Ezela 7:1-28
7 Omu vyakumine vyumevi, Ezela*+ akindulukile kufuma kuMbavilone halwola ayulilenga Alatakaseleke+ mwangana waPeleja. Ezela apwile mwanaSelaya,+ Selaya mwanaAzaliya, Azaliya mwanaHilikiya,+
2 Hilikiya mwanaShalume, Shalume mwanaZatoke, Zatoke mwanaAhituve,
3 Ahituve mwanaAmaliya, Amaliya mwanaAzaliya,+ Azaliya mwanaMelayote,
4 Melayote mwanaZelahiya, Zelahiya mwanaUji, Uji mwanaMbuki,
5 Mbuki mwanaAvishuwa, Avishuwa mwanaFwinehase,+ Fwinehase mwanaEleyaza,+ Eleyaza mwanakapilishitu wamukulwane Alone.+
6 Ezela akindulukile kufuma kuMbavilone. Apwile muka-kunungulula mazu* uze atachikijile chikuma Jishimbi jaMose+ jize Yehova Kalunga kaIsalele avahanyine. Mwangana ahanyine Ezela vyuma vyosena vize alombele, mwomwo livoko lyaYehova Kalunga kenyi lyapwilenga hali ikiye.
7 Ngocho vaIsalele vamwe, navapilishitu, navaLevi,+ navaka-kwimba,+ navaka-kulama kuvikolo,+ navangamba vakutembele*+ vayile kuYelusalema mumwaka wakusokesa 7 wachiyulo chaMwangana Alatakaseleke.
8 Ezela ahetele kuYelusalema mukakweji wamuchitanu mumwaka wakusokesa 7 wachiyulo chaMwangana Alatakaseleke.
9 Akatukile kuMbavilone halikumbi lyatete lyakakweji wakulivanga, kaha ahetele kuYelusalema halikumbi lyatete lyakakweji wamuchitanu mwomwo livoko lyaKalunga kenyi lyapwile hali ikiye.+
10 Ezela alizangile mumuchima wenyi mangana ahehwojole Jishimbi jaYehova nakujikavangiza,+ mangana anangule jindongi namazu akuyula muli vaIsalele.+
11 Awa akiko mazu apwile mumukanda uze Mwangana Alatakaseleke ahanyine kapilishitu Ezela uze apwile muka-kunungulula mazu,* kuluwa mukulinangula jishimbi jaYehova najindongi jenyi ahanyine vaIsalele:
12 *“Ami Alatakaseleke+ mwangana wavamyangana, ngunasoneka mukanda kuli ove kapilishitu Ezela, muka-kunungulula* Jishimbi jaKalunga wamelu: Kuli ove kupwenga kuunda.
13 Ngunahane lushimbi ngwami vaIsalele vosena vali muwangana wami, navapilishitu javo, navaLevi vaze vali nakusaka kuya nayove kuYelusalema, vayenga tuhu.+
14 Mwomwo ami mwangana navatu jami 7 vaka-kungulweza mangana tunakutumu mangana ukamone numba nge vatu muYuta namuYelusalema vali nakukavangiza Jishimbi jaKalunga kove jize uli najo,*
15 kaha utwale nawa palata naulu ngunahane ami mwangana navaka-kungulweza mangana kuli Kalunga kaIsalele ukwechi zuvo yenyi muYelusalema,
16 napalata yosena, naulu wosena unatambula* mungalila yaMbavilone yosena, nawana uze vanahane vatu, navapilishitu kuzuvo yaKalunga kavo yize yili kuYelusalema.+
17 Kaha jimbongo eji ukajilande vangombe vavakuji,+ navizamba jamikoko,+ navana vamikoko+ vaze naukahanyina kumwe nawana wamanona,+ nawana wavinyo.+ Vimuna kana ukavalumba halijiko lyakulumbila lyakuzuvo yaKalunga kenu muYelusalema.
