Ezekele 5:1-17
5 “Ove mwanamutu, mbata poko yamukwale yakuvambuka uyitenge yembe yakutewisa. Teula jikambu jakumutwe wove nawevu wove, kaha mbata chipezaliso mangana uvipezalise nakuvihandununa mumikamo yitatu.
2 Mbata mukamo umwe uwochele munganda omu nawalinga makumbi akuhaka nganda muchingombela hiwanakumu.+ Umbata nawa mukamo ukwavo uuvete napoko yamukwale kujingulwisa nganda yosena.+ Mukamo wamakumishilo uukuve mupeho, kahami nangukambata poko yamukwale nakuuhangasana.+
3 “Kumukamo kanou wausula mbatako jikambu jimwe ujivungile kuuvwalo wove.
4 Mbata jikambu jikwavo ujimbile mukakahya ujilumbe. Kaha kakahya nakafumako nakatanda kuzuvo yaIsalele yosena.+
5 “Mwata Wakulitulaho Yehova nambe ngwenyi, ‘Eyi yikiko Yelusalema. Ngunayihake mukachi kamafuchi eka, kaha anayijingilika.
6 Oloze yinalikange kumazu ami akuyula nakujishimbi jami, kaha yinalingi mwakuhuka kuhambakana mafuchi anayijingilika.+ Yinakane mazu ami akuyula, kaha kayakavangijile jishimbi jamiko.’
7 “Ngocho Mwata Wakulitulaho Yehova nambe ngwenyi: ‘Hakuwana nge unalikange kuhambakana mafuchi eka aze anakujingilika, kaha nawa kawakavangijile jishimbi jami nakulinga mwaya mazu ami akuyulako, oloze unalingi mwaya mazu akuyula avaka-mafuchi eka vaze vanakujingilika,+
8 shikaho Mwata Wakulitulaho Yehova nambe ngwenyi: “Tala, nangukufumbukila ove nganda,+ kaha nangukuzangamisa kumeso avaka-mafuchi eka.+
9 Nangukulinga muze kanda ngukulingengaho lyehi mwomwo yavilinga vyove vyaunyengwe vyosena, kaha kangweshi kukakulingamo chekako.+
10 “‘“Ngocho visemi vamuli ove navakalya vana vavo,+ kaha vana nawa navakalya visemi javo. Nangukazangamisa vosena vaze navakasala muli ove nakuvamwangila kumitamba yosena.”’*+
11 “Mwata Wakulitulaho Yehova nambe ngwenyi, ‘Omu ngwayoya tu, nangukakukana* hakuwana nge unajilulula chihela chami chajila namakombelo ove aunyengwe osena navilinga vyove vyavipi vyosena.+ Kangweshi kukakwivwila keke chipwe kukutetelako.+
12 Chimbwa chimwe chavatu chamuli ove nachikafwa namusongo wachihita chipwe kufwa nazala yakalombolombo. Chimbwa chikwavo nachikalindumuka kupoko yamukwale.+ Chimbwa chamakumishilo nangukachimwangila kumitamba yosena,* kaha nangukambata poko yamukwale nakuchihangasana.+
13 Matoto ami nawakakuma, utenu wami naukatula, kaha nangukasuuluka.+ Ngocho omu nangukakumisa kuvasolwela utenu wami, navakatachikiza ngwavo ami Yehova yami ngunahanjika, mwomwo ngwasaka vatu valihane kuli ami namichima yavo yosena.+
14 “‘Nangukakulingisa kupwa ungundu, kaha vaka-mafuchi vaze vanakujingilika namahitajila navakakutoleka.+
15 Omu nangukakusopesa namatoto nautenu nakukuzangamisa, vaka-mafuchi vaze vanakujingilika navakakutoleka nakukusaula.+ Naukapwa uchakutalilaho kuli vakiko, kaha navakevwa woma. Ami Yehova yami ngunahanjika.
16 “‘Nangukatuma mivwi yazala yakalombolombo mangana yikakunongese.+ Kaha nangukatohwesa zala kana hakukehesa vyakulya muli ove.*+
17 Nangukakutumina zala yakalombolombo, navisuma vavapi,+ kaha navakajiha vana vove. Muli ove namukapwa musongo wachihita nakumwanga manyinga, kaha nangukaneha poko yamukwale hali ove.+ Ami Yehova yami ngunahanjika.’”
Kwinyikila Chamwishi
^ Hepe., “kujipeho josena.”
^ Chipwe “nangukakunongesa.”
^ Hepe., “kujipeho josena.”
^ Hepe., “nangukahokola jimbwechi jambolo yove.” Pamo kutalisa kujimbwechi vatulikililenga mbolo.