Isaya 30:1-33
30 Yehova nambe ngwenyi: “Lamba kuli vana vakunjinjavala,+Vaze veji kulinganga vyuma vize kangwajinyineko,+Vaze veji kulikasanga vivwasano* vize vinalimbalaka nomu munayi muchima wami,*Mangana vawezele kushili yavo.
2 Vanayi kuEjipitu+ chakuzeneka kungwihula,*+Vanayi mangana ngwavo vakavakinge kuli Fwalo,*Mangana ngwavo vakaswame mumuvule waEjipitu.
3 Oloze mukingo waFwalo naukavevwisa sonyi,Kaha kuswama mumuvule waEjipitu nachikavasawisa.+
4 Mwomwo vilolo jenyi vali muZowane,+Kaha vatemesa jenyi vanahete muHanese.
5 Oloze vosena navakavevwisa sonyiKuli vatu vaze kaveshi kuhasa kuvanganyalisako,Vaze kaveshi kuhasa kuvakafwako,Shina kuvevwisa kaha sonyi nakuvasawisa.”+
6 Awa akiko mazu alupi luze nalukeza kutunyama vakusulo:Navakahita mulifuchi lyavihuli, lyaluyando,Mulifuchi lyavandumba, vandumba vakutahwoka,Mulifuchi lyaviyenge, lyamanoka vaulembe nge kakahya,Oku vanambate luheto lwavo hajinyima javimbulu,Navikumba vyavo hajitunda javangamela.Oloze vyuma kanevi kavyeshi kukanganyalisa vatuko.
7 Mwomwo kukafwa chakulifuchi lyaEjipitu chinapu chamokomoko.+Shikaho ngunavulukila lifuchi eli ngwami: “Lahave+ uze eji kutwamanga mbombomane.”
8 “Ngocho, yako ukasoneke vyuma kana hachihanda chalilolwa hameso avo,Ukavisoneke mumukanda,+Mangana kulutwe,Vikapwe unjiho wahaya myaka yosena.+
9 Mwomwo vanapu vatu vakulikanga,+ vaka-kwonga,+Vana vaze kavasaka kwivwilila jishimbi* jaYehovako.+
10 Vanambe kuli vaka-kumona vyakulutwe ngwavo, ‘Kanda namumonako,’Vanambe kuli vaka-kumona vyakumwenesa ngwavo: ‘Kanda namutulweza vyakumwenesa vyamuchanoko.+Tulwezenu vyuma vyamakuli.* Monenu vyakumwenesa vyakutangisa.+
11 Fumenu mujila. Pyapumukenu mujila.Litwaminenu kutulweza vyaYou Wajila waIsalele.’”+
12 Shikaho Ou Wajila waIsalele nambe ngwenyi:“Hakuwana nge munakane mazu ami,+Oloze munakave vyuma vyamakuli, vyakutangisa,Nakuvifwelela,+
13 Ngocho kuhenga chenu nachikapwa nge chihanda chakembwe chize chili namwaji,Nge kembwe yayisuku yize yinatengama mangana yiholoke.Kuholoka chayo nachiza mukukasumuna, mukukemwina chaliso.
14 Navakayipuzula nge mulondo waunene waunonga,Naukachikika chikichiki, kakweshi kukalitula kachihanda numba kamwekoKakwokwela kakahya halijiko,Chipwe kakuswichisa meya muchimbwetengeleko.”*
15 Mwata Wakulitulaho Yehova, Ou Wajila waIsalele nambe ngwenyi:“Kachi nge namuunda nakukinduluka kuli ami, kaha nangumilwila.Namukwata ngolo kachi nge namuunda nakungufwelela.”+Oloze enu kamwasakileko.+
16 Enu munambe ngwenu: “Nduma, natukachina hatuvalu.”Mukiko vene, kuchinanyi namukachina.
Munambe ngwenu: “Natukanyina hatuvalu vajimbushi.”+Oloze vaze navakamihangasana navakapwa vajimbushi chikuma.+
17 Vatu 1,000 navakevwa woma mutu umwe.+Vatu vatanu navakamivwisa woma, kaha namukachina.Vaze navakasalaho hali enu navakapwa nge chitondo chachisuku vanajiki helu lyapili,Nge chitondo vanajiki hapili mangana chipwenga chinjikizo.+
18 Oloze Yehova ali nakumitalilila chikoki* mangana amivwile uselewa,+Mwakatuka mangana amitetele.+Mwomwo Yehova apwa Kalunga wachiyulo.+Vawahilila vaze veji kumuvandaminanga.*+
19 Omu namukatwamanga muZeyone, muYelusalema,+ kamweshi kukalilako.+ Mwakamivwila uselewa omu mwakevwa kawelele kenu. Mwakamikumbulula washiwashi hakwivwa mazu enu.+
20 Numba tuhu Yehova mwakaminehela vihuli kupwa nge hikulya chenu, namakava kupwa nge meya enu,+ oloze Muka-kuminangula Wamunene keshi kukalisweka kuli enuko. Namukamona Muka-kuminangula Wamunene+ nameso enu.
