Isaya 21:1-17
21 Awa akiko mazu alupi luze nalukeza hangalila yapambo yakalungalwiji:*+Lupi luli nakwiza ngana mwapeho yanyamanganda yize nayihuhwa kusulo,Kufuma mupambo, kulifuchi lyakwivwisa woma.+
2 Echi chikiko chakumwenesa chachipi vanangumwenesa:Muka-kumbembejeka vatu ali nakumbembejeka,Muka-kunongesa vatu ali nakunongesa,Ove Elame vakatukile. Ove Mete+ vahake muchingombela.Nangukakumisa kulishona chosena chize nanehe kuvatu.+
3 Shikaho nguli nakulyonyinga.*+Nguli nakwivwa kukola chikuma,Ngana mwapwevo uze ali nakusapuluka.Ngunahombo, kangweshi kuhasa kwivwililako.Nguli muchitanga, kangweshi kuhasa kumonako.
4 Muchima wami unahombo, kaha ngunalizuzukila.Kajimbavenyi ngwatalililanga kanangulingisa ngwivwenga woma.
5 Longesenu mesa navitwamo vyayo,Kaha lyenunga nakunwa.+Enu vilolo, katukenu muwavise kepwe.*
6 Yehova nambe kuli ami ngwenyi:“Yako ukemike muka-kulama mangana ambulule ovyo mwakamona.”
7 Amwene litemba lyajita vali nakulikoka kutuvalu,Litemba lyajita vali nakulikoka kuvimbulu,Litemba lyajita vali nakulikoka kuvangamela.Atalile nakushishika kanawa.
8 Jino atambakanyine nalizu lyakukangwoka nge lyandumba ngwenyi:“Ove Yehova ngunemananga hakaposhi kakutalila hakumbi hakumbi,Ngunemananga kuchihela chami chakulamina ufuku hiufuku.+
9 Tala vyuma vili nakwiza:Kuli nakwiza malunga mulitemba lyajita lize vali nakukoka kutuvalu.”+Kaha ambile ngwenyi:“Yinashiuka, Mbavilone yinashiuka.+Makombelo ayo akusonga osena anachikikila hamavu.”+
10 Enu vatu jami vanazungula nge manona,Enu munafumu kuchizungwilo chami,+Ngunamilweze lyehi vyuma ngunevu kuli Yehova wamayongomena, Kalunga kaIsalele.
11 Awa akiko mazu akuvuluka lupi luze nalukeza haNduma:*KuSeile+ kuli mutu umwe ali nakungutambakana ngwenyi:“Ove muka-kulama, kunalitulu jola jingahi numba kuchenga?Ove muka-kulama, kunalitulu jola jingahi numba kuchenga?”
12 Muka-kulama ambile ngwenyi:“Kalinwomu kuchenga, kaha nakupwa nawa ufuku.Kachi nge uli nakusaka kwihula, kaha ihula.Wizenga cheka.”
13 Awa akiko mazu akuvuluka lupi luze nalukeza kungalila yalikundu:Enu vatu vakuNdetane+ vaka-kutambwojoka navimuna,Namukasavalanga mulikundu naufuku.
14 Enu vatu vakulifuchi lyaTema,+Nehelenu meya vaze vanafu lipwila,Nehelenu vyakulya vaze vali nakuchina.
15 Mwomwo vanachinyi jipoko jamikwale, jipoko jakusolomona lyehi,Vanachinyi mata amanana, vanachinyi jita yayinene.
16 Yehova ambile kuli ami ngwenyi: “Upahu wavaKetale+ naukakuma mumwaka umwe kaha nge tando mwazata ngamba wakukamba.
17 Malunga vavaKetale vaka-kwasa jita namata amanana vaze navakasalaho, navakakeha mwomwo Yehova, Kalunga kaIsalele nahanjikamo lyehi.”
Kwinyikila Chamwishi
^ Pamo kutalikisa kungalila yaMbavilone yakushikulu.
^ Hepe., “Shikaho jitungi jami jili nakukola.”
^ Chipwe “mukwite kepwe maji.”
^ Ulumbunwiso, “Kuhola Kulu.”
