Isaya 14:1-32
14 Yehova mwakevwila Yakova+ keke, kaha mwakasakula cheka vaIsalele.+ Mwakavatwamisa* mulifuchi lyavo,+ kaha vamwiza navakalinunga navo hamwe, nakulipanjika kuli vaze vakuzuvo yaYakova.+
2 Vatu veka naveka navakeza navo hamwe kulifuchi lyavo, kaha vaze vakuzuvo yaIsalele navakaheta vatu kana kupwa vangamba javo vamapwevo navava vamalunga+ mulifuchi lyaYehova. VaIsalele navakakwata ufunge vatu vaze vavakwachile ufunge, navakayulanga vatu vaze vavazachishilenga milimo.
3 Halikumbi lize mwakaminokesa Yehova kupindangano yenu, nakukukola chenu, nakuundungo wenu,+
4 namukatela mwangana waMbavilone chishimo chakumutoleka ngwenu:“Ou akanjikijilenga vakwavo kuzata milimo* nafu.Luyanjisa lwenyi lunakumu.+
5 Yehova nahokola mbwechi yavaka-kuhuka,Nahokola mukombo wavaka-kuyula,+
6 Nanongesa ou avetelenga vatu veka naveka jikonyi,+Ou afungulwilenga vaka-mafuchi muutenu nakuvayanjisanga lika.+
7 Lifuchi lyosena linanoko jino, lili mukuunda.Vatu vali nakuwahilila.+
8 Mitondo yaminjunyipe yinawahilila havyuma vinasoloka kuli ove,Namishitale yakuLevanone yinawahilila.Yinambe ngwayo, ‘Kufuma haze walindumukilile,Naumwe wauchi neza nakutuvuka.’
9 Fuka* nayikiko yinalizangeMangana yikuhumangane omu nawiza.Yinahindula vafu mwomwo yayove.Yinahindula vatwamina valuyanjisa vosena vahamavu.*Yinakatula vamyangana javaka-mafuchi vosena hamatanda avo.
10 Vosena vanambe kuli ove ngwavo,‘Nayove nawa unahehela ngana mwayetu nyi?Uno unapu nge yetu tahi?
11 Kulivwimba chove chinashikumuka muFuka,*Nachivumo chavisaji vyove vyamikole chinashikumuka.+Mavunu vanapu nge kahela kove,Kaha misangunya vanapu mahina ove akulifwika.’
12 Ove litota, ove mwanakupulika chalikumbiUnahosomoka mwilu.Ove wafungulwilenga vaka-mafuchi,+Vanakutete nakuholokela hamavu.
13 Walyambile mumuchima wove ngwove, ‘Nanguya mwilu.+Litanda lyami nangukalizezula helu lyavatanganyika jaKalunga,+Nangukatwamanga hapili yakukungulukila,Kusongosongo yakumutamba wakunote.+
14 Nanguya helu lyamavwi hakujindama.Nangupwa nge ou Wakulitulaho Chikuma.’
15 Oloze navakakushikumwina muFuka,*Kwishi yawina.
16 Vaze navakakumona navakakushishika.Navakakutala chikuma nakwamba ngwavo,‘Ou keshi ikiye uze andendeselenga mavu,Nakuchikimisa mawangana,+
17 Uze alumwine lifuchi kupwa nge pamboUze akatumwine jinganda jalyo,+Nakukana kusokola vafunge vayenga kwimbo lyavoko nyi?’+
18 Vamyangana javaka-mafuchi vosena,Vavafunda mukavumbi,Mutu himutu muchimbumbe* chenyi.
19 Oloze ove vanakumbili chakuzeneka kukufunda,Vanakumbili ngana mwamutango waupi,Vanakufwiki mijimba yavatu vanajihi najipoko jamikwale,Vaze vanambili muwina wamalolwa,Kaha unafwane nge chivimbi uze vanalyatangila.
20 Kaveshi kukakufunda navamyangana mufuka yimweko,Mwomwo wenyekele lifuchi lyove,Wajihile vatu jove.Majina avaka-tanga yavaka-kuhuka kaveshi kukawavuluka chekako.
21 Lizangenu mujihe vana venyiMwomwo yamilonga vavulumwine vakakuluka javo,Kuchina navakakatuka nakutambula lifuchiNakutungamo jinganda javo.”
22 Yehova wamayongomena nambe ngwenyi: “Nangukavakatukila.”+
Yehova nahanjika ngwenyi: “Nangukajimbangana majina muMbavilone nakufumisamo vasalaho, navana, navaka-tanga.”+
23 Yehova wamayongomena nambe ngwenyi: “Mbavilone nangukayalumuna kupwa chihela chakutwamamo visekele, chihela chaulova nameya. Nangukayikomba nalukombo lwakunongesa.”+
24 Yehova wamayongomena nalishingi ngwenyi:“Nachikasoloka vene nge omu ngunajinyi,Nachikalingiwa nge omu ngunashinganyeka.
25 Nangukachika kaAsulya mulifuchi lyami,Nangukamulyatangila hapili yami.+Toka yenyi nangukayifumisa hali vakiko,Chiteli chenyi nangukachifumisa havifwiji vyavo.”+
26 Omu mukiko vanajinyi kulinga hamavu hosena,Eli likiko livoko vanolwela hali vaka-mafuchi osena mangana vavazangamise.
27 Yehova wamayongomena nachijinyi lyehi,Iyaze mwahasa kuchihonesa?+Nolola lyehi livoko lyenyi,Iyaze mwahasa kulikoneka?+
28 Mumwaka uze afwile Mwangana Ahaze,+ vavilikile mazu ano ngwavo:
29 “Ove lifuchi lyaFwilishite nayenu mwatwamamo kanda namuwahililako,Mwomwo ngwenu mbwechi yamutu uze amivetelenga vanayihokola.Muliulu lyalinoka+ namukafuma linoka waulembe,+Mwanenyi mwakapwa linoka waulembe nge kakahya.
30 Vatwatwa javaka-kukalikiza navakalyanga vyakulya,Kaha vaka-kuhutwa navakasavalanga mukuunda,Oloze vatu jenu nangukavajiha nazala yakalombolombo,Kahava navakasalaho kuli enu navakavajiha.+
31 Ove chikolo kalwomwoka, ove nganda tetumuka,Enu mwatwama muFwilishite muvosena namulizuzukila,Mwomwo kunote kuli nakwiza wishi,Halizavu lyavaka-kole kaheshi mutu wakutambuka chikokiko.”
32 Valuwa jalifuchi vavakumbulule ngachilihi?Vavakumbulule ngwavo Yehova nale lyehi chihela chaZeyone,+Kaha vatu jenyi vakukalikiza navachinyinamo.
Kwinyikila Chamwishi
^ Chipwe “Mwakavanokesa.”
^ Chipwe “Muka-kuzachisa vakwavo.”
^ Chipwe “Sheyole,” kulumbununa fuka yavatu vosena. Tala Mukana waMazu.
^ Hepe., “Yinahindula vizamba javapembe vosena vahamavu.”
^ Chipwe “muSheyole,” kulumbununa fuka yavatu vosena. Tala Mukana waMazu.
^ Chipwe “muSheyole,” kulumbununa fuka yavatu vosena. Tala Mukana waMazu.
^ Hepe., “muzuvo.”
