Ezela 9:1-15
9 Omu vyakumine vyumevi, vamyata vapandamine kuli ami nakwamba ngwavo: “VaIsalele, navapilishitu, navaLevi kavalihandunwine kuli vaka-mafuchi nakulihenda kuvilinga vyavo vyaunyengweko.+ Vaka-mafuchi kana shina vaKanane, navaHete, navaPeliji, navaYevuse, navaAmone, navaMowave, navaEjipitu,+ navaAmole.+
2 Mwomwo vanambate vana vavaka-mafuchi eka kupwa mapwevo javo, nakumbachila nawa vana vavo vamalunga mapwevo vavaka-mafuchi eka.+ Ngocho ava vaka-tanga*+ yajila vanalifutula navaka-mafuchi eka.+ Kaha vamyata namihato javatwamina vakiko vanapunga vandundumutete muvilinga kanevi vyakuhenga.”
3 Jino omu ngwevwile chuma kana, ngwapihililile nakupula uvwalo wami nandeleji yami yakuzeneka mavoko, ngwalitukwile jikambu jami nawevu wami, kaha ngwatwamine nakulihomokela.
4 Kaha navatu vaze vavumbikilenga mazu aKalunga kaIsalele valikungulwilile kuli ami mwomwo vatu vaze vafumine muufunge kavashishikileko. Ngwatwamine nakulihombokela palanga nakulwola vahanyinenga wana wamanona+ wachingoloshi.
5 Halwola kanelu lwakuhana wana wamanona+ wachingoloshi, ngwakatukile nauvwalo wami nandeleji yami yakuzeneka mavoko yakupulika hachihela haze ngwatwamine oku ngunalihombokela. Kaha ngwafukamine hamambuli nakwolola mavoko ami kuli Yehova Kalunga kami.
6 Ngwambile ngwami: “Ove Kalunga kami, ngunevu sonyi hakwandula meso ami kuli ove mwomwo jishili jetu jinavulu chikuma, kaha milonga yetu yinahete namwilu.+
7 Kufuma kumakumbi avakakuluka jetu nakuheta kulelo, milonga yetu yinatoho chikuma.+ Hakuwana nge twalingile jishili, shikaho etu navamyangana jetu, navapilishitu jetu, vatuhanyine mumavoko avamyangana javaka-mafuchi eka vatujihe najipoko jamikwale,+ nakututwala muufunge,+ nakutupupa,+ nakutusaula nge omu chili oholili.+
8 Oloze ove Yehova Kalunga ketu munahichi jino kapyapya kakandende kaha kufuma halwola unatwivwila uselewa nakutusuula etu twasalileho tukinduluke, nakutuhana chihela chakukingiwa muchihela chove chajila+ mangana tuwahilile, tulihizumuneko chachindende omu tunafumu muundungo.
9 Numba tuhu twapwile tuvandungo,+ oloze ove Kalunga ketu kawatusuvililile muundungo wetuko. Watusolwelele zangi yove yakwilila kumeso avamyangana javaPeleja+ mangana tuhizumuke, tukatule zuvo yove+ nakuyitungulula cheka, mangana utukinge* muYuta namuYelusalema.
10 “Ngocho jino nanguhanjika ika ove Kalunga ketu? Mwomwo etu tunaseze jishimbi jove,
11 jize watuhanyine kuhichila muli vangamba jove vapolofweto ngwove: ‘Lifuchi lize namuheta linapu hilifuchi lyalipi, mwomwo vatu vatwamamo vapwa vavilinga vyavipi, kaha vanalizalisa navilinga vyaunyengwe kufuma kusongo yimwe nakuya kusongo yikwavo.+
12 Ngocho kanda namukahangisa vana venu vamapwevo kuli vana vavo vamalunga, chipwe kumbachila vana venu vamalunga vana vavo vamapwevoko.+ Kanda namukalikasa chivwasano chakuunda navakiko nakufwila chiyoyelo chavoko,+ mangana mukakwate ngolo nakukalya vyuma vyamwaza vyamulifuchi lize, mukalihete nakulisela vana venu mangana vakatwamengamo haya myaka yosena.’
13 Numba tuhu tunamono vihuli havilinga vyetu vyavipi, nahamilonga yetu yayinene, oloze ove Kalunga ketu kawatuzangamishile nge kutesa najishili jetuko.+ Unatwitavisa etu vamwe tukinduluke,+
14 kaha tuhokole nawa jishimbi jove nakulimbachila navatu vakumafuchi eka vaze veji kulinganga vyuma kanevi vyaunyengwe.+ Uno kaweshi kutukwachila matoto nakutunongesa tuvosena chakuzeneka kusezaho vamweko nyi?
15 Ove Yehova Kalunga kaIsalele, ove unapu uwakwoloka,+ mwomwo unatusezeho nakulikumbi lyalelo. Shikaho tuneza kumeso ove najishili jetu, mwomwo kachatela kuli etu kwimana kumeso oveko.”+
