Ezela 3:1-13
3 Omu ahetele kakweji wakusokesa 7,+ vaIsalele* vaze vapwilenga mujinganda javo valikungulwilile hamwe vosena muYelusalema.
2 Jino Yeshuwa+ mwanaYehozatake navakwavo vapilishitu, naZeluvavele+ mwanaSheyalachele+ navandumbwenyi vatungile lijiko lyakulumbila lyaKalunga kaIsalele mangana valumbilengaho mawana akulumba, nge muze vasoneka muJishimbi jaMose+ mutu waKalunga wamuchano.
3 Vatungile lijiko lyakulumbila haze lyapwile lijiko lyamwaka numba tuhu vevwile woma wavatu vakumafuchi+ aze avajingilikile. Kaha vamulumbililengaho Yehova mawana akulumba+ achimene nawawa achingoloshi.
4 Valingilenga Chiwanyino chaVisakila kweseka nomu vasoneka,+ kaha vahanyinenga mawana nge kutesa nakuvula chamawana akulumba asakiwilenga hakumbi hakumbi.+
5 Kufumaho valumbilenga wana wakulumba+ uze vahanyinenga hakumbi hakumbi, nawana wahakumweka chakakweji,+ nawana wahaviwanyino vyajila+ vyaYehova. Valumbilenga nawa wana uze wafuminenga kuli weshowo ahanyine wana wakulisakila+ kuli Yehova.
6 Kufuma halikumbi lyatete lyamukakweji wakusokesa 7,+ vaputukile kulumba vimuna vakuvatula kuli Yehova, numba tuhu chihela chatembele yaYehova chapwile kanda vachale.
7 Vahanyinenga jimbongo kuli vaka-kusonga malolwa,+ nakuli vitotombwe.+ Vahanyinenga nawa vyakulya, navyakunwa, namaji kuli vaka-Shitone nakuli vaka-Tule mangana vambatenga vitondo vyamushitale kufuma kuLevanone nakuvitwala kuNjopa+ hakalungalwiji, nge kutesa nomu vavalwezele kuli Kuluse mwangana waPeleja.+
8 Omu mwahichile myaka yivali kufuma haze vejile kuzuvo yaKalunga wamuchano kuYelusalema, hakakweji wamuchivali, Zeluvavele mwanaSheyalachele, naYeshuwa mwanaYehozatake, navandumbwavo vosena vaze vapwile vapilishitu navaLevi, navosena vaze vakindulukile kuYelusalema kufuma muufunge+ vaputukile kuzata milimo. Kaha vatongwele vaLevi vaze vapwile namyaka yakusemuka 20 nakuya kwilu mangana vapwenga tupitau vakutala mulimo wakutunga zuvo yaYehova.
9 Ngocho Yeshuwa navana venyi, navandumbwenyi, naKatamiyele navana venyi, vana vaYuta, valifutakanyine hamwe mangana vatale vaze vapwile nakuzata mulimo kuzuvo yaKalunga wamuchano. Valifutakanyine hamwe nawa navana vaHenetate,+ navana vavo, navandumbwavo vaze vapwile vaLevi.
10 Omu vaka-kutunga valile chihela chatembele yaYehova,+ vapilishitu vavwalile uvwalo wavo waupilishitu nakumbata jineta,+ kaha vaLevi, vana vaAsafwe vambachile jingunga mangana vamwalise Yehova kweseka najindongi avahanyine Ndavichi mwangana wavaIsalele.+
11 Kaha vaputukile kwimba myaso+ yakumwalisa Yehova nakumusakwilila, “mwomwo apwa wamwaza, kaha eji kusolwelanga vaIsalele zangi yenyi yakwilila.”+ Vatu vamwalishile Yehova namazu akukanguka mwomwo valile chihela chazuvo yaYehova.
12 Vapilishitu vavavulu, navaLevi, navatwamina vakujizuvo javakakuluka javaIsalele, vakulwane vaze vamwene zuvo+ yamwaka, valilile namazu akukanguka omu vamwene chihela chayize zuvo vanachale. Oloze vavavulu vawahililile nakulikuwa namazu akukanguka.+
13 Ngocho vatu kavahashile kuhandununa mazu avatu vapwile nakuwahilila namazu avaze vapwile nakulilako, mwomwo vosena vapwile nakutambakana, kaha mazu avo evwakanyine nakuvihela vyakwakusuku.
Kwinyikila Chamwishi
^ Hepe., “vana vaIsalele.”