Ezekele 46:1-24
46 “Mwata Wakulitulaho Yehova nambe ngwenyi: ‘Chikolo chachipango chamukachi chakumutamba wakumututuko+ chikapwenga lika chakusoka+ hamakumbi 6 akuzata,+ oloze vakachisokolole halikumbi lyaSambata, nahalikumbi lyakumweka chakakweji.
2 Mwata akengilile mukapete kauhichilo kakuchikolo+ kufuma haweluka, kaha akemane kuchipamba chachikolo. Vapilishitu vakamuhanyine wana wenyi wakulumba, namawana enyi akusolola kuunda, kaha akalifukwile hamukwilichi wachikolo numba akalovoke. Oloze chikolo kanda vakachisokako palanga nakuchingoloshi.
3 HajiSambata nahakumweka chakakweji, vatu vamulifuchi navakiko navakalifukwilanga hachikolo kumeso aYehova.+
4 “‘Wana wakulumba uze mwakahana mwata kuli Yehova halikumbi lyaSambata ukapwe vana vamikoko vavizamba 6 valambwe, nachizamba chamukoko umwe walambwe.+
5 Wana wamanona wakuhanyina kumwe nauze chizamba chamukoko ukapwe wakuteseka mulifwa* limwe. Kaha wana wamanona wakuhanyina kumwe navana vamikoko vavizamba ukapwe kweseka nomu nahashila. Lifwa hilifwa lyawana wamanona akalihanyine kumwe nahine* yimwe yamaji.+
6 Halikumbi lyakumweka chakakweji, akahane mwanangombe wakuji walambwe wakuutanga, navana vamikoko vavizamba 6, nachizamba chamukoko umwe. Vosena vakapwe valambwe.+
7 Akahane wana wamanona wakuteseka mulifwa limwe wakuhanyina kumwe nauze mwanangombe wakuji, nalifwa likwavo lyakuhanyina kumwe nauze chizamba chamukoko. Kaha wana wamanona wakuhanyina kumwe navana vamikoko vavizamba ukapwe kweseka nomu nahashila. Lifwa hilifwa lyawana wamanona akalihanyine kumwe nahine yimwe yamaji.
8 “‘Omu mwata mwakengila, akengilile kukapete kauhichilo kakuchikolo, kaha akalovokele nawa kwokumwe.+
9 Omu vatu vamulifuchi navakeza kumeso aYehova haviwanyino,+ vaze navakengilila kuchikolo chakunote+ nakwiza nakulemesa Kalunga vakalovokele kuchikolo chakusulo.+ Kaha vaze navakengilila kuchikolo chakusulo vakalovokele kuchikolo chakunote. Naumwe wauchi mwakalovokela kuchikolo chize engililanga mwomwo vosena navakalovokela kuchikolo chinalitalasana nachize vengililanga.
10 Mwata uze ali hali vakiko akengilile hamwe navakiko nakulovokela nawa hamwe navakiko.
11 Haviwanyino vyakutongola nahaviwanyino vyeka, wana wamanona wakuhanyina kumwe namwanangombe wakuji ukapwe lifwa limwe. Wana wamanona wakuhanyina kumwe nachizamba chamukoko ukapwe nawa lifwa limwe. Kaha wana wamanona wakuhanyina kumwe navana vamikoko vavizamba ukapwe kweseka nomu nahashila. Lifwa hilifwa lyawana wamanona akalihanyine kumwe nahine yimwe yamaji.+
12 “‘Kachi nge mwata mwawahisa wana wakulumba,+ chipwe mawana akusolola kuunda kupwa wana wakulisakila wakuhana kuli Yehova, kaha vakamusokolwele kuchikolo chakumutamba wakumututuko akengilileko. Akawahise wana wenyi wakulumba, namawana enyi akusolola kuunda nganomu eji kulinganga halikumbi lyaSambata.+ Kahomu mwakalovoka, chikolo kana vakachisoke.+
13 “‘Mukahana mwanamukoko wachizamba walambwe wamwaka umwe hakumbi hakumbi kupwa wana wakulumba kuli Yehova.+ Mukalinga ngocho chimene hichimene.
14 Mukamuhanyina kumwe nachimbwa chimwe chawana wamanona chakusokesa muvimbwa 6 vyalifwa, nachimbwa chimwe chamaji chakusokesa muvimbwa vitatu vyahine chakusapwila haunga wamwaza. Ukapwe wana wamanona wakuhana kuli Yehova hakumbi hakumbi. Elu nalupwanga lushimbi lwamyaka namyaka.
15 Mukahana mwanamukoko wachizamba, nawana wamanona, namaji chimene hichimene kupwa wana wakulumba.’
16 “Mwata Wakulitulaho Yehova nambe ngwenyi: ‘Kachi nge mwata mwapangila vana venyi vamalunga wana kupwa uswana wavo, kaha wana kana naupwa luheto lwavaze vana venyi. Naupwa luheto lwavo lwauswana.
17 Oloze kachi nge mwambata wana wakuuswana wenyi nakuuhana ngamba yenyi, kaha wana kana naupwa wayauze ngamba palanga nakumwaka wakusokoka+ numba ukakinduluke kuli uze mwata. Vana venyi vamalunga vakiko kaha navapwanga nauswana wavo myaka yosena.
18 Mwata kanda akatambula uswana wavatu hakuvahanga kuluheto lwamavu avoko. Akahane vana venyi uswana wakuluheto lwenyi, mangana havatu jami hakazeneke kupwa umwe uze navakahanga kuluheto lwamavu enyi.’”
19 Jino angwingishilile kuwingililo+ uze wapwililile kuluhachi lwachikolo chakutupete vajila vakulila vavapilishitu vaze vatalile kunote.+ Kaha ngwamwene chihela chimwe kunyima kumutamba wakumulauko.
20 Ambile kuli ami ngwenyi: “Kuchihela kana kukiko vapilishitu navatelekelanga wana wahamulonga, nawana wahashili. Kukiko nawa navochelanga wana wamanona+ kuchina navambata chuma chimwe nakuya nacho kuchipango chakusali nakulingisa kujila chisambukile kuvatu veka.”*+
21 Jino angulowele nakungutwala kuchipango chakusali. Anguhichishile mujimbango josena jiwana jachipango chakusali, kaha mumbango himbango ngwamwenemo tuvipango.
22 Mujimbango josena jiwana mwapwile tuvipango twatundende twajikuvite* 40 muusuku, kaha muwihi jikuvite 30. Twosena tuwana twatesekele hamwe.
23 Kutuvipango kana vajingulwishileko vyalo, kaha mwishi yavyalo kana vatungilemo vihela vyakutelekela mawana.
24 Jino ambile kuli ami ngwenyi: “Omu mukiko mujizuvo vaka-kuzachila kutembele veji kutelekelanga mawana veji kuhananga vatu.”+
Kwinyikila Chamwishi
^ Tala Chihande B14.
^ Tala Chihande B14.
^ Hepe., “nakulingisa vajilike vatu veka.”
^ Vali nakuvuluka jikuvite jajisuku. Tala Chihande B14.
