Isaya 37:1-38
37 Omu mwangana Hezekiya evwile mazu kana, apihililile nakupula uvwalo wenyi, avwalile chikeleyi chenyi nakuya nakwingila muzuvo yaYehova.+
2 Mwangana atumine Elyakime uze apwile muka-kutala zuvo* yamwangana, naShevene muka-kusoneka, navakulwane javapilishitu vayenga kuli kapolofweto Isaya+ mwanaAmoze. Vayile oku vanavwale vikeleyi.
3 Vambile kuli ikiye ngwavo: “Hezekiya nambe ngwenyi: ‘Likumbi lyalelo linapu likumbi lyaluyando, hilikumbi lyakututukana, lyakutusaula. Tunapu nge pwevo uze mwasaka kusapuluka, oloze ngolo jakusapuluka jauchi.+
4 Pamo Yehova Kalunga kove nevu mazu nahanjika Lavashake, ou vanatumu kuli mwata wenyi mwangana waAsulya asaule Kalunga ou ayoya.+ Kaha mwamuzangamisa hamazu awa nalivwila lyehi Yehova Kalunga kove. Shikaho valombeleko+ ava vanasaleho.’”+
5 Omu vangamba jamwangana Hezekiya valingile hivanamulweze lyehi Isaya,+
6 Isaya ambile kuli vakiko ngwenyi: “Mulwezenu mwata wenu ngwenu, ‘Yehova nambe ngwenyi: “Kanda nawivwa woma+ wamazu unevu awa vanangusaula vangamba jamwangana waAsulyako.+
7 Nanguhaka vishinganyeka mumuchima wenyi,* kaha mwevwa mujimbu umwe nakukinduluka kulifuchi lyenyi.+ Kaha nangukamunongesela mulifuchi lyenyi napoko yamukwale.”’”+
8 Omu Lavashake evwile ngwavo mwangana waAsulya nafumu lyehi kuLakishe, akindulukile kuli ikiye, kaha amuwanyine ali nakuzunga navatu vamunganda yaLivina.+
9 Mwangana waAsulya evwile ngwavo Mwangana Chilihaka wakuEchopa neza nakulwa jita naikiye. Omu evwile ngocho, atumine cheka valuwa kuli Hezekiya+ ngwenyi:
10 “Mulwezenu Hezekiya mwangana wavaYuta ngwenu, ‘Kanda nawitavila Kalunga kove ou wafwelela akwonge ngwenyi: “Yelusalema kaveshi kuyihana mumavoko amwangana waAsulyako.”+
11 Unevu lyehi vyuma vanalinginga vamyangana jaAsulya kumafuchi osena, vananongesanga mafuchi kana.+ Kaha ove yove nauhasa kuyovoka numba?
12 Uno tulunga vamumafuchi vaze vanongesele kuli vakakuluka jami vahashile kulwila mafuchi avo numba?+ Uno jinganda jaNgozane, naHalane,+ naLezefwe jili kulihi? Nyi vatu vakuEtene vaze vapwile muTelasale vali kulihi?
13 Uno mwangana waHamate, namwangana waAlapate, namwangana wanganda yaSefwalavaime,+ namwangana wanganda yaHena, namwangana wanganda yaIva vali kulihi?’”
14 Hezekiya atambwile yize mikanda mumavoko avaze valuwa. Kufumaho ayile muzuvo yaYehova, kaha atanduwile yize mikanda nakuyala kumeso aYehova.+
15 Jino Hezekiya alombele kuli Yehova+ ngwenyi:
16 “Ove Yehova wamayongomena,+ Kalunga kaIsalele, ove unatwame helu* lyavakeluve, ove yove kaha Kalunga wamuchano hamawangana osena ahamavu. Ove yove watengele melu namavu.
17 Ove Yehova, tengeleka matwitwi ove wivwilile.+ Ove Yehova, tona umone.+ Ivwa mazu natumu Senakelive akukutoleka ove Kalunga wakuyoya.+
18 Mwamuchano vene ove Yehova, vamyangana jaAsulya vananongesa mafuchi osena+ nalifuchi lyavo hamwe.
19 Vanocho tulunga twavaka-mafuchi mukakahya,+ mwomwo kavapwa tulungako, oloze vapwa vakutenga kumavoko avatu kaha.+ Vanapu tulunga vamitondo namalolwa, shikaho vanavanongesela.
