Isaya 28:1-29
28 Lamba kuli ove muchama* wakulitukwojola* wavaka-kupenda vavaEfwalime,+Nakuli ove lutemo lwawo lwaulangaji luze luli nakupiluka,Luze luli kumutwe wachinema chawilo chavaze vanapende navinyo.
2 Talenu! Yehova ali namutu wangolo, wakujikiza.Mwakambila uze muchama hamavu,Nge muze nayiliveta vula yamalolwa hamavu, nomu nayihuhwa peho yanyamanganda,Nge muze nayinoka nawa vula yayinene yamikalateta.
3 Muchama wakulitukwojola* wavaka-kupenda vavaEfwalimeNavakaulyatangila hamavu.+
4 Kaha lutemo lwawo lwaulangaji luze luli nakupilukaLuze luli kumutwe wachinema chawilo,Nalukapwa nge lukuyu lwakulivanga kuhya shimbu kanda nonga yihete.Omu mutu mwalumona, mwalunona nalivoko lyenyi nakululya.
5 Halikumbi lize, Yehova wamayongomena mwakapwa nge muchama waulangaji, nge chilongo chamwaza kuli vatu jenyi vaze vanasaleho.+
6 Mwakahana vaka-kuyula muchima wakufwila kusopa nachiyulo chakwoloka, mwakahana ngolo vaze navakahonesa vaka-jita kuchikolo changanda.+
7 Navava nawa vanahungumuka mwomwo yavinyo.Wala uze vananu unavalingisa vapelyangile.Vapilishitu navapolofweto vanahungumuka mwomwo yawala,Vinyo vinavazenge,Kaha vali nakutalyangila nawala vananu.Vyakumwenesa vali nakumona vili nakuvatangisa,Ngocho kaveshi nakuyula kanawako.+
8 Jimesa javo jinazale navisazo,Nahamwe hauchi hanazeneka visazo.
9 Vanambe ngwavo, “Mwanangula veya chinyingi?Veya mwalumbunwina mazu?Pamonyi vaze vanalitwamina kwamwa mavele kalinwomu,Vaze vanasumuka kumavele.
10 Mwomwo nasweze, lelo lushimbi hamene lushimbi, lelo lushimbi hamene lushimbi,Lelo lundongi hamene lundongi, lelo lundongi hamene lundongi,*+Chindende aha, chindende haze.”
11 Mwakahanjika kuli vatu ava kuhichila muli vaze vahanjika nakukukuma,* vaze vahanjika lilimi lyeka.+
12 Avalwezele ngwenyi: “Echi chikiko chihela chakunokela. Vaze vanazeye vanoke. Echi chikiko chihela chakulihizumwina.” Oloze vakiko vakanyine kwivwilila.+
13 Shikaho ano mazu aYehova nawakatesamo kuli vakiko, akwamba ngwavo:“Lelo lushimbi hamene lushimbi, lelo lushimbi hamene lushimbi,Lelo lundongi hamene lundongi, lelo lundongi hamene lundongi,*+Chindende aha, chindende haze,”Mangana omu navakatambuka,Vakahukane nakuholoka ufutanyima,Kaha navakahokoka nakufwa mumiheto, nakuvakwata.+
14 Shikaho ivwenu mazu aYehova enu vaka-kulitukwojola,Enu vatwamina javatu muYelusalema.
15 Mwomwo munambe ngwenu:“Tunalishiki lushiko naKufwa,+Tunalikase chivwasano* naFuka.*Omu nalikahita livaji lyalinene,Etu kalyeshi kutuwanako,Mwomwo tunatenge makuli kupwa uchinyino wetu,Kaha tunaswame mumazu etu akwonga.”+
16 Shikaho Mwata Wakulitulaho Yehova nambe ngwenyi:“Nangwala lilolwa lyakweseka lyehi muZeyone kupwa chihela chakutungaho,+Likiko lilolwa lyamumbango lyandando yayinene+ lyachihela chakukola.+Weshowo mwafwelela lilolwa kana keshi kukalizakaminako.+
17 Nangukalingisa chiyulo chakwoloka kupwa mukole wakupimisa,+Kaha kwoloka nangukachilingisa kupwa chinoma chakusungamisa.*+Vula yamalolwa nayikakomba uchinyino wavo wamakuli,Kaha meya nawakazala hachihela chavo chakuswama.
