Ezekele 9:1-11
9 Ahanjikile kuli ami nalizu lyakukanguka ngwenyi: “Sanyika vaze navanongesa nganda vezenga mutu himutu nachitwa chenyi chakunongesa mulivoko lyenyi.”
2 Jino ngwamwene malunga 6 navafuminyina kuchikolo chahelu+ chakumutamba wakunote. Mutu himutu apwile nachitwa chakupuzwisa mulivoko lyenyi. Kaha hali vakiko hapwile lunga mukwavo uze avwalile lihina lyamwaza, uze apwile nachinoma chavyuma vyakusonekesa chamuka-kusoneka hambunda yenyi. Vejile nakwimana kuluhachi lwalijiko lyakulumbila lyaunengu.+
3 Kaha upahu waKalunga kaIsalele+ wafumine haze havakeluve wapwile, wayile muchikolo chazuvo.+ Kalunga asanyikile uze lunga avwalile lihina lyamwaza, uze nawa apwile nachinoma chavyuma vyakusonekesa chamuka-kusoneka hambunda yenyi.
4 Yehova ambile jino kuli ikiye ngwenyi: “Hitangana munganda yaYelusalema ufunjike mifunda hajiholo javatu vaze vali nakulishimwoka nakulikemenena mikemo+ havyuma vyaunyengwe vali nakulinga vatu munganda.”+
5 Ngwevwile nawa mwahanjika kuli vaze malunga vakwavo ngwenyi: “Mukavangizenu munganda mujihe vatu. Kanda namuvevwila keke chipwe kuvatetelako.+
6 Jihenu vakulwane, navakweze, namapwevo vaze kanda valisavaleho lyehi namalunga, navanyike, namapwevo veka.+ Oloze kanda namupandama kuli mutu vanafunjika mufundako.+ Putukilenu kuchihela chami chajila.”+ Ngocho vavangililile kujiha vakulwane vaze vapwile kulutwe lwazuvo.+
7 Kaha ambile kuli vakiko ngwenyi: “Pihisenu eyi zuvo, zalisenu vipango navaze munajihi.+ Yenunga!” Ngocho vayile nakujiha vatu munganda.
8 Omu vapwile nakujiha vatu, ami vangusezeleho, kaha ngwafukamine chameso hamavu nakuhanjika nalizu lyakukanguka ngwami: “Mama lelo, Ove Mwata Wakulitulaho Yehova, naujiha vaIsalele vosena vaze vanasaleho omu uli nakusolwela Yelusalema kulundundu yove tahi?”+
9 Ambile kuli ami ngwenyi: “Kuhengesa chazuvo yaIsalele naYuta chinatoho chikuma.+ Lifuchi linazale namilonga yakumwanga manyinga,+ nganda nawa yinazale navilinga vyakuhenga.+ Mwomwo vali nakwamba ngwavo, ‘Yehova nafumumo muno mulifuchi, Yehova keshi nakumonako.’+
10 Ngocho ami kangweshi kuvevwila keke chipwe kuvatetelako.+ Nanguvazangamisa havilinga vyavo.”
11 Jino ngwamwene lunga uze avwalile lihina lyamwaza, hambunda yenyi hapwile chinoma chavyuma vyakusonekesa. Lunga kana anehele mujimbu ngwenyi: “Ngunalingi vyuma vyosena wangulwezanga.”