18 “Kaha palata naulu yize nayikasalaho mukayizachisa navandumbwove mweshomwo namukamona ngwenu mwamwaza kweseka nomu mwaya muchima waKalunga kenu.
19 Kaha vinoma vyosena vize vanakuhane vyakuzachisa kuzuvo yaKalunga kenu ukavitwala kumeso aKalunga muYelusalema.+
20 Vyeshovyo navikasakiwa kuzuvo yaKalunga kove vize watela kukahana, ukavimbata kufuma kuzuvo yamwangana yakulamina vikumba.+
21 “Ami Mwangana Alatakaseleke ngunahane lushimbi kuli vaka-kulama luheto mungalila yaMusali yaKalwiji* ngwami, vyeshovyo kapilishitu Ezela,+ muka-kunungulula* Jishimbi jaKalunga wamelu mwakasaka kuli enu, kamuhanenuvyo washiwashi.
22 Kamuhanenu jitalende* japalata 100, najikole* jatiliku 100, najimbate* javinyo+ 100, najimbate jamaji+ 100, namungwa+ wauvulu.
23 Vyeshovyo mwakamilweza Kalunga wamelu+ kuzata kuzuvo yenyi, kavizatenu natwima kuchina mwakakwachila matoto vana vamwangana navatu vamuwangana wenyi.+
24 Kamwatela nawa kukatambula mitelo, namilambu,+ najimbongo jamikwakwa kuli vapilishitu, navaLevi, navaka-kwimba visaji,+ navaka-kulama kuvikolo, navangamba vakutembele,*+ navaka-kuzachila kuzuvo yaKalungako.
25 “Ngocho ove Ezela, kweseka namangana vakuhana kuli Kalunga kove,* katongole vaka-kusopa milonga, navaka-kuyula mangana vakayule vatu vosena vamungalila yaMusali yaKalwiji, navatu vosena vaze vatachikiza jishimbi jaKalunga kove. Ukanangula nawa jishimbi kana kuli vatu vaze kavajitachikizako.+
26 Weshowo mwakazeneka kukavangiza Jishimbi jaKalunga kove najishimbi jamwangana vakamusopese hahaze vene nakumujiha, chipwe kumuhanga mulifuchi, chipwe kumukukisa jimbongo, chipwe kumukasa mukamenga.”
27 Vamwalisenga Yehova Kalunga kavakakuluka jetu uze nahake vishinganyeka kanevi mumuchima wamwangana mangana awahise zuvo yaYehova muYelusalema.+
28 Kalunga nangusolwela zangi yakwilila kumeso amwangana+ nakuli vatu jenyi vaka-kumulweza mangana,+ nakuli vilolo jenyi vavalemu vosena. Shikaho ngwakwachile ngolo* mwomwo livoko lyaYehova Kalunga kami lyapwile hali ami, kaha ngwakungulwile vatwamina muli vaIsalele vezenga nayami hamwe.
Kwinyikila Chamwishi
^ Ulumbunwiso, “Kukafwa.”
^ Chipwe “muka-kusoneka.”
^ Chipwe “navaNechine.” Hepe., “ava vakuhana.”
^ Chipwe “muka-kusoneka.”
^ Chipwe “muka-kusoneka.”
^ Alamayi., “jili mulivoko lyove.”
^ Alamayi., “unawane.”
^ Chipwe “yaMusali yaYufwalate.”
^ Chipwe “muka-kusoneka.”
^ Mbate yimwe yapwile jilita 22. Tala Chihande B14.
^ Kole yimwe yapwile jilita 220. Tala Chihande B14.
^ Talende yimwe yapwile jikilongalamu 34.2. Tala Chihande B14.
^ Chipwe “navaNechine.” Hepe., “ava vakuhana.”
^ Alamayi., “kweseka namangana aKalunga kove aze ali mulivoko lyove.”
^ Chipwe “ngwalikolezezele.”
