Ezela 4:1-24
4 Omu vaka-kole javaYuta navaMbenjamine+ vevwile ngwavo vaze vakindulukile kufuma muufunge+ vali nakumutungila Yehova Kalunga kaIsalele tembele,
2 hahaze vene vayile kuli Zeluvavele, navatwamina vakujizuvo javakakuluka javaIsalele, vambile kuli vakiko ngwavo: “Tutungilenu hamwe tembele, mwomwo nayetu tweji kulemesanga* Kalunga kenu,+ kaha tunamuvatwilanga vimuna kufuma vene kumakumbi aEsale-hatone+ mwangana waAsulya uze atunehele kuno.”+
3 Oloze Zeluvavele naYeshuwa, navatwamina vakujizuvo javakakuluka javaIsalele vambile kuli vakiko ngwavo: “Enu kamweshi nalisesa lyakutungila hamwe nayetu zuvo yaKalunga ketuko.+ Etu vavene natumutungila Yehova Kalunga kaIsalele zuvo nge muze natulweze Kuluse mwangana waPeleja.”+
4 Jino vatu vamulifuchi lize vahombeselenga vaYuta nakuvahonesa* kutunga zuvo.+
5 Vakambilenga vaka-mangana vahonese vishinganyeka vyavo+ vyakutunga zuvo hamakumbi osena aKuluse mwangana waPeleja swi nakumakumbi aNdaliu+ mwangana waPeleja.
6 Kumaputukilo achiyulo chaAhaswelu, vasonekele mukanda wakuvangijikila vatu vamuYuta namuYelusalema.
7 Kaha muchiyulo chaAlatakaseleke mwangana waPeleja, Mbishilame, naMichiletate, naTavele namasepa jenyi vasonekele mukanda kuli mwangana Alatakaseleke. Mukanda kana vawalumwine mulilimi lyaAlamayiki,+ vausonekele navasopelo valilimi kana.*
8 * Lehume mukulwane wavilolo jafulumende, namuka-kusoneka Shimishai vasonekele mukanda kuli Mwangana Alatakaseleke wakuvangijikila vatu vamuYelusalema.
9 (Mukanda kana wafumine kuli Lehume mukulwane wavilolo jafulumende, naShimishai muka-kusoneka, namasepa javo vaka-kuyula, namihato javanguvulu, navaka-kusoneka, navatu vakuEleke,+ navatu vakuMbavilone, navatu vakuSusa,+ chipwe ngwetu vatu vakuElame,+
10 navatu vakumafuchi eka vaze vakwachile ufunge kuli mutu wamulemu Osonape nakuvatwamisa mujinganda jaSamaliya+ namungalila yaMusali yaKalwiji.*
11 Awa akiko mazu amukanda uze vatumine kuli Alatakaseleke.)
“Kuli Mwangana Alatakaseleke, tambula mukanda kuli etu vangamba jove, kuli etu malunga vamungalila yaMusali yaKalwiji.
12 Ove mwangana, tachikiza ngwove vaYuleya vaze vafumine kuli ove nakwiza kuno kuli etu vanahete muYelusalema. Vali nakutungulula nganda yavatu vakulikanga, vakuhuka, kaha hinavakumisa kutunga jikembwe+ janganda nakutungulula vihela vyayo.
13 Ove mwangana, tachikiza ngwove kachi nge eyi nganda navayitungulula nakukumisa kutunga jikembwe jayo, kaha kaveshi kukatelanga mitelo chipwe kuhananga milambu+ chipwe jimbongo jamikwakwako. Chuma kana nachikatepulula luheto lwavamyangana.
14 Hakuwana nge etu tweji kutambulanga fweto kuzuvo yamwangana, ngocho katweshi nakusaka mwangana avindameko. Shikaho tunatumu mukanda kuli ove mwangana
15 mangana uhehwojole mumikanda yamijimbu yavakakuluka jove.+ Mumikanda kana nauwanamo mijimbu yakwamba nge nganda yino yapwile navatu vakulikanga, vaka-kuneha lupi kuli vamyangana namujingalila. Munganda kana munapunga vaka-kufumbukila fulumende putu kushikulu, shikaho vayinongeselele.+
16 Ngocho tunakulweze ove mwangana utachikize ngwove, kachi nge eyi nganda navayitungulula nakukumisa kutunga jikembwe jayo, kaweshi kupwa nangolo* jakuyula vatu vamungalila yaMusali yaKalwijiko.”+
17 Jino mwangana atumine mazu ano kuli Lehume mukulwane wavilolo jafulumende, naShimishai muka-kusoneka, namasepa javo vaze vatwaminenga muSamaliya, namungalila yaMusali yaKalwiji ngwenyi:
“Menekenu mwane!
18 Mukanda mwangutuminanga vanautange lyehi* kumeso ami.
19 Ngwalwezanga vatu vahehwojole hachihande kana, kaha vanawane ngwavo putu vene kushikulu vatu vamunganda kana vanafumbukilanga vamyangana, vanalikangenga kuli vakiko nakuhokolanga jishimbi.+
20 Munganda yaYelusalema mwapwilenga vamyangana vangolo vaze vayulilenga nangalila yosena yaMusali yaKalwiji, kaha vatu vavahanyinenga mitelo, namilambu, najimbongo jamikwakwa.
21 Shikaho kandenu vatu kana valitwamine kuzata milimo, kanda navatungulula nganda kanako palanga nomu nangukahana lushimbi.
22 Kanda namulangisako kuchina mwangana mwavindama.”+
23 Omu mukanda uze wafumine kuli Mwangana Alatakaseleke vakumishile kuutanga kumeso aLehume, naShimishai muka-kusoneka namasepa javo, hahaze vene vayile kuli vaYuleya kuYelusalema nakuvakanyisa kuzata mulimo.
24 Ngocho mulimo wakutunga zuvo yaKalunga yize yapwile muYelusalema wemanyine. Wemanyine lika palanga namumwaka wamuchivali wachiyulo chaNdaliu mwangana waPeleja.+
Kwinyikila Chamwishi
^ Hepe., “kutondatondanga.”
^ Hepe., “nakuzeyesa mavoko avo vazeneke.”
^ Chipwe pamo, “vausonekele muchiAlamayiki, kaha vawalumwine jino.”
^ Chipwe “yaMusali yaYufwalate.”
^ Alamayi., “nachazano.”
^ Chipwe pamo, “vanawalumuna lyehi nakuutanga.”
