Ezela 1:1-11
1 Mumwaka wakulivanga wachiyulo chaKuluse+ mwangana waPeleja, Yehova akatwile Kuluse avilike luvila muwangana wenyi wosena mangana mazu aYehova aze ahanjikile Yelemiya+ atesemo. Mazu aluvila kana awasonekele namumukanda,+ ngwenyi:
2 “Kuluse mwangana waPeleja nambe ngwenyi, ‘Yehova Kalunga wamelu nanguhane mawangana osena ahamavu,+ kaha nangulweze ngumutungile zuvo kuYelusalema,+ muYuta.
3 Mutu himutu hali enu vatu jenyi, Kalunga kenyi apwenga naikiye, kaha ayenga kuYelusalema kuYuta nakutungulula zuvo yaYehova Kalunga kaIsalele uze apwile nazuvo yenyi muYelusalema,* mwomwo ikiye napu Kalunga wamuchano.
4 Mwiza+ uze ali nakusaka kukinduluka chamokomoko nokwo ali, vakwavo* vamuhaneko palata, naulu, navikumba, navimuna, namawana akulisakila akuhana kuzuvo yaKalunga wamuchano+ yize yapwile muYelusalema.’”
5 Ngocho vatwamina vakujizuvo javakakuluka javaYuta, navakakuluka javaMbenjamine, navapilishitu, navaLevi, naveshovo vakunywile kuli Kalunga wamuchano, valiwahishile mangana vayenga nakutungulula zuvo yaYehova yize yapwile muYelusalema.
6 Kaha vakwavo vosena vaze muvatungilile vavahanyine vyuma vyapalata navyevi vyaulu, navikumba, navimuna, navyuma vyeka vyavilemu, vyakuwezela kumawana akulisakila.
7 Mwangana Kuluse alowele nawa vyuma vyamuzuvo yaYehova vize ambachile Nevukataneza kuYelusalema nakuvihaka muzuvo yakalunga kenyi.+
8 Kuluse mwangana waPeleja azachishile Michiletate muka-kumulamina luheto lwenyi avilovolemo. Kaha Michiletate avilavile nakuvihana kuli Sheshevazale*+ mwata wavaYuta.
9 Evi vikiko vyuma vize valavile: Mitonga 30 yakutenga naulu, namitonga 1,000 yakutenga napalata, namitonga yeka 29,
10 naviloso vyaulu 30, naviloso vyapalata 410, navyuma vikwavo 1,000.
11 Vyuma vyaulu, navyevi vyapalata vyosena vyapwile 5,400. Sheshevazale ejile navyuma vyosena evi kuYelusalema omu valovokele vatu muufunge+ muMbavilone.
