Ezekele 7:1-27
7 Yehova ahanjikile cheka kuli ami ngwenyi:
2 “Ove mwanamutu, Mwata Wakulitulaho Yehova nahanjika kuli vatu vamulifuchi lyaIsalele ngwenyi: ‘Kukuma chineza. Kukuma chineza kujimbango josena jiwana jalifuchi.
3 Kukuma chineza jino hali enu, kaha nangumikwachila utenu, nakumisopesa kweseka najijila jenu navilinga vyenu vyaunyengwe.
4 Kangweshi kumivwila keke chipwe kumitetelako,+ oloze nangumizangamisa hajijila jenu, kaha namumona lupi havilinga vyenu vyaunyengwe.+ Ngocho namukatachikiza ngwenu ami yami Yehova.’+
5 “Mwata Wakulitulaho Yehova nambe ngwenyi, ‘Talenu! Lupi lwakulipwila luli nakwiza.+
6 Kukuma chili nakwiza. Kukuma nachiza hali enu mukumikasumuna. Talenu! Kukuma chili nakwiza.
7 Enu mwatwama mulifuchi, lwola lwenu lunahete. Lwola luli nakwiza, kaha likumbi lili hakamwihi.+ Linapu hilikumbi lyakuluwangana, keshi lyakuwahilila hajipiliko.
8 “‘Kalinwaha ngumisolwele kulundundu yami,+ nakumikwachila utenu,+ kaha nangumisopesa kweseka najijila jenu navilinga vyenu vyaunyengwe.
9 Kangweshi kumivwila keke chipwe kumitetelako.+ Nangumizangamisa hajijila jenu, kaha namumona lupi havilinga vyenu vyaunyengwe. Ngocho namukatachikiza ngwenu ami Yehova yami nguli nakumizangamisa.+
10 “‘Talenu! Likumbi lili nakwiza.+ Lwola lwenu lunahete, kaha ngunalizange kumizangamisa nambwechi. Muchima wakazamuzamu wavaka-kole unayangilila.
11 Ulyanyi unapu jino mbwechi yakuzangamisa vaka-kuhuka.+ Kuli vakiko kakweshi umwe mwakayovokako, chipwe luheto lwavo, chipwe mazavu avo, chipwe ulemu wavo.
12 Lwola luli nakwiza, likumbi nawa lili nakwiza. Muka-kulanda kanda awahililako, kaha muka-kulanjisa nawa kanda alishonako mwomwo ngunakwachila utenu lizavu lyavo lyosena.*+
13 Muka-kulanjisa keshi kukakinduluka kuvyuma vyenyi alanjishilengako, numba tuhu nayovoka, mwomwo echi chakumwenesa nachisolokela liyongomena lyosena. Naumwe wauchi mwakakinduluka, kaha nawa naumwe wauchi mwakayovoka, mwomwo yakuhenga chenyi.*
14 “‘Vanembi luneta,+ kaha vosena vanalizange lyehi, oloze naumwe wauchi ali nakuya kujita, mwomwo ngunakwachila utenu liyongomena lyosena.+
15 Poko yamukwale yili haweluka,+ musongo wachihita nazala yakalombolombo vili mukachi. Weshowo ali muchipapa mwafwa kupoko yamukwale, kaha vaze vali munganda navafwa kuzala yakalombolombo namusongo wachihita.+
16 Vaze navakayovoka navakachinyina kujipili, kaha vosena navakalishimwoka ngana mwamayembe vamuchinema hakuhenga chavo.+
17 Navakalizuzukila nawoma, navakalizovesela hamambuli avo.*+
18 Navakavwala vikeleyi,+ muzuzu nawa naukavakwata.* Vosena navakavevwisa sonyi, kaha kumitwe yavo nakukaseva lwanja.*+
19 “‘Palata yavo navakayimbila mujijila, ulu wavo navakauhunga. Palata yavo naulu wavo kavyeshi kukavayovola halikumbi lyautenu waYehovako.+ Kaveshi* kukasuuluka chipwe kwikutako mwomwo vinapu* chimbunji chakuvahukanyisa valinge vyuma vyakuhenga.
20 Valivwimbililile hakuwaha chavimbilingwa vyavo, kaha vavitengele* tuponya twavo namakombelo avo aunyengwe.+ Shikaho nangukavilingisa vakavihunge.
21 Palata yavo naulu wavo nangukavihana kuli vaka-mafuchi eka vakalimbachilevyo, kaha nawa nangukavihana kuli vaka-kuhuka vakavipupe, ngocho navakavilumbilisa.
22 “‘Kangweshi kukavatalako,+ kaha navakalumbilisa chihela chami chakuswama.* Vihwanga navakengilamo nakuchilumbilisa.+
23 “‘Fula lilenge*+ mwomwo lifuchi linazale namilonga yakumwanga manyinga,+ nganda nawa yinazale naulyanyi.+
24 Nangukaneha vaka-mafuchi eka+ vavapi vakahete jizuvo javo.+ Nangukakumisa kulivwimba chavaka-ngolo, kaha vihela vyavo vyajila navakavilumbilisa.+
25 Omu navakalyonyinga navakatondatonda kuunda, oloze kaveshi kukachiwanako.+
26 Nakukeza vihuli navihuli, kaha nakukapwa mijimbu namijimbu. Vatu navakasakasaka vapolofweto+ vakavalweze chakumwenesa, oloze kuli vapilishitu kakweshi kukapwa jishimbiko,* kaha vakulwane nawa kaveshi kukakafwa* vatuko.+
27 Mwangana mwakalishona,+ vamyata navakahomba,* kaha mavoko avatu mulifuchi nawakachikima nawoma. Nangukavalinga kweseka najijila javo, nakuvasopesa nganomu vakiko veji kusopesanga vakwavo. Ngocho navakatachikiza ngwavo ami yami Yehova.’”+
Kwinyikila Chamwishi
^ Kulumbununa, vaka-kulanda vyuma navaka-kulanjisa vyuma kaveshi kukawana nganyoko mwomwo vosena navakanonga.
^ Chipwe pamo, “yakuhenga chavo.”
^ Kulumbununa, navakalisushila mwomwo yawoma.
^ Kulumbununa, navakaliteula tukongo mwomwo yakulishona.
^ Hepe., “naukavafwika.”
^ Chipwe “Myono yavo kayeshi.”
^ Kulumbununa, palata yavo naulu wavo.
^ Kulumbununa, vyuma vyavo vyaulu napalata.
^ Pamo kutalisa kukapete kamukachi chikuma kamuchihela chaYehova chajila.
^ Kulumbununa, malenge aufunge.
^ Chipwe “jindongiko.”
^ Chipwe “kukalweza mangana.”
^ Chipwe “navakazeya.”