Ezekele 8:1-18
8 Hamwaka wakusokesa 6, mukakweji wakusokesa 6, halikumbi lyamuchitanu, omu ngwatwamine muzuvo yami navakulwane javaYuta, ngolo jaMwata Wakulitulaho Yehova jejile hali ami.
2 Omu ngwatalile, ngwamwene mutu uze asolokele nge kakahya. Kufuma haze hapwile nakusoloka nge hambunda yenyi nakutwala kwishi kwapwile kakahya,+ kaha kufuma hambunda yenyi nakutwala kwilu kwapwile nakuvyakuma nge chikungo chapalata yakufutula naulu.+
3 Jino olwele chuma chimwe chafwanyine nge livoko, angukwachile kujikambu jakumutwe wami, kaha shipilitu yanguzundwile muutangatanga* nakungutwala kuYelusalema muchakungumwenesa chakuli Kalunga. Yangutwalile kuchikolo chamukachi+ chakumutamba wakunote kuze kwapwilenga likombelo* lyakwivwisa lisungu.+
4 Kaha ngwamwene upahu waKalunga kaIsalele+ nge uze ngwamwene kuchana.+
5 Ambile kuli ami ngwenyi: “Ove mwanamutu, andula meso ove utale kunote.” Ngwandwile meso ami nakutala kunote, kaha kuchikolo chalijiko lyakulumbila kumutamba wakunote kwapwile likombelo* lyakwivwisa lisungu.
6 Jino ambile kuli ami ngwenyi: “Ove mwanamutu, unamono vyuma vyaunyengwe vali nakulinga vakuzuvo yaIsalele kuno,+ vize vili nakungulingisa ngusosoloke kwakusuku nachihela chami chajila nyi?+ Oloze kuchili vyuma vyavivulu vyaunyengwe chikuma naumona.”
7 Kaha angutwalile kuwingililo wachipango, kahomu ngwatalile ngwamwene muteta hambango.
8 Jino ambile kuli ami ngwenyi: “Ove mwanamutu, tota hambango.” Ngwatotele hambango, kaha ngwamwene chikolo.
9 Ambile kuli ami ngwenyi: “Ingila utale vyuma vyaunyengwe vali nakulinga kuno.”
10 Ngwengilile mukachi, kaha ngwamwene vifwanyisa vyavivulu vyavyuma vyakuhalala hamavu, navyevi vyatunyama vavapi,+ namakombelo aunyengwe* osena avaze vakuzuvo yaIsalele.+ Vyapwile vyakusona hambango jingulwishi.
11 Vakulwane 70 vakuzuvo yaIsalele naYazanyiya mwanaShafwane+ vemanyine kuli vize vifwanyisa. Mutu himutu apwile nachiloso mulivoko lyenyi, kaha wishi wavyuma vyalivumba lyamwaza wapwile nakukakumuka.+
12 Ambile kuli ami ngwenyi: “Ove mwanamutu, unamono vyuma vali nakulinga vakulwane vakuzuvo yaIsalele mumilima, mutu himutu mutupete twamukachi muze muli makombelo enyi nyi? Mwomwo vali nakwamba ngwavo, ‘Yehova keshi nakutumonako. Yehova nafumumo muno mulifuchi.’”+
13 Ambile lika kuli ami ngwenyi: “Kuchili vyuma vyeka vyaunyengwe chikuma naumona vize vali nakulinga.”
14 Angutwalile nawa kuchikolo chakunote chazuvo yaYehova, kaha ngwamwene mapwevo vanatwame kuze, vali nakulila kalunga Tamuze.
15 Ambile cheka kuli ami ngwenyi: “Ove mwanamutu, vyuma kana unavimono nyi? Kuchili vyuma vyeka vyaunyengwe chikuma naumona vyakuhambakana hali evi.”+
16 Kaha angutwalile muchipango chazuvo yaYehova chamukachi.+ Kuchikolo chatembele yaYehova, mukachi kakapete kauhichilo nalijiko lyakulumbila, mwapwile malunga 25 vaze vatalishile jinyima javo kutembele yaYehova oku meso avo anatale kumututuko. Vapwile nakulifukula kulikumbi.+
17 Ambile kuli ami ngwenyi: “Ove mwanamutu, vyuma kana unavimono nyi? Kutala chinapu chuma chachindende vaze vakuzuvo yaYuta kulinga vyumevi vyaunyengwe, nakuzalisa lifuchi lyosena naulyanyi,+ nakungwivwisa lika kupihya tahi? Vali nakuhaka chuma chaunyengwe* kumazulu ami.
18 Ngocho nanguvasolwela kulundundu yami. Kangweshi kuvevwila keke chipwe kuvatetelako.+ Numba tuhu navateta nalizu lyakukanguka kuli ami, kangweshi kuvevwako.”+
Kwinyikila Chamwishi
^ Hepe., “yanguzundwile mukachi kamavu nalilu.”
^ Chipwe “chifwanyisa.”
^ Chipwe “chifwanyisa.”
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Hepe., “nakuhaka mutango.” Chasoloka nge mutango kana vauzachishilenga kukulemesa makombelo.
