Isaya 20:1-6
-
Chinjikizo chavyuma navikasoloka kuli vaEjipitu navaEchopa (1-6)
20 Salangone mwangana waAsulya atumine Talatane* kuAshatote,+ kaha alukukile Ashatote nakuyitambula.+
2 Jino mumwaka vene uze, Yehova ahanjikile kuhichila muli Isaya+ mwanaAmoze ngwenyi: “Yako uzule vikeleyi mumbunda yove, namendelo kumahinji ove.” Kaha alingile vene ngocho, atambukilenga uselesele* nakutambuka mahinjihinji.
3 Jino Yehova ambile ngwenyi: “Ngamba yami Isaya natambuka uselesele nakutambuka mahinjihinji hamyaka yitatu kupwa chinjikizo+ chavyuma navikasoloka kuli vaEjipitu+ navaEchopa.+
4 Ngocho mwangana waAsulya mwakazula vafunge vakuEjipitu+ navava vakuEchopa nakuvatwala muufunge. Mwakatwala vanyike navakulwane oku vali nakutambuka uselesele, matakotako, nakutambuka mahinjihinji, kaha vaEjipitu navakevwa sonyi.
5 Navakahomba nakwivwa sonyi mwomwo vafwelelelenga vaEchopa, nakulisashila hali vaEjipitu.
6 Halikumbi lize, vatu vaze vatunga kuchikulo chakalungalwiji navakamba ngwavo, ‘Talenu vyuma vinasoloka kulifuchi twafwelelelenga, kuze twalahililenga vatukafwe nakutuyovola kuli mwangana waAsulya! Natuyovokanga ngachilihi jino?’”
Kwinyikila Chamwishi
^ Chipwe “atumine mukulwane wamaswalale.”
^ Chipwe “atambukilenga chakuhona kuvwala kanawa.”