Isaya 1:1-31
1 Echi chikiko chakumwenesa chize vamumwenesele Isaya*+ mwanaAmoze hanganda yaYuta naYelusalema mumakumbi aUjiya,+ naYotame,+ naAhaze,+ naHezekiya,+ vamyangana javaYuta:+
2 Enu melu, ivwililenu, enu mavu+ tengelekenu matwitwi enu,Mwomwo Yehova nahanjika ngwenyi:“Ngunalele vana, ngunavakulisa,+Oloze vanalikange kuli ami.+
3 Ngombe atachikiza kaka yenyi amulanda,Chimbulu atachikiza mulaka wakaka yenyi amuheta.Oloze vaIsalele kavangutachikijileko,*+Vatu jami kavalingile vyuma nakunangakanako.”
4 Lamba kuli vaka-muyachi washili,+Kuvatu vaze vanalemuwa nashili,Kutanga yavaka-kuhuka, vana vakulumbuka.Vanaseze Yehova,+Vanasaula Ou Wajila waIsalele,Vanamumbu nyima.
5 Navamivetela cheka halihi omu muli nakulikanga lika?+Mutwe wosena uli nakuviza,Muchima wosena uli namusongo.+
6 Kufumisa kuvilyachilo swi nakumutwe kakweshi hamwe halambweko.Mujimba wosena uli navitunyu najimbandu jajindende najeji jajinene,Kavajukileko,* kavajikashileko, chipwe kujivwovuwisa namaji.+
7 Lifuchi lyenu linapu ngundu.Jinganda jenu vanajocho nakakahya.Vaka-mafuchi eka vanenyeka lifuchi lyenu hameso enu.+Linapu nge lifuchi lize vanakatumuna kuli vaka-mafuchi eka.+
8 Mwanapwevo Zeyone vanamuseze nge chisakila muwande wamivinyo,Nge kapundo muwande wamatende,Nge nganda vanahake muchingombela.+
9 Kachi nge Yehova wamayongomena katusezelele vaze vasalileho vavandendeko,Kachi tunapu nge Sotome,Kachi tunafwane nge Ngomola.+
10 Enu vaka-kuyula nachilala muSotome,+ ivwenu mazu aYehova.Enu vatu vamuNgomola,+ tengelekenu matwitwi enu kujishimbi* jaKalunga ketu.
11 Yehova nambe ngwenyi: “Vimuna jenu vakuvatula vali nanganyo mukaze kuli ami?+Kangweshi nakusaka cheka mawana enu akulumba avizamba jamikoko+ namaji avimuna jenu vakununako,+Ngunahungu manyinga+ amavuvu jenu vavangombe,+ namikoko jenu, navapembe jenu.+
12 Mweji kwizanga nakwimana kumeso ami.+Iyaze eji kumisanyikanga mwizengaNakulyata muvipango vyami?+
13 Kanda namuneha cheka mawana enu amokomoko amanonako,Vyuma vyenu vyalivumba lyamwaza vinapu vyaunyengwe kuli ami.+Mweji kulinganga viwanyino vyakumweka chakakweji,+ najisambata,+ mweji kulongesanga kukunguluka chenu,+Oloze ngunakane viwanyino vyenu vyakukunguluka chajila mwomwo muli nakulinga visava.+
14 Ngunahungu* viwanyino vyenu vyakumweka chakakweji navilika vyeka.Vinapu hichiteli kuli ami.Kaha ngunazeye kumbata chiteli kana.
15 Omu mweji kwololanga mavoko enu,Ami ngweji kufwikanga kumeso ami.+Numba tuhu namulomba mapapa kakavulu,+Kangweshi kumivwililako+Mwomwo mavoko enu anazale namanyinga.+
16 Sanenu, litomesenu,+Echenu kulinga vyuma vyakuhenga kumeso ami,Litwaminenu kulinga vyuma vyavipi.+
17 Linangulenu kulinga mwamwaza, tondenunga chiyulo chakwoloka,+Huhumunenu vaze veji kushinyinyikanga vakwavo,Hakwilenu vana vakuzeneka masevo,*Hakwilenu vatuliwe.”+
18 Yehova nambe ngwenyi: “Twayenu tushimutwile mangana tusungamise vyuma,+Numba tuhu jishili jenu jinapu nge ulombo uchila,Oloze najitoma to nge lihina litoma,+Numba tuhu jinachilana ngengu nge lihina lichila,Oloze najitoma to nge wanda utoma.
19 Kachi nge namulisuula nakulyononona,Kaha namukalyanga vyuma vyamwaza vyamulifuchi.+
20 Oloze nge namukana nakulikanga,Kaha navakaminongesa napoko yamukwale.+Mwomwo Yehova ikiye nahanjika chuma kanechi.”
21 Nganda yakushishika+ yinalumuka kupwa nganda yaujila.+Mwapwilenga chiyulo chakwoloka,+Mwapwilenga vilinga vyakwoloka,+Oloze jino muli vaka-kujiha vatu.+
22 Ove nganda, palata yove yinalumuka kupwa vizozo,+Wala wove* vanauchingasana nameya.
23 Vilolo jove vanapu vakunjinjavala, vanalikate naveji,+Vilolo vosena vanazange maswekeza, vali nakufwila kuvahana mawana.+Kaveshi kuyula kanawa vana vakuzeneka masevoko,*Vihande vyavatuliwe kavyeshi kuheta kuli vakikoko.+
24 Shikaho Mwata wamuchano, Yehova wamayongomena,Ou Wangolo waIsalele nambe ngwenyi:“Nanguzangamisa vaka-kole jami,Nangulinga sambanjinga kuli vaka-kole jami.+
25 Nangwolola livoko lyami hali ove,Nangutomesa vizozo vyove vyosena,Nangukufumisa majilo ove osena.+
26 Nangukahilwisa vaka-kuyula jove nge muze chapwile hakavanga,Nangukahilwisa vaka-kukulweza mangana nge muze chapwile hakuputuka.+Kaha navakakuvulukanga ngwavo Nganda yaKwoloka, Mbongi yaKushishika.+
27 Zeyone navakayisokola nachiyulo chakwoloka,+Kaha vatu jayo navakavakindulwisa nakwoloka.
28 Vaka-kulikanga, navaka-shili navakavahokojola,+Kaha vaze navaseza Yehova navakavanongesa ndolokoto.+
29 Vosena vaze vafwelela mitondo yayinene yize munevwila kuwaha+ navakevwa sonyi,Namukasauka mwomwo yamilemba* munasakula.+
30 Mwomwo namukapwa nge mitondo yayinene yikwechi mafwo anazuzu,+Nge milemba yakuzeneka meya.
31 Mutu wangolo mwakapwa nge wanda walinyu,Kaha milimo yenyi nayikapwa nge lusase.Vyosena vivali navikakwata milangi,Naumwe wauchi mwakavijima.”
Kwinyikila Chamwishi
^ Ulumbunwiso, “Ulwilo waYehova.”
^ Chipwe “kavatachikijile mwata wavoko.”
^ Hepe., “Kavajishindakanyineko.”
^ Chipwe “kujindongi.”
^ Chipwe “Mwono wami unahungu.”
^ Chipwe “Hakwilenu vanginga.”
^ Chipwe “Wala wove watiliku.”
^ Chipwe “kuyula kanawa vangingako.”
^ Pamo mitondo namilemba veji kuzachisanga mukulemesa makombelo.