana Kalunga kupwa wana wajila), kaha muwihi jikuvite 5,000+ mangana ukapwe wanganda. Musuka kana naukapwa wavaze vakuzuvo yaIsalele vosena.
7 “‘Mwata wavaIsalele mwakapwa namusuka kumutamba wamusuka navakahana Kalunga kupwa wana wajila nakumutamba wamusuka wanganda. Musuka kana naukalihata nauze navakahana Kalunga kupwa wana wajila namusuka wanganda. Naukapwa kumutamba wakumulauko nakumutamba wakumututuko. Kusuhwa chawo kufuma kungiza yakumulauko nakuheta kungiza yakumututuko chikateseke hamwe namisuka yamiyachi yavaIsalele.+
8 Musuka kana naukapwa hiluheto lwenyi muIsalele. Vamyata jami kaveshi kukayanjisa cheka vatu jamiko,+ kaha navakahananga vaze vakuzuvo yaIsalele mavu kweseka namiyachi yavo.’+
9 “Mwata Wakulitulaho Yehova nambe ngwenyi, ‘Enu vamyata javaIsalele, munasweze jino.’
“Mwata Wakulitulaho Yehova nambe ngwenyi, ‘Mbilenu vilinga vyenu vyaulyanyi naluyanjisa, lingenunga vyuma vyamwaza vyakwoloka.+ Litwaminenu kutambula luheto lwavatu jami.+
10 Zachisenu vipezaliso vyakwoloka. Zachisenu vyesekelo vyalifwa* vyakwoloka navyambate* vyakwoloka.+
11 Chesekelo chalifwa nachechi chambate chipwenga chochimwe. Chesekelo chambate chipwenga chimbwa chimwe chakusokesa muvimbwa 10 vyahomele,* kaha chesekelo chalifwa nawa chipwenga chimbwa chimwe chakusokesa muvimbwa 10 vyahomele. Homele yikiko namuzachisanga kupwa chipimo.
12 Shekele*+ yipwenga jingela* 20. Jishekele 20, najishekele 25, najishekele 15 jipwenga mane* yenu yimwe.’
13 “‘Ou ukiko wana namuhananga: chimbwa chimwe chakusokesa muvimbwa 6 vyalifwa kufuma kuhomele hihomele yatiliku, nachimbwa chimwe chakusokesa muvimbwa 6 vyalifwa kufuma kuhomele hihomele yambale.
14 Chazano chamaji muchipimanga muchesekelo chambate. Mbate yimwe yinapu chimbwa chimwe chakusokesa muvimbwa 10 vyakole.* Kaha jimbate 10 jinapu homele yimwe mwomwo homele yimwe yinapu jimbate 10.
15 Muhana nawa mukoko umwe hamikoko 200 vakuutanga wavaIsalele. Mukoko kana namumuhanyina kumwe nawana wamanona,+ nawana wakulumba,+ nawana wakusolola kuunda+ mangana mulingile vatu chakufwika hashili.’+ Omu mukiko mwanambe Mwata Wakulitulaho Yehova.
16 “‘Vatu vamulifuchi vosena navakahananga wana+ kana kuli mwata muIsalele.
17 Oloze mwata ikiye mwakapwa namulimo wakutala mawana akulumba,+ nawana wamanona,+ nawana wavinyo haviwanyino,+ nahakumweka chakakweji, nahajiSambata,+ nahaviwanyino vyosena vatongola vyakuzuvo yaIsalele.+ Ikiye mwakawahisanga wana wahashili, nawana wamanona, nawana wakulumba, namawana akusolola kuunda, mangana vakalingile vaze vakuzuvo yaIsalele chakufwika hashili.’
18 “Mwata Wakulitulaho Yehova nambe ngwenyi: ‘Mukakweji wakulivanga, halikumbi lyakulivanga, mukambata mwanangombe wakuji walambwe wakuutanga mangana mukatomese chihela chajila kushili.+
19 Kapilishitu akambate manyinga amwe achimuna wawana wahashili, akawakwite hachipamba chachikolo chatembele,+ nahamavinji awana amukusa alijiko lyakulumbila, nahachipamba chachikolo chachipango chamukachi.
20 Omu mukiko namukalinga nahalikumbi lyakusokesa mukakweji mwomwo yaweshowo mwakalinga shili hakulimbenja chipwe hakuzeneka kutachikiza.+ Mukalingila tembele chakufwika hashili.+
21 “‘Mukalinga chiwanyino chaPaseka+ mukakweji wakulivanga, halikumbi lyakusokesa 14. Mukalya mbolo yakuzeneka chimbalwila hamakumbi 7.+
22 Halikumbi kana mwata akawahise mwanangombe wakuji kupwa wana wahashili yenyi nahashili yavatu vamulifuchi.+
23 Hamakumbi aze achiwanyino, akawahise vana vavangombe vavakuji valambwe, navizamba jamikoko + valambwe kupwa wana wakulumba kuli Yehova hakumbi hakumbi. Akawahise nawa chizamba chapembe hakumbi hakumbi kupwa wana wahashili.
24 Akawahise nawa lifwa limwe lyawana wamanona lyakuhanyina kumwe namwanangombe himwanangombe wakuji, nalifwa likwavo lyakuhanyina kumwe nachizamba chamukoko hichizamba chamukoko. Lifwa hilifwa vakalihanyine kumwe nahine* yamaji.
25 “‘Mukakweji wakusokesa 7, halikumbi lyakusokesa 15, akawahise nawa wana wahashili woumwe, nawana wakulumba, nawana wamanona, namaji hamakumbi aze achiwanyino.’”+
Kwinyikila Chamwishi
^ Chipwe “Jingiza jawo josena.”
^ Vali nakuvuluka jikuvite jajisuku. Tala Chihande B14.
^ Tala Chihande B14.
^ Tala Chihande B14.
^ Tala Chihande B14.
^ Chipwe “mina.” Tala Chihande B14.
^ Tala Chihande B14.
^ Tala Chihande B14.
^ Tala Chihande B14.
^ Tala Chihande B14.
