Isaya 10:1-34
10 Lamba kuli vaze veji kutunganga jindongi jajipi,+Vaze veji kusonekanga jishimbi jakuyanjisa vakwavo,
2 Mangana vazeneke kuhakwila vaka-kuhutwa,Vahone kuyula vaka-kukalikiza muli vatu jami nachiyulo chakwoloka,+Mangana vambate vatuliwe vamapwevo kupwa vyuma vyavo vyakupupa,Navana vakuzeneka masevo* kupwa vyuma vyavo vyakupukula.+
3 Uno namukalinga ngachilihi halikumbi lyakusopesa,*+Omu nachikeza kunongesa kufuma kwakusuku?+Kuli veya namukachinyina vakamikafwe?+Kulihi namukaseza luheto* lwenu?
4 Namukanongama hali vafunge,Nge pimbi, namukafwila hamwe navaze navakajiha.Kulundundu yenyi kayatulileko mwomwo yavyumevi,Hanga nolwela livoko lyenyi mangana avavete.+
5 “KaAsulya+Ikiye chitondo chize nanguzachisa ngusolole matoto ami,+Ikiye mbwechi yakulundundu yami, mbwechi yize yili mulivoko lyenyi.
6 Nangumutuma ayenga nakulukuka vaka-lifuchi vakulikanga kuli Kalunga,+Kuvatu vaze vanangwivwisa kupihya,Nangumulweza apukule vyuma vyavivuluAvalyatangile nge omu mutu mwalyatangila mavu mujila.+
7 Numba tuhu keshi kukajina kulinga chumechiko,Numba tuhu muchima wenyi kaweshi kukataka chuma kanako,Oloze muchima wenyi naukafwila kuvanongesa,Mwakajiha vaka-mafuchi amavulu.
8 Mwomwo nambe ngwenyi,‘Uno vilolo jami vosena kavapwa vamyanganako numba?+
9 Uno nganda yaKalano+ kayeshi nge nganda yaKalakemisheko+ numba?Uno nganda yaHamate+ kayeshi nge nganda yaAlapateko+ nyi?Uno nganda yaSamaliya+ kayeshi nge nganda yaNdamashikuko+ nyi?
10 Livoko lyami linatambula mawangana aze eji kulemesanga tulunga vamokomoko,Linatambula mawangana aze akwechi makombelo akusonga amavulu kuhambakana amuYelusalema naSamaliya.+
11 Ngocho Yelusalema namakombelo ayo akusonga nanguvilingaNge muze ngunalingi kuli Samaliya natulunga twayo vamokomoko.’+
12 “Omu Yehova mwakalinga hanakumisa milimo yenyi haPili yaZeyone namuYelusalema, mwakazangamisa mwangana waAsulya hamuchima wenyi wakukakama, wakulivwimba, nahataliso yenyi yamanya.+
13 Mwomwo nambe ngwenyi,‘Nangulinga chumechi mungolo jami,Namumangana ami, mwomwo ngwapwa nguwakunangakana.Nangusosolola jingiza javatu veka naveka,+Nangupupa luheto lwavo,+Nangufungulula vatu vatwamamo nge omu muka-ngolo mwafungulula vatu.+
14 Livoko lyami nalikakwata havikumba vyavatu veka naveka,Nge omu mutu mwolola livoko lyenyi akwate muuswa.Nangukambata lifuchi lyosena,Nge omu mutu mwambata maulu vanaseze muuswa,Kakweshi umwe mwakapupula mavava enyi chipwe kwasama mukanwa kenyi chipwe kunyinyitako.’”
15 Uno ngimbu yinahase kulitohwesa hali ou ali nakuyitetesa numba?Uno saha yinahase kulisasa kuli ou ali nakuyitetesa nyi?Uno mukombo+ unahase kuhwingisa mutu ou naukwate numba?Kutala chitondo chinahase kuzundula ou nachikwate tahi?
