Ezekele 47:1-23
47 Angukindulwishile cheka kuchikolo chatembele,+ kaha ngwamwene mwishi yamukwilichi muli nakulovoka meya.+ Apwile nakuya kumutamba wakumututuko, mwomwo tembele yatalile kumututuko. Meya kana apwile nakufuminyina kwishi, kuluhachi lwatembele lwachilyo, nakuhita kusulo yalijiko lyakulumbila.
2 Angulowelele kuchikolo chakunote,+ kaha angunyengumwishile nakungutwala kuchikolo chakusali chize chatalile kumututuko.+ Kaha ngwamwene meya ali nakuhita kuluhachi lwachikolo lwachilyo.
3 Uze lunga alovokele nakuya kumutamba wakumututuko namukole wakupimisa mulivoko lyenyi.+ Apimine kalwiji uze apwile nawaze meya, kaha apwile jikuvite* 1,000 kufuma hachikolo chakumututuko. Angutambukishile mumeya kana, kaha aze meya ahetele mutusendengele.
4 Apimine jikuvite jikwavo 1,000, angutambukishile cheka muze mumeya, kaha aze meya ahetele mumambuli.
Apimine cheka jikuvite 1,000 nakungutambukisa muze mumeya, kaha aze meya ahetele mumbunda.
5 Apimine nawa jikuvite 1,000, kaha ngwahonene kuzauka namahinji, mwomwo meya avulile chikuma, kuzauka kuvanga kuhala. Apwile hikalwiji uze navahona vatu kuzauka namahinji.
6 Jino angwihwile ngwenyi: “Ove mwanamutu, unamono nyi?”
Ngocho angulwezele ngukinduluke kutunda yauze kalwiji.
7 Omu ngwakindulukile, ngwamwene kuchikulo chauze kalwiji kusali nasali kuli mitondo yayivulu chikuma.+
8 Jino angwambile ngwenyi: “Awa meya anayi kungalila yakumututuko nakuheta kuAlava*+ swi nakukalungalwiji. Omu nawakaheta mukalungalwiji,+ meya amukalungalwiji nawakatoma.
9 Vyuma vyakuyoya* vyosena navikayoya kweshokwo nawakaya aze meya.* Nakukapwa vaishi vavavulu chikuma mwomwo yawaze meya. Meya amukalungalwiji nawakatoma, kaha vyuma vyosena navikayoya kweshokwo mwakaheta uze kalwiji.
10 “Vaka-kuta vaishi navakemananga kukalwiji kana, kuputukila kuEne-ngechi+ swi nakuEne-ngalaime kuze nakukapwa chihela chakwanyikila moji achikokela. Nakukapwanga miyachi yayivulu yavaishi, ngana mwavaishi vamuKalungalwiji Wamunene.*+
11 “Nakukapwanga jisanga navihela vyaulova, oloze evi kavyeshi kukatomako. Navikapwanga vihela vyamungwa.+
12 “Kuchikulo chakalwiji kusali nasali nakukasoka mitondo yamihako yakulisezaseza. Mafwo ayo kaweshi kukazuzako, kaha nawa kayeshi kukahona kwima mihakoko. Nayikemanga mihako yayihya kakweji hikakweji, mwomwo meya ayo nawakafumanga kuchihela chajila.+ Mihako yayo nayikapwanga hivyakulya, kaha mafwo ayo nawakapwanga akukisa vatu.”+
13 Mwata Wakulitulaho Yehova nambe ngwenyi: “Eyi yikiko ngalila namukahana miyachi yavaIsalele 12 kupwa uswana wavo, kaha Yosefwe akapwe navyazano vivali.+
14 Namukaswana lifuchi kana, kaha namukatambula vyazano vyakuteseka hamwe.* Ngwalishingile kuhana lifuchi kana kuli vakakuluka jenu,+ oloze ngunalihane* jino kuli enu kupwa uswana wenu.
15 “Eyi yikiko ngiza yalifuchi kumutamba wakunote. Nayikaputukila kuKalungalwiji Wamunene kujila yakuya kuHetelone+ chakutala kuZetate,+
16 naHamate,+ naMbelota,+ naShivilaime yize yatwama hakachi kangalila yaNdamashiku nayaHamate, kaha nayikaya swi nakuHazele-hatekone yize yapwila kungiza yaHaulane.+
17 Ngiza kana nayikafuma kukalungalwiji nakuheta kuHazale-enone+ kungiza yaNdamashiku kunote, nakungiza yaHamate.+ Eyi yikiko ngiza yakunote.
18 “Ngiza yakumutamba wakumututuko nayikapwila mukachi kaHaulane naNdamashiku, kaha nayikahita kukulo yaYotau, mukachi kaNgileyate+ nalifuchi lyaIsalele. Mukapima kufumisa kungiza palanga nakukalungalwiji wakumututuko.* Eyi yikiko ngiza yakumututuko.
19 “Kaha ngiza yakusulo nayikaputukila kuTamale nakuheta kumeya akuMelivote-kateshe+ swi nakuMwanakalwiji,* nakuKalungalwiji Wamunene.+ Eyi yikiko ngiza yakusulo.
20 “Kaha Kalungalwiji Wamunene yikiye ngiza yakumutamba wakumulauko swi nakuze kwakulitalasana naLevo-hamate.*+ Eyi yikiko ngiza yakumulauko.”
21 “Mukalipangila lifuchi eli, kweseka namiyachi yavaIsalele 12.
22 Mukalipangilalyo kupwa uswana wenu, navamwiza vaze vali nayenu, vaze vanaseme vana omu vanatwamenga nayenu. Kaha mukavamonenga kupwa nge hivaIsalele vakusemuka muli enu. Navakiko vakatambule uswana nayenu hamwe mumiyachi yavaIsalele.
23 Mukahana vamwiza uswana kweshokwo navakatwama mujingalila jamiyachi yenu.” Omu mukiko mwanambe Mwata Wakulitulaho Yehova.
Kwinyikila Chamwishi
^ Vali nakuvuluka jikuvite jajisuku. Tala Chihande B14.
^ Chipwe “kulikundu.”
^ Chipwe “Myono.”
^ Hepe., “kweshokwo navakaya vaze tulwiji vavali.”
^ Ikiye Kalungalwiji waMendetelenya.
^ Hepe., “Namukaswana lifuchi kana, mutu himutu ngana mwandumbwenyi.”
^ Hepe., “oloze linaholokela.”
^ Kulumbununa, Kalungalwiji waKufwa.
^ Ikiye Mwanakalwiji waEjipitu.
^ Chipwe “nawingililo wakuHamate.”