21 Kachi nge munayi kuchilyo chipwe nge munayi kuchimoswe,+ namukevwa lizu munyima yenu lyakwamba ngwalyo: “Eyi yikiko jila.+ Tambukenungamo.”
22 Namukapihisa palata munashili hamakombelo enu akusonga, naulu munatatula hamakombelo enu akuzuzulula.+ Namukavimbila nge lihina lize avwalanga pwevo uze ali kukakweji nakwamba ngwenu, “Viyenga tuhu.”*+
23 Mwakanokesa vula hambuto munatumbu,+ kaha vyakulya vize navikafuma mumavu navikavula, navikapwanga vyamaji.+ Halikumbi lize, vimuna jenu navakalila kumaulilo amanene.+
24 Kaha vangombe navimbulu vakulimisa navakalyanga vyakulya vyakuchingasana kanawa vize vanapepe najifwosholo najingalafwa.
25 Hajipili jajisuku josena, jajinene najeji jajindende nahakapwanga vana vatulwiji, namihongi yameya+ omu natukashiwojoka tuposhi halikumbi lyakunongesa chachinene.
26 Omu Yehova mwakakasa vatu jenyi vaze vanalemana,*+ nakuka jimbandu jajinene jize avatwile,+ myeji yakakweji nayikatamuka chikuma nge kumunyika chalikumbi, kaha kumunyika chalikumbi limwe nachikatamuka mapapa 7+ kwijiva nge kumunyika chamakumbi 7.
27 Talenu! Yehova* ali nakwiza kufuma kwakusuku,Ali nakwiza namatoto amanene, namavwi akwilava wi,Mivumbo yenyi yili nakuchikima mwomwo yamatoto,Kaha lilimi lyenyi linapu nge kakahya kakunongesa.+
28 Shipilitu* yenyi yinapu nge kalwiji uze nazale nakuheta mushingo,Mangana anyunge vaka-mafuchi mulunyungo lwakunongesa.*Kaha vatu veka naveka navakapwa namikole mujimbangi javo+ yize yeji kuvahungumwisanga.
29 Mwaso wenu naukapwa nge mwaso uze munembi naufukuHakuliwahishila* vyachiwanyino,+Michima yenu nayikawahilila nganaMwamutu uze ali nakutambuka oku ali nakwimba panda yenyiHakuya kupili yaYehova, Lilolwa lyaIsalele.+
30 Yehova mwalingisa lizu lyenyi lyalinene+ likevwakane,Mwakasolola livoko lyenyi+ omu mwakalyolwela hamavu namatoto amanene,+Namilangi yakakahya kakunongesa,+Navula yamishilinjinji,+ navula yamikalateta, navula yamalolwa.+
31 VaAsulya navakalichikimina nawoma mwomwo yalizu lyaYehova.+Mwakavaveta namukombo.+
32 Omu Yehova mwakahwingisa mukombo wenyiUze mwakavetesa vaAsulya,Omu mwakolola livoko lyenyi nakulwa navo jita,+Nakukavuma tungoma natulyalya.+
33 Mwomwo Tofwete*+ yenyi yakulongesa lyehi.Vanayilongesela namwangana nawa.+Nakunamisa mwakulumbika jikunyi nakutohwesamo,Nahakemo jikunyi jajivulu nakakahya.Kuhwima chamukanwa kaYehova chinapu nge kalwiji wasulufulu,Kaha nachikaswamika Tofwete kakahya.
Kwinyikila Chamwishi
^ Hepe., “Vaze veji kumwanganga wala,” kulumbununa kulishika lushiko.
^ Hepe., “shipilitu yami.”
^ Chipwe “chakuzeneka kwihula kanwa kami.”
^ Hepe., “ngwavo vengile muchihela chakukola chaFwalo.”
^ Chipwe “jindongi.”
^ Hepe., “vyakulambisa.”
^ Chipwe pamo, “mulishimako.”
^ Chipwe “nakumivandamina.”
^ Chipwe “kumutalililanga.”
^ Chipwe pamo, “nakuvivuluka ngwenu vili namajilo.”
^ Chipwe “vanahokoka.”
^ Hepe., “Lijina lyaYehova.”
^ Hepe., “mulunyungo lwamokomoko.”
^ Chipwe “Kuhwima.”
^ Chipwe “Hakulijilika.”
^ “Tofwete” hano vayizachisa mujila yachifwanyisa kupwa chihela chakakahya chize chemanyinako kunongesa.