18 Lushiko munalishiki naKufwa nalukakuma,Kaha chivwasano munalikase naFuka* kacheshi kukazamako.+Omu nalikahita livaji lyangolo,Nalikamichika.
19 Omu nalihitanga livaji,Nalimikombanga.+Mwomwo nalihitanga chimene hichimene,Nalihitanga musana naufuku.Woma naukalingisa vatu vakamone mwalumbunukila vyuma vevwile.”*
20 Kahela kanahihi, mutu keshi kuhasa kutandavalako,Lihina lyakulifwika lyalindende, mutu keshi kuhasa kulifwikalyoko.
21 Yehova mwakakatuka nge muze akatukile haPili yaPelajime.Mwakemana nge muze emanyine muchinema* chakwakamwihi naNgiveyone,+Mangana akazate milimo yenyi yakukomwesa,Mangana akatesemo milimo yenyi yayinene.+
22 Shikaho kanda namuleununako,+Kuchina malenge vanamikase navawajichika chikuma,Mwomwo ngunevu omu nahanjika Mwata Wakulitulaho Yehova wamayongomena,Ngwenyi lifuchi lyosena* vanajinyi kulinongesa.+
23 Tengelekenu matwitwi enu mungwivwilile.Ivwililenu vyuma nanguhanjika.
24 Uno muka-kulima, eji kulimanga lika chakuzeneka kutumba jimbuto nyi?Kutala eji kuchipulanga lika nakupupulula nyi?+
25 Omu mwalinga nge hanasalamisa lyehi mavu,Kutala keshi kukuva kumine yilava nakutumba kumine yikwavoko nyi?Kutala keshi kutumba tiliku, namasangu, nambale hamisuka mwayitumbila,Nakutumba nawa sepelete*+ kujisembwa jawandeko nyi?
26 Mwomwo Kalunga eji kumunangulanga* mujila yakwoloka,Kalunga kenyi eji kumulongesanga.+
27 Kumine yilava kaveshi kuyizungula nachileyi chakuzungwisako,+Kaha kafumbo kalitemba kaveshi kukahichisa hakumineko.Kumine yilava veji kuyizungwisanga chitondo,Kaha kumine yikwavo veji kuyizungwisanga mbwechi.
28 Kutala mutu eji kuzungulanga manona aunga wakwochesa mbolo nakuwachika chikichiki nyi?Nduma, keshi kuwazungula halwola lwalusukuko.+Omu eji kuhichisangaho chileyi chenyi chakukoka natuvalu,Keshi kuwazungula nakuwachika chikichikiko.+
29 Navyevi nawa vyeji kufumanga kuli Yehova wamayongomena,Uze ukwechi punga* yamwaza,Uze ukwechi milimo yenyi yakukomwesa.*+
Kwinyikila Chamwishi
^ Pamo vali nakuvuluka Samaliya nganda yayinene.
^ Chipwe “wakulivwimba.”
^ Chipwe “wakulivwimba.”
^ Chipwe “Mukole wakupimisa hamukole wakupimisa, mukole wakupimisa hamukole wakupimisa.”
^ Hepe., “vaze vamivumbo yakukukuma.”
^ Chipwe “Mukole wakupimisa hamukole wakupimisa, mukole wakupimisa hamukole wakupimisa.”
^ Chipwe pamo, “Tunatesamo chakumwenesa.”
^ Chipwe “naSheyole,” kulumbununa fuka yavatu vosena. Tala Mukana waMazu.
^ Chipwe “kupwa lungoji lwakupimisa lwakuzezalala.”
^ Chipwe “naSheyole,” kulumbununa fuka yavatu vosena. Tala Mukana waMazu.
^ Chipwe pamo, “Omu navakamona mwalumbunukila vyuma, navakevwa woma.”
^ Chipwe “muchana.”
^ Chipwe “mavu osena.”
^ Sepelete himuyachi watiliku uze valiminenga muEjipitu.
^ Chipwe “kumuzangamisanga; kumuhanjikilanga.”
^ Chipwe “ukwechi kujina.”
^ Chipwe “Uze ukwechi mangana amwenemwene, akukomwesa.”