16 Shikaho Mwata wamuchano Yehova wamayongomena,Mwakahokamisa vatu jenyi vavanene,+Kaha mwakakwachisa kakahya+ nakwocha upahu wenyi.
17 Mumunyi+ waIsalele naukapwa nge kakahya,+Ou wenyi Wajila mwakapwa nge mulangi.Mwakakwata kakahya nakwocha vimwila vyenyi navikwata mulikumbi lyangongo.
18 Mwakakumisa upahu wachipapa chenyi namilemba yenyi.Kaha nachikapwa nge mutu wakuviza uze nahokama.+
19 Mitondo yikwavo yamuchipapa chenyiNayikakeha chikuma, kaha navakayilava nakuli kanyike wamundende.
20 Halikumbi lize vaze navakasala muli vaIsalele,Navatu vakuzuvo yaYakova vaze navakayovokaKaveshi kukapendamina cheka hali uze avaveteleko,+Oloze navakashishika nakupendamina hali Yehova,Ou Wajila waIsalele.
21 Nakukakinduluka vamwe vakusalaho,Vakusalaho vakuzuvo yaYakova navakakinduluka kuli Kalunga Wangolo.+
22 Ove Isalele, numba tuhu vatu jove,Vanavulu kwijiva nge usekeseke wakukalungalwiji,Oloze nakukakinduluka vamwe vakusalaho.+Kalunga najinyi lyehi kunongesa vatu,+Kaha chuma kana mwakachilinga nachiyulo chakwoloka.+
23 Mwata Wakulitulaho, Yehova wamayongomena nachijinyi lyehi kunongesa vatu,Chuma kana nachikalingiwa mulifuchi lyosena.+
24 Shikaho Mwata Wakulitulaho, Yehova wamayongomena nambe ngwenyi: “Enu vatu jami muli nakutwama muZeyone, kanda namwivwa womako, mwomwo yakaAsulya uze amivetelenga nachitondo nakwolola mukombo+ wenyi hali enu nge muze vamilingile vaEjipitu.+
25 Mwomwo kunasale katando kakandende kaha, nangupeula utenu wami hali enu, nanguutalikisa hali ikiye nakumunongesa.+
26 Yehova wamayongomena mwakamukajila chikote,+ nge muze alingile hakufungulula vaMichane kulilolwa lyaOleve.+ Kaha mukombo wenyi mwakawolwela hakalungalwiji nge muze awolwele hali vaEjipitu.+
27 Halikumbi lize chiteli chenyi amitwikile havifwiji vyenu nachikamifuma,+Toka yenyi nayikafuma hajishingo jenu,+Toka kana nayikahokoka+ mwomwo yamaji.”
28 Neza kuAyate,+Napulasana muMingilone.Natulika viteli vyenyi muMikimashe.+
29 Nazauka hamwava,Nasavalila kuNgeva,+Nganda yaLama yinalichikimina, kaha vatu vamuNgiveya+ kuze afumine Saulu vanachinyi.+
30 Ove mwanaNgalime wapwevo, twako kawelele, tambakana.Ove Laisha, tengeleka matwitwi ove wivwilile,Ove Anatote+ wakukalikiza.
31 Vatu vamuMatamena vanachinyi.Vatu vamuNgevime vanaswame.
32 Likumbi lyalelo mwemana muNove.+Mwenyijeka konyi kupili yamwanapwevo Zeyone,Pili yaYelusalema.
33 Talenu! Mwata wamuchano Yehova wamayongomenaAli nakuteta mitango yilindumukile hamavu.+Mitondo yayisuku ali nakuyipakula,Kaha mitondo yakuzandama ali nakuyiteta.
34 Ali nakuvuka mulivunda nachinoma chafwelu,*Kaha chindume mwanongesa Levanone.
Kwinyikila Chamwishi
^ Chipwe “Navanginga.”
^ Chipwe “lyakuzangamisa.”
^ Chipwe “upahu.”
^ Chipwe “nangimbu.”
