Hangai 2:1-23
2 Mukakweji wakusokesa 7, halikumbi lyakusokesa 21 lyakakweji kana, Yehova ahanjikile kuhichila muli kapolofweto Hangai+ ngwenyi,
2 “Ihula nguvulu waYuta,+ Zeluvavele+ mwanaSheyalachele, nakapilishitu wakulitulaho Yoshuwa+ mwanaYehozatake,+ navatu vosena ngwove:
3 ‘Iya hali enu amwene omu wapwile upahu wazuvo* eyi hakavanga?+ Nyi oholili yili nakusoloka ngachilihi? Uno kayakuminyinemo hakuyesekesa nomu yapwile hakavangako nyi?’+
4 “Yehova nambe ngwenyi, ‘Ove Zeluvavele, likolezeze. Kahove kapilishitu wakulitulaho Yoshuwa mwanaYehozatake, likolezeze.’
“Yehova nambe ngwenyi, ‘Enu vatu vamulifuchi muvosena,+ likolezezenu muzate milimo.’
“‘Mwomwo ami nguli nayenu.’+ Omu mukiko mwanambe Yehova wamayongomena.
5 ‘Anukenu vyuma ngwamishikile omu ngwamilowele muEjipitu.+ Shipilitu yami yichili hali enu.*+ Kanda namwivwa womako.’”+
6 “Yehova wamayongomena nambe ngwenyi, ‘Kalinwomu ngunyikise cheka melu, namavu, nakalungalwiji, natunda.’+
7 “Yehova wamayongomena nambe ngwenyi, ‘Nangunyikisa vaka-mafuchi osena, kaha vyuma vyandando yayinene* vyavaka-mafuchi osena naviza.+ Kaha nanguzalisa zuvo yino naupahu.’+
8 “Yehova wamayongomena nambe ngwenyi, ‘Palata yinapu yami, kaha ulu nawa unapu wami.’
9 “Yehova wamayongomena nambe ngwenyi, ‘Upahu uze naukapwa hazuvo yino naukahambakana uze wahakavanga.’+
“‘Kaha nangukaneha kuunda muchihela chino.’+ Omu mukiko mwanambe Yehova wamayongomena.”
10 Mumwaka wamuchivali wachiyulo chamwangana Ndaliu, mukakweji wakusokesa 9, halikumbi lyakusokesa 24 lyakakweji kana, Yehova ahanjikile kuli kapolofweto Hangai+ ngwenyi:
11 “Yehova wamayongomena nambe ngwenyi, ‘Ihula vapilishitu halushimbi elu ngwove:+
12 “Kachi nge mutu nambachila nyama yajila hauvwalo wenyi, kaha uze uvwalo wenyi naututa kumbolo, chipwe kuvyakulya vanateleka lyehi, chipwe kuvinyo, chipwe kumaji, chipwe kuvyeshovyo vyakulya, kutala vyuma kana navipwa vyajila nyi?”’”
Vapilishitu vamukumbulwile ngwavo: “Nduma.”
13 Jino Hangai avehwile ngwenyi: “Kachi nge mutu uze napihi hakututa kumujimba* wakufwa mwakwata vyumevi, kutala navipihya nyi?”+
Vapilishitu vamukumbulwile ngwavo: “Navipihya.”
14 Ngocho Hangai ambile ngwenyi: “Yehova nambe ngwenyi, ‘Omu mukiko vanapu ava vatu, omu mukiko unapu ou muyachi kumeso ami. Omu mukiko nawa yinapu milimo yamavoko avo yosena. Vyeshovyo navahana vinapu vyavipi.’
15 “‘Nyingililenu* chumechi kufuma likumbi lyalelo: Uno shimbu kanda lilolwa valitumbike halilolwa likwavo mutembele yaYehova,+
16 chapwile ngachilihi? Omu mutu ayile kumulumba wajimbuto jamanona nakufwelela ngwenyi mwawanako vyesekelo 20, akawanyineko vyesekelo 10 kaha. Omu mutu ayile kuze kwakulamina vinyo nakufwelela ngwenyi mwawanako vyesekelo 50, akawanyineko vyesekelo 20 kaha.+
17 Ngwamizangamishile, ngwenyekele milimo yamavoko enu namusana wakaza, nakambukungulu,+ navula yamalolwa, oloze naumwe wauchi akindulukile kuli ami.’ Omu mukiko mwanambe Yehova.
18 “‘Shikaho nyingililenu* chumechi kufuma likumbi lyalelo, likumbi lyakusokesa 24 lyakakweji wakusokesa 9, likumbi lyakwala chihela chatembele yaYehova.+ Nyingililenu chumechi:
19 Uno muchisete* muchili manona tahi?+ Uno mivinyo, namikuyu, namiloma, namilive yinemi lyehi numba? Kufuma likumbi lyalelo nangumikisulanga.’”+
20 Yehova ahanjikile kamuchivali kuli Hangai halikumbi lyakusokesa 24 lyakakweji kana+ ngwenyi:
21 “Lweza nguvulu waYuta, Zeluvavele ngwove, ‘Nangukanyikisa melu namavu.+
22 Nangukakatumuna matanda amawangana, nakukumisa ngolo jamawangana avaka-mafuchi.+ Nangukakatumuna matemba ajita navaka-kuwatambukisa, kaha tuvalu navaka-kutambukilaho navakalindwomwoka mutu himutu kupoko yamukwale yandumbwenyi.’”+
23 “Yehova wamayongomena nambe ngwenyi, ‘Halikumbi lize, ove ngamba yami Zeluvavele+ mwanaSheyalachele+ nangukakulingisa kupwa ukazeya kakatachikijilo mwomwo ove yove ngunasakula.’ Omu mukiko mwanambe Yehova wamayongomena.”
Kwinyikila Chamwishi
^ Chipwe “watembele.”
^ Chipwe pamo, “Shipilitu yami yapwile muli enu.”
^ Chipwe “vyuma vyamwaza.”
^ Chipwe “kumwono.” Tala Mukana waMazu.
^ Chipwe “Shinganyekenu kanawa.”
^ Chipwe “shinganyekenu kanawa.”
^ Chipwe “muwina wakulamina manona.”
