Hozeya 8:1-14
8 “Haka luneta kukanwa kove.+Mutu umwe mweza nge ngonga, kaha mwalukuka zuvo yaYehova,+Mwomwo vatu kana vanajihi lushiko+ lwami nakuhokola nawa jishimbi jami.+
2 Veji kutetanga kuli ami ngwavo, ‘Ove Kalunga ketu, etu vaIsalele twakutachikiza.’+
3 VaIsalele vanakane vyuma vyamwaza.+Muka-kole avahangasane.
4 Vanatongola vamyangana chakuzeneka ami kuvetavisa.Vanatongola vilolo, oloze ami kangwavatachikijileko.Vanambate palata naulu nakutenga makombelo,+Kaha navalihichikisamo vavene.+
5 Ove Samaliya,+ likombelo lyove lyamwanangombe vanalikane,Vatu kana ngunavevwila matoto.+Navapwanga lika namulonga palanga nakumwaka uka?
6 Likombelo kana linapu lyakuIsalele,Valitengele kuli chitotombwe, kaha kalyapwa Kalungako.Likombelo lyamwanangombe lyakuSamaliya navalichika chikichiki.
7 Vali nakukuva peho,Kaha navaha peho yanyamanganda.+Tiliku kayeshi nakwima manonako.+Vyeshovyo vili nakusoka kavyeshi nakulovola manona akutwa ungako.Numba nge nakwima vimwe, vali nakuvilya kuli vaka-mafuchi eka.*+
8 VaIsalele navavamina vosena.+Navatwama jino muli vaka-mafuchi,+Kwijiva nge mulondo uze vanambili.
9 Mwomwo vanahanduka nakuya kuAsulya+ vavakafwe, nge chimbulu wamuchipapa uze nalihandula kuli vakwavo.VaEfwalime vanafwete mapwevo vaka-ujila mangana vapwenga tujila twavo.+
10 Numba tuhu ava vaka-ujila vanafumu kumafuchi eka,Oloze nangukavakungulwila hamwe.VaEfwalime navakaputuka kuyanda+ mwomwo yakuvamwenesa vihuli kuli mwangana navilolo.
11 VaEfwalime vanavulisa majiko akulumbila mangana valinge shili.+Awa majiko avo akulumbila anapu akulingilaho shili.+
12 Ngwavasonekelele vyuma vyavivulu mujishimbi,*Oloze vavimwene kupwa vyamokomoko.+
13 Veji kunguhananga vimuna vakuvatula, kaha veji kulyanga nyama,Oloze ami Yehova kangweshi kwivwila kuwaha vimuna kanako.+Ngocho nangwanuka kuhenga chavo, nanguvazangamisa hajishili javo.+Vanayi cheka* kuEjipitu vavakafwe.+
14 Isalele nanguvulyama ami Tengi yenyi,+ kaha natungu jitembele,+Yuta navulisa jinganda jakukingiwa.+Oloze nangukatuma kakahya mujinganda jenyi,Kaha nakakocha tuposhi twamunganda hinganda.”+
Kwinyikila Chamwishi
^ Chipwe “kuli vatu veka.”
^ Chipwe “mujindongi.”
^ Chipwe pamo, “Navakakinduluka.”