Ezela 6:1-22
6 Jino mwangana Ndaliu ahanyine lushimbi, kaha vahehwojwele muzuvo valaminyinenga mijimbu yakushikulu, muze vahakilenga vyuma vyavilemu muMbavilone.
2 Kaha vawanyine mukanda wakuvunga muzuvo yakukola yakuEkevatana mungalila yaMete. Mumukanda kana mwapwile mazu akwamba ngwavo:
3 “Mumwaka watete wachiyulo chaMwangana Kuluse, Mwangana Kuluse ahanyine lushimbi lwakutalisa kuzuvo yaKalunga muYelusalema ngwenyi:+ ‘VaYuleya vakatungulule zuvo mangana vakahanyinengamo mawana, kaha vihela vyayo nawa vakavyale kanawa. Kujindama chavyo chikapwe jikuvite 60,* kaha mukutohwa chavyo vikapwe jikuvite 60.+
4 Vakayitunge namikana yamalolwa amanene yitatu, namukana umwe wavitondo,+ kaha jimbongo jakuzachisa jikafume kuzuvo yamwangana.+
5 Kaha nawa vyuma vyaulu napalata vyamuzuvo yaKalunga vize Nevukataneza ambachile mutembele kuYelusalema nakuvineha muMbavilone,+ vakavikindulwise muzuvo yaKalunga+ nakuvihaka muze vyapwile mutembele kuYelusalema.’
6 “Shikaho ove Tatenai nguvulu wangalila yaMusali yaKalwiji,* nayove Shetale-mbozenai navakwenu vaze vapwa mihato javanguvulu vamungalila yaMusali yaKalwiji,+ fumenuko kuchihela kana.
7 Kanda namuhonesa mulimo wakutunga zuvo yaKalungako. Nguvulu wavaYuleya, navakulwane javo navatungulula zuvo yaKalunga hachihela haze yapwile.
8 Shikaho nangumilweza vyuma mwatela kulingila vakulwane javaYuleya kutalisa kumulimo wakutungulula zuvo yaKalunga. Mbatenu jimbongo jamitelo kuzuvo yamwangana yakulamina vikumba+ jize veji kuhananga vatu vamungalila yaMusali yaKalwiji mujihane kuli ovo malunga mangana vatwaleho lika nakuzata mulimo kana.+
9 Vahanenunga nawa vyeshovyo vali nakusaka, chipwe mavuvu javangombe vavakuji,+ chipwe vizamba jamikoko,+ chipwe vana vamikoko+ vakulumba kuli Kalunga wamwilu, chipwe unga watiliku,+ namungwa,+ navinyo,+ namaji+ nge kutesa nomu navamilweza vapilishitu muYelusalema. Vahanenungavyo hakumbi hakumbi,
10 mangana vahanenga mawana akwivwisa Kalunga wamelu kuwaha nakulombelangako mwangana navana venyi vayoyenga lika.+
11 Ngunahane nawa lushimbi lwakuvuluka nge weshowo mwalikanga kulushimbi kana, vakasomone mwalachi hazuvo yenyi, vakamuzundule nakumusukikaho,* kaha zuvo yenyi navakayitenga kupwa chimbushu* chavatu vavavulu.
12 Kaha Kalunga ou nalingisa lijina lyenyi lipwenga muchihela kana,+ akakatumune weshowo mwangana chipwe mutu mwahokola lushimbi elu nakupuzula zuvo yaKalunga muYelusalema. Ami Ndaliu ngunakase lushimbi elu, shikaho lukavangizenu chakuzeneka kulangisa.”
13 Kaha Tatenai nguvulu wangalila yaMusali yaKalwiji, naShetale-mbozenai+ namasepa javo, valingile vyuma vyosena vize ahanjikile mwangana Ndaliu.
14 Ngocho vakulwane javaYuleya vatwalileho lika nakutunga, kaha mulimo wazovolokelenga+ mwomwo kapolofweto Hangai+ naZekaliya+ muzukulu lyaIto vavakolezezele namazu aupolofweto. Vakumishile kutunga yize zuvo nge kutesa namazu ahanjikile Kalunga kaIsalele,+ naKuluse,+ naNdaliu,+ naAlatakaseleke+ mwangana waPeleja.
15 Yize zuvo vayikumishile kuyitunga halikumbi lyamuchitatu lyakakweji waAtale,* mumwaka wakusokesa 6 wachiyulo chaMwangana Ndaliu.
16 Ngocho vaIsalele, navapilishitu, navaLevi,+ navosena vaze vafumine muufunge vawahililile chikuma nakukunjika zuvo yaKalunga.
17 Hakukunjika zuvo yaKalunga, vatu vahanyine vangombe vavakuji 100, navizamba jamikoko 200, navana vamikoko 400 kupwa wana. Vahanyine nawa vizamba javapembe 12 kupwa wana wahashili wahali vaIsalele vosena nge kutesa nakuvula chamiyachi yavaIsalele.+
18 Kaha vatongwele vapilishitu mumazavu avo, navaLevi nawa mumazavu avo mangana vazatenga milimo yaKalunga muYelusalema+ nge omu vasoneka mumukanda waMose.+
19 Vaze vafumine muufunge valingile Paseka halikumbi lyakusokesa 14, mukakweji watete.+
20 Vapilishitu navaLevi vosena valitomesele,+ kaha vosena vapwile hivanatomo lyehi. Ngocho vajihile chimuna wakuvatula waPaseka wavatu vosena vaze vafumine muufunge, navakwavo vapilishitu, navavene.
21 Jino vaIsalele vaze vafumine muufunge, navatu vaze valifutwile navo nakulihenda kuvyuma vyaunyengwe vyavaka-mafuchi mangana valemese* Yehova Kalunga kaIsalele+ valile uze chimuna.
22 Vawahililile nakulinga Chiwanyino chaJimbolo Jakuzeneka Chimbalwila+ hamakumbi 7, mwomwo Yehova ikiye avalingishile vawahilile nakuvwovuwisa nawa muchima wamwangana waAsulya avevwile uselewa,+ nakuvakafwa* mulimo wakutungulula zuvo yaKalunga wamuchano, Kalunga kaIsalele.
Kwinyikila Chamwishi
^ Kafwe jimita 26.7. Tala Chihande B14.
^ Chipwe “yaMusali yaYufwalate.”
^ Chipwe pamo, “kwakumbilila swali; chishita chatuji.”
^ Chipwe “nakumupapalilaho.”
^ Tala Chihande B15.
^ Hepe., “vatondetonde.”
^ Hepe., “nakukolezeza mavoko avo.”
