Hambakuke 1:1-17
1 Ami kapolofweto Hambakuke* vangumwenesele mazu awa muchakumwenesa, kaha ngwambile ngwami:
2 Ove Yehova, nangutwanga kawelele palanga nakumwaka uka chakuzeneka ove kungwivwa?+Nangukulombanga ungupululule kuulyanyi palanga nakumwaka uka chakuzeneka ove kungukafwa?*+
3 Ikaze weji kungulingishilanga ngutale vyuma vyavipi?Ikaze weji kwitavishilanga luyanjisa?Ikaze nguli nakumwena lwenyeka naulyanyi?Mwomwo ika vikokojola najindombo vinavulila ngana?
4 Jishimbi vanajizeyesa,Kakweshi chiyulo chakwolokako.Mwomwo vaka-kuhuka vali nakushinyinyika vaka-kwoloka.Shikaho vanahingikila chiyulo.+
5 “Talenu muli vaka-mafuchi mumone.Likomokelenu, fwenu chishima.Kumakumbi enu nakukasoloka vyuma vimwe,Kaha kamweshi kuvitavilako numba tuhu navamilwezavyo.+
6 Nangukatula vaKalateya,+Vaka-lifuchi lyaukenya, vakwechi michima yakulusuka.Veji kuhitangananga mungalila yayinene hamavuMangana vatambule membo aze kaweshi avoko.+
7 Veji kwivwisanga vatu woma nakuvazuzwisa.Veji kulitungilanga chiyulo chavo nakulihana wata* vavene.+
8 Tuvalu twavo vapwa vajimbushi kuhambakana visupa,Kaha veji kwivwisanga woma kuhambakana tungunge naufuku.+Tuvalu twavo vajita veji kulahanga chikuma.Tuvalu twavo veji kufumanga kwakusuku.Veji kulupukanga jimbushi nge ngonga uze mwahukula chuma alyenga.+
9 Veji kwizanga nakulinga vyuma vyaulyanyi.+Veji kulikungulwilanga hamwe nakuya, nge peho yakumututuko.+Veji kukungululanga vafunge nge omu navakungulula usekeseke.
10 Veji kutolekanga vamyangana,Veji kusehanga vilolo.+Veji kulumbilisanga vihela vyakukingiwa vyosena.+Kaha veji kuvilundwilanga milundu yamavu mangana vavitambule.
11 Shikaho navakahita mulifuchi nge peho.Oloze navakapwa namulonga,+Mwomwo veji kuvumbikanga kalunga kavo hangolo javo.”*+
12 Ove Yehova, ove unapungako haya myaka yosena.+Ove Kalunga kami, ove wami Wajila, kawafwako.*+Ove Yehova, watongwele vaKalateya mangana vasopese vatu.Ove Lilolwa lyami,+ wavasakwile mangana vazangamise* vatu.+
13 Ove wapwa utoma, kaha kaweshi kumona vyuma vyavipiko,Kaweshi kwechelela vilinga vyakuhukako.+Nyi ikaze weji kwechelelanga vaka-kumbembejeka?+Ikaze weji kuholelanga kulu omu muka-kuhuka mwamina mutu wakwoloka uze namuhambakana ikiye?+
14 Ikaze weji kulingisanga vatu vapwenga nge vaishi vamukalungalwiji,Nge vyuma vyakuhalala hamavu vize kavyatwama namuka-kuviyulako?
15 Veji* kulovanga vatu vosena naulovo,Veji kuvakwatanga mulyoji lyavo,Veji kuvakuchikilanga mulyoji lyavo lyachikokela.Shikaho veji kuwahililanga chikuma.+
16 Shikaho veji kulumbilanga lyoji lyavo vimuna vakuvatula,Nakuhana lyoji lyenyi lyachikokela vimuna vakuvatula.*Mwomwo vyuma kana vyeji kuvapichisanga,Kaha vyeji kuvalingisanga valyenga kanawa.
17 Kutala mwafumisa vyuma vili halyoji lyenyi numba?*Kutala mwajiha vaka-mafuchi chakuzeneka kuvevwila keke nyi?+
Kwinyikila Chamwishi
^ Kulumbununa pamo, “Kulipakata chaTwima.”
^ Chipwe “kungulwila.”
^ Chipwe “nakulihana ulemu.”
^ Chipwe pamo, “Mwomwo ngolo javo jikiko kalunga kavo.”
^ Chipwe pamo, “katweshi kufwako.”
^ Chipwe “vahanjikile.”
^ Kulumbununa, vaka-kole, vaKalateya.
^ Chipwe “vimuna vakuvatula mangana vakakumuke wishi.”
^ Chipwe pamo, “Kutala mwasolomona poko yenyi yamukwale numba?”