Hozeya 2:1-23
2 “Lwezenu vandumbwenu vamalunga ngwenu, ‘Enu muvatu jami.’*+Lwezenu vandumbwenu vamapwevo ngwenu, ‘Enu yenu mapwevo vanatetela.’*+
2 Hanenu mulonga nenu, muhanenu mulongaMwomwo keshi pwevo lyamiko,+ ami nawa keshi ngulunga lyenyiko.Atela kulitwamina ujila wenyi,Atela kulitwamina ukoji wenyi,
3 Mokomoko nangumuzula asale uselesele nge omu asemukile,Nangumulingisa apwenga nge pambo,Nge lifuchi lyakuzeneka meya,Nangumulingisa afwenga nalipwila.
4 Vana venyi kangweshi kuvatetelakoMwomwo vanapu vana vamuujila.
5 Nevo nalingi ujila.+Ou avasemene nalingi chuma chasonyi,+ nambe ngwenyi,‘Nangukavangiza tujila twami+Vaze veji kungwondanga vyakulya, nameya,Nauvwalo wamangona, namahina, namaji, navyakunwa.’
6 Ngocho jila yenyi nanguyijika namingonga.Nangumutungila kembwe yamalolwaMangana azeneke kuwana kwakuhichila.
7 Mwakakavangiza tujila twenyi, oloze keshi kukavawanako.+Mwakavatondatonda, oloze keshi kukavawanako.Kaha mwakamba ngwenyi, ‘Nangukinduluka kuli lunga lyami watete,+Mwomwo ngwatwaminenga kanawa kuhambakana oholili.’+
8 Avulyamine ngwenyi ami yami ngwamuhanyinenga jimbuto jamanona,+ navinyo vyavihya, namaji,Avulyamine ngwenyi ami yami ngwamuhanyinenga palata yayivulu,Naulu vize azachishilenga hakulemesa Mbale.+
9 ‘Ngocho, nangukalumuna vishinganyeka vyami nakumutambula jimbuto jamanona hangonde yakwaha,+Nangukamutambula nawa vinyo vyavihya hangonde yakwaha,Nangukamunyanga uvwalo wamangona namahina ngwamuhanyine mangana avwale nakusweka usonyi wenyi.
10 Nangukamuzula hameso atujila twenyi,Kaha naumwe wauchi mwakamupululula mulivoko lyami.+
11 Nangukakumisa kuwahilila chenyi,Naviwanyino vyenyi+ vyakumweka chakakweji, najisambata jenyi, naviwanyino vyenyi vyahalwola vatongola vyosena, naviwanyino vyenyi vyeka.
12 Nangukapakula mande enyi amivinyo nawawa amikuyu aze ali nakwamba ngwenyi:“Evi vikiko vangwondele tujila twami.”Mande kana nangukawalingisa kupwa livunda,Kaha tunyama vamuchipapa navakalya mivinyo namikuyu yenyi.
13 Nangukamusopesa mwomwo yamakumbi aze alumbililenga vaMbale+ vimuna vakuvatula,Omu avwalilenga tuzeya navimbilingwa vyeka nakukavangiza tujila twenyi.Ami anguvulyamine.’+ Omu mukiko mwanambe Yehova.
14 ‘Ngocho nangukamukunyula,Nangukamutwala mupambo,Nangukahanjika nenyi nalikoji.
15 Nangukamukindulwishila mande enyi amivinyo, kaha nawakapwanga enyi kufuma vene halwola luze.+Chinema* chaAkole+ nachikapwa chikolo chakwingilila mulifuchi lyalutalililo.Mwakangukumbulula kuze nge omu alingile hashimbu apwile mwanapwevo,Nge omu alingile halikumbi lize alovokele mulifuchi lyaEjipitu.’+
16 Yehova nambe ngwenyi,‘Halikumbi lize kaweshi kukangusanyika cheka ngwove Kakako, oloze ngwove Lunga lyami.’*
17 ‘Nangukamulingisa akazeneke kuvuluka cheka majina avaMbale mukanwa kenyi,+Kaha majina avo keshi kukawanuka chekako.+
18 Halikumbi lize, nangukalikasa chivwasano natunyama vamuchipapa,+Natujila vakutuka mwilu, navyuma vyakuhalala hamavu+ mwomwo yavatu jami.Nangukafumisa mata amanana, najipoko jamikwale, najita mulifuchi,+Nangukavatwamisa mukuunda.+
19 Nangukakumbata ukapwe upwevo lyami haya myaka yosena.Nangukakumbata kweseka nakwoloka chami, nachiyulo chami,Nazangi yami yakwilila, nakeke yami.+
20 Nangukakumbata kweseka nakushishika chami,Kaha naukangutachikiza, ami yami Yehova.’+
21 Yehova nambe ngwenyi, ‘Halikumbi lize,Nangukalakana melu,Kaha melu nawakalakana mavu,+
22 Mavu nawakalakana jimbuto jamanona, navinyo vyavihya, namaji,Kaha vyuma kana navikalakana Yezelele.*+
23 Nangukamukuva hamavu nge jimbuto,+Ou vazenekele kutetela* nangukamutetela.Vaze kavapwile vatu jamiko* nangukavavuluka ngwami: “Enu munapu muvatu jami,”+Kaha vakiko navakamba ngwavo: “Ove unapu uKalunga ketu.”’”+
Kwinyikila Chamwishi
^ Chipwe “Chana.”
^ Chipwe “Mbale yami.”
^ Ulumbunwiso, “Kalunga Mwakuva Jimbuto.”
