Hozeya 1:1-11
1 Yehova ahanjikile kuli Hozeya* mwanaMbeli mumakumbi achiyulo chaUjiya,+ naYotame,+ naAhaze,+ naHezekiya+ vaze vapwile vamyangana javaYuta.+ Ahanjikile kuli ikiye namumakumbi achiyulo chaYelovowame+ mwanaYowashe+ mwangana wavaIsalele.
2 Omu Yehova aputukile kuhanjika mazu kuhichila muli Hozeya, Yehova ambile kuli Hozeya ngwenyi: “Yako ukambate pwevo muka-ujila mangana upwenga navana vamuujila wenyi, mwomwo vatu vamulifuchi vanalitwamina kuzachila Yehova mwomwo yaujila.”+
3 Ngocho Hozeya ayile nakumbata Ngomele mwanaNjivilaime. Kutwala muze Ngomele emichile lijimo, kaha asemene mwana walunga naHozeya.
4 Jino Yehova ambile kuli Hozeya ngwenyi: “Muluke ngwove Yezelele,* mwomwo kalinwomu ngusopese vaze vakuzuvo yaYehu+ havilinga vyavo vyakumwanga manyinga vize vali nakulinga munganda yaYezelele. Nangukumisa wangana wavaze vakuzuvo yaIsalele.+
5 Halikumbi kana, nangukahokola uta wamanana waIsalele muChinema* chaYezelele.”
6 Ngomele emichile cheka lijimo, kaha asemene mwana wapwevo. Kalunga ambile kuli Hozeya ngwenyi: “Muluke ngwove Lo-luhama,* mwomwo kangweshi kukatetela+ cheka vaze vakuzuvo yaIsaleleko, nangukavahanga.+
7 Oloze nangukatetela vaze vakuzuvo yaYuta,+ kahami Yehova Kalunga kavo+ nangukavalwila. Kangweshi kukavalwila nauta wamanana, chipwe napoko yamukwale, chipwe najita, chipwe natuvalu, chipwe navaka-kutambukila hatuvaluko.”+
8 Omu Ngomele asumwine Lo-luhama, emichile cheka lijimo, kaha asemene mwana walunga.
9 Jino Kalunga ambile ngwenyi: “Muluke ngwove Lo-ami,* mwomwo enu keshi muvatu jamiko, ami nawa kangweshi kupwa nguKalunga kenuko.
10 “VaIsalele* navakavula chikuma nge usekeseke wakukalungalwiji uze navahona kupezalisa chipwe kulava.+ Kaha kuchihela kuze vavambilile ngwavo, ‘Enu kamweshi muvatu jamiko,’+ kwakuze vene navakavavulukila ngwavo, ‘Vana vaKalunga ou ayoya.’+
11 Jino vaYuta navaIsalele navakalikungulula nakulinunga hamwe,+ kaha navakalisakwila twamina nakulovoka mulifuchi. Likumbi kana nalikapwa lyalilemu kuli Yezelele.+
Kwinyikila Chamwishi
^ Lijina lyaHoshaya mukavatu. Lyalumbununa “Vatuyovola kuli Ya; Ya natuyovola.”
^ Ulumbunwiso, “Kalunga Mwakuva Jimbuto.”
^ Chipwe “muChana.”
^ Ulumbunwiso, “Kavamuteteleleko.”
^ Ulumbunwiso, “Keshi Vatu Jamiko.”
^ Hepe., “Vana vaIsalele.”