Isaya 26:1-21
26 Halikumbi lize, navakemba mwaso ou+ mulifuchi lyaYuta+ ngwavo:“Tuli nanganda yakukingiwa.+Ulwilo wenyi unapu nge jikembwe namikingo.+
2 Sokololenu kuvikolo+ mangana muyachi wakwoloka wingile,Muyachi wakulinga vyuma nakashishi.
3 Naukinganga vatu vaze vapendamina hali ove.*Nauvalingisa vatwamenga lika mukuunda,+Mwomwo vakufwelela.+
4 Mufwelelenunga Yehova haya myaka yosena,+Mwomwo Ya* Yehova ikiye Lilolwa lyahaya myaka yosena.+
5 Mwomwo nenyisa vaze vatwama hachihela chakulunduka, munganda yahapili.Nganda kana nayipuzula,Nayipuzula nakuyilindumwina hamavu,Nayisavalika mulukungu.
6 Nganda kana navakayilyatangila,Navakayilyatangila kuli vaka-kuyanda, navaka-kukalikiza.”
7 Jila yamuka-kwoloka yapwa yakusungama.*Naukasalamisa jila yamuka-kwolokaMwomwo ove wapwa uwakusungama.
8 Ove Yehova, natutalililanga kuli ove,Omu natukavangiza munayi chiyulo chove.Natwanukanga lijina lyove nakulifumakanyisa.
9 Naufuku, ngweji kukutondatondanga namwono wami wosena,Muchima wami weji kufwilanga kukuwana.+Mwomwo omu weji kusopesanga vaka-mavu,Vatu veji kulinangulanga kwoloka.+
10 Muka-kuhuka keshi kulinangula kwolokako+Numba vamwivwila tuhu uselewa.Numba atwama mulifuchi lyavatu vakusungama mwalinga lika vyuma vyavipi,+Keshi kumona ukelenga waYehovako.+
11 Ove Yehova unavolwela livoko lyove mwilu, oloze kavalimweneko.+Navakamona omu naukalwila vatu jove, kaha navakevwa sonyi.Kakahya kove nakakalya vaka-kole jove.
12 Ove Yehova, naukatuhana kuunda,+Mwomwo vyuma vyosena vize tunalingi,Yove unatukafwe tuvitesemo.
13 Ove Yehova Kalunga ketu, numba tuhu vanatuyulunga nakuli vamyata veka,+Oloze etu tweji kuvulukanga lijina lyove kaha.+
14 Vanafu, kaveshi kukayoya chekako.Vanatoko, kaveshi kukasangukako.+Mwomwo unavakatukilaNakuvalalisa, kuchina navavanuka.
15 Ove Yehova unavulisa vaka-lifuchi,Vaka-lifuchi unavavulisa chikuma.Unalitohwesa ove ivene.+Unasosolola jingiza josena nakutohwesa lifuchi.+
16 Ove Yehova, omu vapwile muluyando vatalile kuli ove,Valombele kuli ove namazu akuyeveta omu wavazangamishile.+
17 Nge omu pwevo eji kwivwanga misongo yakusema nakutetaHakusapuluka,Mukiko tunevunga nayetu mwomwo yayove, ove Yehova.
18 Tunemita majimo, tunevu misongo yakusema,Oloze chili nge tunaseme kaha peho.Katwanehele ulwilo mulifuchiko,Kaha kakwasemukile mutu wakutwama mulifuchiko.
19 “Vafu jenu navakayoya.Vivimbi jami navakasanguka.+Enu mwatwama mulukungu,+Tonenu, twenu jingunda.Mwomwo lyume lyenu linapu nge lyume lyachimene,*Mavu nawakecha vafu vakayoye cheka.
20 Enu vatu jami, yenunga mwingile mutupete twenu,Lisokelelenumo.+Swamenu hakapyapya kakandende,Palanga nomu naukuma utenu.*+
21 Mwomwo Yehova ali nakwiza kufuma kuchihela chenyi,Mangana asopese vatu vamulifuchi hakuhenga chavo,Lifuchi nalikasolola hatoma manyinga aze linamwangenga,Kalyeshi kukasweka vatu vaze linajihingako.”
Kwinyikila Chamwishi
^ Chipwe pamo, “vaze vakwechi vishinganyeka vyavo vize navahona kwalumuna.”
^ “Ya” hilijina lyaYehova mukavatu.
^ Chipwe “yakusalama.”
^ Chipwe pamo, “nge lyume lyakumafwo.”
^ Chipwe “nomu nawakuma matoto.”
