Ezela 8:1-36
8 Ava vakiko vatwamina vakujizuvo javakakuluka javaIsalele kweseka najitanga javo, vaze vejile nayami hamwe kufuma kuMbavilone halwola ayulilenga Mwangana Alatakaseleke:+
2 Kuli vana vaFwinehase+ kwafumine Ngeleshome, kuli vana vaItamale+ kwafumine Ndanyele, kuli vana vaNdavichi kwafumine Hatushe.
3 Kuli vana vaShekanyiya, vakuli vana vaPaloshe kwafumine Zekaliya, kaha apwile namalunga 150 vaze valavilile kuli ikiye.
4 Kuli vana vaPahate-mowave+ kwafumine Eliyehowenai mwanaZelahiya, kaha apwile namalunga 200 vaze valavilile kuli ikiye.
5 Kuli vana vaZatu+ kwafumine Shekanyiya mwanaYahajele, kaha apwile namalunga 300 vaze valavilile kuli ikiye.
6 Kuli vana vaAchine+ kwafumine Evete mwanaYonatane, kaha apwile namalunga 50 vaze valavilile kuli ikiye.
7 Kuli vana vaElame+ kwafumine Yeshaya mwanaAtaliya, kaha apwile namalunga 70 vaze valavilile kuli ikiye.
8 Kuli vana vaShefwachiya+ kwafumine Zevachiya mwanaMikayele, kaha apwile namalunga 80 vaze valavilile kuli ikiye.
9 Kuli vana vaYowave kwafumine Ovachiya mwanaYehyele, kaha apwile namalunga 218 vaze valavilile kuli ikiye.
10 Kuli vana vaMbanyi kwafumine Shelomite mwanaYoshifwiya, kaha apwile namalunga 160 vaze valavilile kuli ikiye.
11 Kuli vana vaMbevai+ kwafumine Zekaliya mwanaMbevai, kaha apwile namalunga 28 vaze valavilile kuli ikiye.
12 Kuli vana vaAzangate+ kwafumine Yohanane mwanaHakatane, kaha apwile namalunga 110 vaze valavilile kuli ikiye.
13 Kaha kuli vana vaAtonyikame,+ vaze vapwile vamakumishilo kwafumine malunga ava: Elifwelete, naYeyele, naShemaya, kaha vapwile namalunga 60 vaze valavilile kuli vakiko.
14 Kuli vana vaMbingivai+ kwafumine Utai naZavute, kaha vapwile namalunga 70 vaze valavilile kuli vakiko.
15 Ngwavakungulwilile kukalwiji uze aya kuAhava,+ kaha twatungile chilombo kuze nakutwamako makumbi atatu. Oloze omu ngwakekesele halizavu lyavatu navapilishitu, kangwawanyineho vaLeviko.
16 Ngocho ngwasanyikile Eliyeze, naAlyele, naShemaya, naElenatane, naYalive, naElenatane, naNatane, naZekaliya, naMeshulame vaze vapwile vatwamina javatu. Ngwasanyikile nawa Yoyalive naElenatane vaze vapwile vaka-kunangula.
17 Kaha ngwavatumine vayenga kuli Ito uze apwile twamina wakuKashifwiya. Ngwavatumine vakamulweze navandumbwenyi vaze vapwile vangamba vakutembele* kuKashifwiya mangana vatunehele vaka-kuzachila kuzuvo yaKalunga.
18 Hakuwana nge livoko lyaKalunga lyapwilenga hali etu, ngocho vatunehelele lunga wakuzangama, wakuli vana vaMali+ muzukulu lyaLevi mwanaIsalele. Lijina lyenyi apwile ikiye Sheleviya,+ ejile navana venyi navandumbwenyi, vosena vapwile malunga 18.
19 Vatunehelele nawa Hashaviya, kaha ejile naYeshaya wakuli vaMelali,+ navandumbwenyi navana vavo, vosena vapwile malunga 20.
20 Kuli vangamba vakutembele* vaze Ndavichi navilolo jenyi vatongwele mangana vazachilenga vaLevi, kwafumine vangamba 220, kaha vosena ava vavasonekele majina avo.
21 Ngwavilikile lwola lwakulijilika kulya kuze kukalwiji Ahava mangana tulinyise kumeso aKalunga ketu, tumulombe atutwaminyine muungeji wetu navana vetu navikumba vyetu.
