Ezela 5:1-17
5 Jino kapolofweto Hangai,+ nakapolofweto Zekaliya+ muzukulu lyaIto+ vapolofwetele kuli vaYuleya vaze vapwile muYuta namuYelusalema. Vapolofwetele mulijina lyaKalunga kaIsalele uze apwilenga navo.
2 Ngocho Zeluvavele+ mwanaSheyalachele, naYeshuwa+ mwanaYehozatake vaputukile cheka kutungulula zuvo yaKalunga+ yize yapwile muYelusalema. Kaha vapolofweto jaKalunga vapwilenga navo nakuvakundwiza.+
3 Halwola luze, Tatenai nguvulu wangalila yaMusali yaKalwiji,* naShetale-mbozenai, namasepa javo vejile kuli vakiko nakuvehula ngwavo: “Iya namitavisa kutunga yino zuvo najikembwe jayo?”
4 Vavehwile cheka ngwavo: “Malunga vaze vali nakutunga yino zuvo majina avo vakiko veya?”
5 Oloze Kalunga apwilenga* navaze vakulwane javaYuleya,+ kaha kavavahonesele kuzatako palanga nomu vatumine mazu kuli Ndaliu, nomu Mwangana Ndaliu atumine mukanda wakuvakumbulula.
6 Awa akiko mazu apwile mumukanda uze Tatenai nguvulu wangalila yaMusali yaKalwiji, naShetale-mbozenai, namasepa jenyi, namihato javanguvulu vangalila yaMusali yaKalwiji vatumine kuli Mwangana Ndaliu.
7 Vatumine mazu ano kuli ikiye, vasonekele ngwavo:
“Kuli Mwangana Ndaliu:
“Kuunda chipwenga nayove.
8 Ove mwangana, tachikiza ngwove twayanga kungalila yakuYuta, kuzuvo yaKalunga wamunene, kaha twawananga vali nakuyitunga namalolwa amanene, kaha jikembwe nawa vali nakujala namyalachi. Mulimo kana vali nakuuzata natwima, nangolo, kaha uli nakuzovoloka.
9 Twahanjikanga navakulwane javaYuleya nakuvehula ngwetu: ‘Iya namitavisa kutunga yino zuvo najikembwe jayo?’+
10 Twavehulanga nawa majina avo mangana tukulweze majina avaze vali nakutwaminyina mulimo kana.
11 “Oloze vakiko vatukumbululanga ngwavo: ‘Etu tunapu tuvangamba jaKalunga wamelu namavu. Tuli nakutungulula zuvo vatungile kunyima, yize vatungile kuli mwangana wamunene wavaIsalele.+
12 Oloze hakuwana nge vakakuluka jetu vevwishile Kalunga wamelu+ kupihya, ngocho avahanyine mumavoko aNevukataneza,+ mwangana waMbavilone uze kaKalateya. Kaha ikiye apuzwile yize zuvo+ nakutwala vatu muufunge muMbavilone.+
13 Jino mumwaka wakulivanga wachiyulo chaKuluse mwangana waMbavilone, Mwangana Kuluse ahanyine lushimbi lwakutungulula yize zuvo yaKalunga.+
14 Kaha Mwangana Kuluse afumishile vyuma vyaulu, napalata vyamuzuvo yaKalunga vize vyapwile mutembele yamuMbavilone, vize ambachile Nevukataneza mutembele kuYelusalema nakuvitwala mutembele yamuMbavilone.+ Kaha Kuluse avihanyine kuli Sheshevazale*+ uze atongwele kupwa nguvulu.+
15 Jino Kuluse ambile kuli ikiye ngwenyi: “Mbata evi vyuma uyenga navyo, ukavihake mutembele kuYelusalema, kaha zuvo yaKalunga vakayitungulwile hachihela haze yapwile hakavanga.”+
16 Omu Sheshevazale ejile kuno, alile vihela vyazuvo yaKalunga+ muYelusalema. Kaha kufuma vene haze vachili lika nakuyitunga, oloze kanda yichikume.’+
17 “Shikaho kachi nge chinapu chakwolola kuli ove mwangana, yitavisa vatu vahehwojole muzuvo yamwangana yakulamina vikumba muMbavilone mangana vawane numba nge Mwangana Kuluse asonekele lushimbi lwakutungulula zuvo yaKalunga muYelusalema.+ Kahove mwangana utulweze omu nauvatwila chihande kanechi.”
