Isaya 3:1-26
3 Mwata wamuchano, Yehova wamayongomena,Mwafumisa vyuma vyosena vize vyeji kuvakafwanga muYelusalema namuYuta,Mwafumisamo vyakulya nameya,+
2 Mwafumisamo vatu vangolo navindume,Navaka-kuyula navapolofweto,+ navaka-kutaha navakulwane,
3 Natupitau twamazavu amaswalale 50,+ navatu vavalemu, navaka-kulweza mangana,Navakuluwa mukulinga visava, navaka-kupanda vakukuluka malambu.+
4 Nangukalingisa vanyike vakapwe vilolo javo,Kaha vatu vamyalumyalu navakavayulanga.
5 Vatu navakalishinyinyikanga mwavomwavo,Mutu himutu mwakashinyinyika mukwavo.+Kanyike mwakatwa mbandu mukulwane,Kaha vatu vakuzeneka ulemu navakalikanga kuli vatu vavalemu.+
6 Mutu himutu mwakakwata ndumbwenyi muzuvo yaise nakwamba ngwenyi:“Uli nachikuto, pwako umuka-kutuyula.Pwako umuka-kutala malala anganda yinalyenyeka.”
7 Oloze mwakakana halikumbi lize nakwamba ngwenyi:“Kangweshi kupwa ngumuka-kumikasa hajimbanduko,*Kangweshi navyakulya chipwe vyakuvwala muzuvo yamiko.Kanda namungutongola kupwa ngumuka-kuyula vatuko.”
8 Yelusalema yinahukana,Kaha Yuta yinalimbuka,Mwomwo vanalikange kuli Yehova mumazu namuvilinga vyavo.Vananjinjavala kumeso enyi.*+
9 Solokeso yahameso avo yeji kuhananga unjiho wakuvapayisa,Veji kulisasanga hajishili javo nge vatu vamuSotome.+Kavasweka jishili javoko.Lamba kuli vakiko,* mwomwo vali nakulinehela vihuli vavene.
10 Lweza vaka-kwoloka ngwove vyuma navikavawahilanga,Navakavafweta havyuma vyamwaza veji kulinganga.*+
11 Lamba kuli vaka-kuhuka!Lupi nalukavawana,Vyuma vanalinginga kuli vakwavo navakavalingavyo navakiko.
12 Vaka-kuzachisa vatu jami milimo vanapu vachilala,Vali nakuvayulanga kumapwevo.Enu vatu jami, vatwamina jenu vali nakumihungumwisa,Vali nakuluwanganyisanga jijila jenu.+
13 Yehova mwakatuka nakuvapayisa,Mwemana nakusopesa vatu veka naveka.
14 Yehova mwasopesa vakulwane navilolo javatu jenyi.“Enu munocho mande amivinyo,Vyuma munevi kuli vaka-kuhutwa vili mujizuvo jenu.+
15 Muli nakuyanjisa vatu jami,Muli nakushinyinyika vaka-kuhutwa.”+ Omu mukiko mwanambe Mwata Wakulitulaho, Yehova wamayongomena.
16 Yehova nambe ngwenyi: “Vana vaZeyone vamapwevo vanapu vakulivwimba,Veji kutambukanga namituto,*Nakunjikangila nameso akulezwola,Veji kunehanga vivumo hakutambuka mwomwo yamanjolo veji kuvwalanga kutusendengele twavo,
17 Yehova mwakaveta vana vaZeyone vamapwevo namusongo wamavanda mumitwe yavo,Kaha Yehova mwakavafukula hajiholo javo.+
18 Halikumbi lize Yehova mwakavatambula manjolo veji kuvwalanga kutusendengele twavo,Najinguwa veji kukasanga kujikambu javo, navimbilingwa vyamujingulule,+
19 Mwakavatambula vingelengele vyakumatwitwi avo, namaseka, naviwuva vyakumeso,
20 Navitambala vyavo, namalenge avo akutusendengele, namihya yamujitulo,Natuvipau twakulamina maji alivumba lyamwaza, namikalo,
21 Natuzeya twakuminwe, natuzeya twahamizulu,
22 Mwakavatambula vikuto, nauvwalo wavo, najindeleji javo, natungonga twavo,
23 Natuvitalilo+ twavo twakutambuka natwo, namahina avo alinyu,*Namahina avo akujinga kumitwe, naviwuva vyavo vyakumeso.
24 Nakukapwa livumba lyalipi muchishishisa chalivumba lyamaji ambalasamu.+Navakavwala mikole muchishishisa chakuvwala mihya.Navakapwa nalwanja+ muchishishisa chakupwa najikambu.Navakavwala vikeleyi+ muchishishisa chakuvwala uvwalo wamwaza.Navakavangoma tutachikijilo muchishishisa chakusoloka kanawa.
25 Vatu jove navakalindumuka kujipoko jamikwale,Vatu jove vangolo navakalindumuka kujita.+
26 Vikolo vyaZeyone navikayengayenga nakulishona,+Kaha Zeyone mwakatwama hamavu nakusala uka wenyi.”+
Kwinyikila Chamwishi
^ Chipwe “ngumuka-kumyukako.”
^ Hepe., “kumeso aupahu wenyi.”
^ Chipwe “kumyono yavo.”
^ Hepe., “Navakalya mihako yavilinga vyavo.”
^ Hepe., “Veji kutambukanga nakuzozomona jishingo javo.”
^ Chipwe “nauvwalo wavo wamukachi.”