22 Mwomwo ngwevwile sonyi kulomba mwangana atuhane maswalale, navaka-kutambukila hatuvalu mangana vatukinge kuli vaka-kole muungeji wetu, hakuwana nge twahanjikile lyehi kuli mwangana ngwetu: “Livoko lyaKalunga lili hali vaze veji kumusakasakanga,+ oloze eji kukwachilanga matoto vaze navamuseza.”+
23 Ngocho twalijilikile kulya, twamulembelelele Kalunga, kaha evwililile kukulembelela chetu.+
24 Kaha ngwasakwile vakulwane javapilishitu 12, majina avo vakiko Sheleviya naHashaviya,+ navandumbwavo 10.
25 Kaha ngwavapezalishilile kulema chapalata, naulu, navinoma vyakuzachisa. Ou wapwile wana uze mwangana navaka-kumulweza mangana, navilolo jenyi, navaIsalele vosena vahanyine kuzuvo yaKalunga ketu.+
26 Ngwapezalishile palata kaha yapwile jitalende* 650, vinoma vyapalata 100 vyapwile jitalende jivali, ulu wapwile jitalende 100,
27 viloso vyavindende 20 vyaulu vyapwile jindalike* 1,000, kaha vinoma vivali vyaunengu uchiluluka, vyapwile nandando nge ulu.
28 Jino ngwavalwezele ngwami: “Enu munapu muvajila kuli Yehova,+ navinoma nawa vinapu vyajila. Kaha palata naulu vinapu wana vanahane mukulisakila kuli Yehova Kalunga kavakakuluka jenu.
29 Vilamenunga kanawa palanga nomu namukavipezalisa kumeso avakulwane javapilishitu navaLevi, navamyata vakujizuvo javakakuluka javaIsalele mutupete vakulila vakuzuvo yaYehova muYelusalema.”+
30 Ngocho vapilishitu, navaLevi vambachile yize palata, naulu, navinoma vyakuzachisa vize vapezalishile kumeso avo mangana vavitwale kuzuvo yaKalunga kuYelusalema.
31 Twakatukile kuze kukalwiji Ahava+ halikumbi lyakusokesa 12, mukakweji wakulivanga+ nakuya kuYelusalema. Livoko lyaKalunga lyapwilenga hali etu, kaha atuyowele kuli vaka-kole jetu, nakuli vaka-kutuswaminyina mujila.
32 Twahetele kuYelusalema,+ kaha twatwamine makumbi atatu.
33 Jino halikumbi lyamuchiwana, twapezalishile yize palata, naulu, navinoma muzuvo yaKalunga ketu,+ kaha twavihanyine kuli Melemote+ mwanakapilishitu Uliya. Melemote apwile hamwe naEleyaza mwanaFwinehase, kaha vapwile naYozavate+ mwanaYeshuwa, naNowachiya mwanaMbinuwi+ vaze vapwile vaLevi.
34 Vyuma vyosena vavilavile nakuvipezalisa, kaha vasonekele pezu yavyo.
35 Vaze vafumine muufunge vahanyine vimuna vakulumba kuli Kalunga kaIsalele. Vahanyine vangombe vavakuji+ 12 hali vaIsalele vosena, navizamba jamikoko+ 96, namisamba jamikoko 77, navizamba javapembe+ 12 vawana wahashili. Vimuna vosena ava vapwile wana wakulumbila Yehova.+
36 Kaha twahanyine jishimbi jamwangana+ kuli vasatalape* jamwangana, nakuli vanguvulu vangalila yaMusali yaKalwiji,*+ kaha vakafwilenga vatu, nakukafwa nawa kuzuvo yaKalunga wamuchano.+
Kwinyikila Chamwishi
^ Chipwe “vaNechine.” Hepe., “ava vakuhana.”
^ Chipwe “vaNechine.” Hepe., “ava vakuhana.”
^ Talende yimwe yapwile jikilongalamu 34.2. Tala Chihande B14.
^ Ndalike yapwile lumbongo lwaulu lwachichele lwavaPeleja. Tala Chihande B14.
^ Vulukiso kana yalumbununa ngwavo, “vaka-kukinga wangana.” Hano yili nakutalikisa kuli vanguvulu vajingalila jamuWangana waPeleja.
^ Chipwe “yaMusali yaYufwalate.”
