Ezekele 6:1-14
6 Yehova ahanjikile cheka kuli ami ngwenyi:
2 “Ove mwanamutu, talisa meso ove kujipili jaIsalele, upolofwete vyuma navikasoloka kujikiko.
3 Hanjika kujikiko ngwove, ‘Enu jipili jaIsalele, ivwililenu vyuma nahanjika Mwata Wakulitulaho Yehova. Mwata Wakulitulaho Yehova nambe kujipili jajinene, nakujipili jajindende, nakuvana vatulwiji, nakuvinema ngwenyi: “Talenu, nangukaneha poko yamukwale hali enu, kaha nangukapuzula vihela vyenu vyakulunduka.
4 Nangukapuzula majiko enu akulumbila, nakukapazula vitumbikilo vyenu vyavyuma vyalivumba lyamwaza,+ kaha vatu jenu vaze vanajihi nangukavambila kumakombelo enu aunyengwe.*+
5 Nangukambila vivimbi vavaIsalele kumakombelo avo aunyengwe. Nangukatapwila vifuwa vyenu kumajiko enu akulumbila.+
6 Jinganda jakuvihela vyenu vyosena mwatwama navakajinongesa,+ vihela vyenu vyakulunduka navakavipuzula, kaha navikasala ngundu.+ Majiko enu akulumbila navakawapuzula nakuwashiula, makombelo enu aunyengwe nawakanonga, vitumbikilo vyenu vyavyuma vyalivumba lyamwaza navakavipazula, ngocho milimo yenu nayikajimbangana.
7 Vaze navakajiha navakalindwomwoka muli enu,+ kaha namukatachikiza ngwenu ami yami Yehova.+
8 “‘“Oloze nangukasezaho vamwe, mwomwo hali enu nahakayovoka vamwe kupoko yamukwale muli vaka-mafuchi eka, omu navakamimwangila kumafuchi kana.+
9 Vaze navakayovoka hali enu navakangwanuka kumafuchi kuze navakavakwata ufunge.+ Navakatachikiza ngwavo ngwalyonyingile mumuchima omu vazenekele kushishika nakuhanduka kuli ami,+ nomu nawa vevwilile peha* makombelo avo aunyengwe.+ Navakevwa sonyi nakwivwila unyengwe vyuma vyavipi vyosena vanalingi.+
10 Navakatachikiza ngwavo ami yami Yehova, kaha kangwalyongeleko omu ngwahanjikile ngwami nangukavanehela lupi.”’+
11 “Mwata Wakulitulaho Yehova nambe ngwenyi, ‘Linga pu mumavoko ove, twako lushindo hamavu nalihinji lyove nakulishona havyuma vyaunyengwe vyosena vanalingi vaze vakuzuvo yaIsalele, mwomwo navakalindumuka kupoko yamukwale, nakuzala yakalombolombo, nakumusongo wachihita.+
12 Ou ali kwakusuku mwakafwa kumusongo wachihita, ou ali hakamwihi mwakalindumuka kupoko yamukwale, kaha weshowo mwakayovoka kuvyuma kana nakusalaho mwakafwa kuzala yakalombolombo. Ngocho nangukavasolwela chikupu utenu wami.+
13 Navakatachikiza ngwavo ami yami Yehova+ omu vatu javo vanajihi navakasavala kumakombelo avo aunyengwe, nakumajiko avo akulumbila,+ nakujipili javo jajisuku josena, nahelu lyajipili jajinene josena, namwishi yamitondo yakujika mafwo, namwishi yamitondo yayinene, kuze vahanyinyinenga mawana alivumba lyalupengopengo mangana vasuulwise makombelo avo aunyengwe osena.+
14 Nangukolola livoko lyami nakuvazangamisa, kaha nangukalingisa lifuchi lyavo kupwa ngundu. Vihela vyavo vatwama navikasala vyamokomoko kuhambakana pambo yili kwakamwihi naNjivila. Ngocho navakatachikiza ngwavo ami yami Yehova.’”
Kwinyikila Chamwishi
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Chipwe “nomu nawa valingile ujila hakulemesa.”
