Hozeya 11:1-12
11 “Omu Isalele apwile kanyike, ngwamuzangile,+Ngwamusanyikile ou mwanami afume muEjipitu.+
2 Omu vamusanyikilenga,*Hakiko ahandukilenga chikuma kuli vakiko.+Alumbililenga vaMbale vimuna vakuvatula,+Ahanyinenga makombelo akusonga vimuna vakuvatula.+
3 Ami yami ngwanangwile vaEfwalime kutambuka,+ yami ngwavazundwilenga namavoko ami.+Kavatachikijile ngwavo ami yami ngwavokileko.
4 Ngwavakokelenga nalikoji nazangi*+ mangana vezenga kuli ami.Kuli vakiko ngwapwile nge mutu uze mwavafumisa jitoka hajishingo* javo,Vosena ngwavahanyinenga vyakulya.
5 Kaveshi kukinduluka kulifuchi lyaEjipituko, oloze Asulya ikiye mwapwa mwangana wavo,+Mwomwo vakanyine kukinduluka kuli ami.+
6 Poko yamukwale nayihelangana mujinganda javo,+Nayivanongesa nakuteta tupachiso twanganda yavo mwomwo yavyuma vyavipi vali nakujina.+
7 Vatu jami vanakakachila kuvilinga vyavipi.+Numba tuhu vanavasanyikanga vezenga kuli ou azezuka helu,* oloze naumwe wauchi nakatuka.
8 Ove Efwalime,+ nangukuhana ngachilihize kuli vaka-kole?Ove Isalele, nangukuhana ngachilihize kuli vaka-kole?Ikaze nangukulingila nge muze ngwalingile Atama?Ikaze nangukulingila nge muze ngwalingile Zevowime?+Ngunalumuna muchima wami,Ngunakwivwila jino keke.*+
9 Kangweshi kukakwivwila matotoko.Ove Efwalime, kangweshi kukakunongesa chekako,+Mwomwo ami ngwapwa nguKalunga, keshi ngumutuko,Ami yami Ou Wajila, ou ali muli ove.Kangweshi kukakukatukila nautenuko.
10 Navakakavangizanga Yehova, kaha ikiye mwakakangwoka nge ndumba.+Omu mwakakangwoka, vana venyi navakeza kufuma kumulauko oku vali nakulichikimina.+
11 Navakalichikimina nge tujila omu navakalovoka muEjipitu,Navakalichikimina nge mayembe omu navakalovoka mulifuchi lyaAsulya.+Kaha nangukavatwamisa mujizuvo javo.” Omu mukiko mwanambe Yehova.+
12 “Efwalime eji kulyonganga kuli ami,Nguli nakumona vilinga vyakutangisa+ vyavaze vakuzuvo yaIsalele kweshokwo nangutala.Oloze Yuta achili nakutambuka naKalunga,Nashishika lika kuli Ou Wajila Chikuma.”+
Kwinyikila Chamwishi
^ Kulumbununa, vapolofweto navatu veka vaze vatuminenga vanangule Isalele.
^ Hepe., “namikole yavatu namikole yazangi.”
^ Hepe., “hajimbangi.”
^ Kulumbununa, kukulemesa chamuchano.
^ Hepe., “Keke yami yinakwate nge kakahya hali ove.”
