Isaya 29:1-24
29 “Lamba kunganda yaAlyele,* Alyele yize Ndavichi atungilemo chilombo chenyi.+Lingenunga lika viwanyino+ vyenuMwaka himwaka.
2 Nangukamwenesa Alyele+ vihuli,Kaha nakukapwa kulishona nakulila jingungu,+Nayikapwa nge chihanda chahelu chalijiko lyakulumbila lyaKalunga.+
3 Ove nganda, nangukakutungila chilombo jingulwishi ndo mangana ngukakunyemukile,Nangukakuhaka muchingombela nachipato chavitondo,Nangukakujingulwisa kembwe.+
4 Nangukakwinyisa,Kaha naukahanjikila mumavu,Vyuma naukahanjika navikalitanga mulukungu.Lizu lyove nalikevwakanyina mumavu,+Nalikevwakana nge lizu lyamuka-kutahisa vashipilitu,Mazu ove nawakanyinyita mumavu.
5 Lizavu lyavaka-kole jove* nalikapwa nge lukungu,+Lizavu lyavaka-chilala nalikapwa nge muzungu uze uli nakupekumuka.+Chuma kana nachikasoloka mukukasumuna, mukukemwina chaliso.+
6 Oloze Yehova wamayongomena mwakakupulululaNamikalateta, namindenda, navyema vyavivulu,Napeho yanyamanganda, nachijimbilanganga, namilangi yakakahya.”+
7 Kaha vyuma nalikajina liyongomena lyavaka-mafuchi osena vyakulwa jita nanganda yaAlyele,+Vize navakajina vosena vaze vali nakuyizungisa,Vaze vanayihake muchingombela natuposhi twavo,Navaze vali nakuyimwenesa vihuli,Navikapwa nge hichilota kaha, nge hichuma chakumwenesa naufuku.
8 Nge muze mutu ali nazala mwalota ali nakulya,Oloze mwahinduka nazala yenyi,Nge muze mutu ali nalipwila mwalota ali nakunwa meya,Oloze mwahinduka nazeye nalipwila lyenyi,Mukiko nachikapwa nakuliyongomena lyavaka-mafuchi osenaLize lili nakulwa jita naPili yaZeyone.+
9 Fwenu chishima, likomokelenu.+Lifwikenu kumeso muhone kumona.+Vanapende, oloze keshi navinyoko.Vali nakutalyangila, oloze keshi mwomwo yakunwa walako.
10 Yehova namilingisa musavale tulo twatuvulu.+Nafwiki meso enu, akiko vapolofweto,+Nafwiki mitwe yenu, yikiko vaka-kumona vyakumwenesa.+
11 Vyuma vyakumwenesa vyosena muli nakumona kuli enu vinapu nge mazu amumukanda uze vanalamika katachikijilo.+ Omu navauhana kuli mutu uze atachikiza kutanga ngwavo: “Tanga nalizu lyahelu,” ikiye himwamba ngwenyi: “Kangweshi kuhasa kutangako, mwomwo vanaulamika katachikijilo.”
12 Oloze omu navauhana kuli mutu uze katachikiza kutangako ngwavo: “Tanga mukandou,” ikiye himwamba ngwenyi: “Kangwatachikiza kutangako.”
13 Yehova nambe ngwenyi: “Vatu kana ava veji kupandamanga kuli ami namazu amutunwa twavo,Veji kunguvumbikanga kaha namivumbo yavo,+Oloze michima yavo yili kwakusuku nayami.Jishimbi javatu jize veji kuvanangulanga jikiko jeji kuvalingisanga vangwivwe woma.+
14 Ami yami nangukalinga cheka vyuma vyakukomwesa kuli vatu ava,+Vyuma vyakukomwesa vize navifwisa vatu chishima.Mangana avatu javo vamangana nawakakuma.Kaha kunangakana chavatu javo vakuzangama nachikajimbangana.”+
15 Lamba kuli vaze vali nakufwila kuswekela Yehova+ vyuma vanajinyi kulinga.Vilinga vyavo veji kuvilingilanga mumilima,Kaha veji kulyambanga ngwavo: “Iyaze mwatumona?Iyaze atutachikiza?”+
16 Mweji kuhingikanga* vyuma.Uno muka-kutenga vyuma vyaunonga vanahase kumweseka hamwe naunonga nyi?+Uno chuma chize vanatenge chinahase kwamba kuli uze nachitenge ngwacho:“Keshi yove unangutengeko” nyi?+Uno chuma vanaumbu chinahase kwamba kuli ou nachiumbu ngwacho:“Kawanangakanako” nyi?+
17 Mukapyapya kakandende kaha, Levanone navakayalumuna kupwa milemba,+Kaha eyi milemba navakayimona kupwa nge musenge.+
18 Halikumbi lize, tujika matwitwi navakevwa mazu amumukanda,Kaha meso atupuputa nawakamona mumilima.+
19 Vatu vavavwovu navakawahilila chikuma muli Yehova,Kaha vaka-kuhutwa navakalisambila muli Ou Wajila waIsalele.+
20 Mwomwo vaka-chilala kaveshi kukapwako chekako,Vaka-kulitukwojola navakanonga,Kaha vaze vafwila kulemeka vakwavo navakavanongesa.+
21 Navakanongesa nawa vaze veji kuvulumwisanga vakwavo namazu avo,Navaze veji kutelanga miheto vaka-kuhakwila* vatu kuchikolo changanda,+Navaze veji kusopesanga vaka-kwoloka mujila yakuhenga naunjiho wamakuli.+
22 Shikaho Yehova uze asokwele Apalahama+ nambe kuli vaze vakuzuvo yaYakova ngwenyi:“Yakova keshi kukevwa jino sonyiko,Kaha keshi kukahomba cheka kumesoko.*+
23 Omu mwakamona vana venyiVaze vapwa milimo yamavoko ami vali hamwe nayikiye,+Navakajilika lijina lyami.Navakajilika Ou Wajila waYakova,Kaha navakevwanga woma Kalunga kaIsalele.+
24 Vaze vashinganyeka vyuma vyavipi mumichima yavo navakapwa vakunangakana,Kaha vaka-kuyayavala navaketavila kuvanangula jindongi.”
Kwinyikila Chamwishi
^ Kulumbununa pamo, “Chihanda Chakwilu chaLijiko Lyakulumbila lyaKalunga,” pamo vali nakuvuluka Yelusalema.
^ Hepe., “lyavatu veka.”
^ Chipwe “kutangisanga.”
^ Hepe., “vaka-kuhanjikila.”
^ Kulumbununa, kuhomba mwomwo yasonyi nakusauka.