20 Ngocho jino, ove Yehova Kalunga ketu, tuyovole mulivoko lyenyi mangana mawangana ahamavu osena atachikize ngwawo ove Yehova yove kaha Kalunga uka wove.”+
21 Jino Isaya mwanaAmoze atumine mazu ano kuli Hezekiya ngwenyi: “Yehova Kalunga kaIsalele nambe ngwenyi, ‘Hakuwana nge unalombo kuli ami hali Senakelive mwangana waAsulya,+
22 ngocho awa akiko mazu nahanjika Yehova hali ikiye ngwenyi:“Mwanapwevo Zeyone nakulumbilisa nakukutoleka.Mwanapwevo Yelusalema nanyengesa mutwe wenyi hali ove.
23 Iya unatoleka+ nakusaula?Iya unatenukila+Nakwandwila meso ove mukulivwimba?Unavilingi kuli Ou Wajila waIsalele.+
24 Unatoleka Yehova+ kuhichila muli vangamba jove, ngwove:‘Nangukanduka kujipili jajisuku+Namatemba ami ajita amavulu,Kusongosongo yaLevanone.Nanguteta mishitale yakuzandama muLevanone, naminjunyipe yamwaza.Nangwingila mulivunda lyayo, namuchipapa chayo.
25 Nangufula mashima nakunwamo meya,Nangumisa meya atulwiji* vamuEjipitu navilyachilo vyamahinji ami.’
26 Uno kavakulwezako numba? Ngwavijinyine* lyehi kushikulu.Ngwavilongesele* lyehi kumakumbi akunyima.+Shikaho nanguvilinga jino.+Naukanongesa jinganda jakukingiwa, kaha najikapwa malala.+
27 Vatu vamujinganda kana navakalizuzukila.Navakevwa woma nakusauka.Navakapwa nge vyuma vyakusoka hamavu vize vinalehuka.Navakapwa nge mwila wakusoka hamulungu wazuvo uze nauzuza napeho yizuma yakumututuko.
28 Ngunatachikiza vikilikita vyove vyosena,+Nomu weji kungukinjilanga namatoto,+
29 Ngunamono matoto ove unangukwachila,+ kaha kukangwoka chove nawa chinahete mumatwitwi ami.+Ngocho nangukoleka ulovo wami mumazulu ove, nakukasa lumingo+ kumivumbo yove,Nangukukindulwisa mujila wejile.”
30 “‘Echi chikiko nachikapwa chinjikizo kuli ove* chakwijivilaho vyuma kanevi: Uno mwaka namulya muzumba, kaha mwaka wamuchivali namukalya jimbuto jize najikasoka kumuzumba. Oloze mumwaka wamuchitatu katumbenu jimbuto nakujaha, kaha katumbenu nawa mivinyo nakulya mihako yayo.+
31 Vatu vakuzuvo yaYuta vaze navakayovoka, vaze navakasalaho,+ navakafukila ngana mwajimbuto jize jinasoko miji nakwima mihako.
32 Mwomwo muYelusalema namukalitula vasalaho, kaha kuPili yaZeyone+ nakukalitula vaze navakayovoka. Yehova wamayongomena nafwila kulinga chuma kanechi.+
33 “‘Omu mukiko nahanjika Yehova hali mwangana waAsulya+ ngwenyi:“Keshi kwingila munganda yinoko,+Chipwe kwasa mwivwi mungandako,Chipwe kulukuka nganda eyi nakepweko,Chipwe kuyilundwila milunduko.”’+
34 Yehova nambe ngwenyi: ‘Mwakinduluka mujila yize ezanga.Keshi kwingila munganda yinoko.
35 Nangukinga nganda eyi+ nakuyilwila mwomwo yalijina lyami+Nangamba yami Ndavichi+ nawa.’”
36 Jino kangelo kaYehova ayile muchilombo chavaAsulya, kaha ajihile vatu 185,000. Omu vahindukile vatu nachimene vamwene vivimbi kaha.+
37 Ngocho Senakelive mwangana waAsulya akindulukile kuNyineve,+ kaha akatwaminenga kuze.+
38 Omu Senakelive apwile nakulifukula muzuvo* yakalunga kenyi Nyishiloke, vana venyi vaAtalameleke naShaleze vamujihile napoko yamukwale,+ kaha vachinyinyine kungalila yaAlalate.+ Kaha mwanenyi Esale-hatone+ aswanyine hawangana.
Kwinyikila Chamwishi
^ Chipwe “nganda.”
^ Hepe., “Nanguhaka shipilitu muli ikiye.”
^ Chipwe pamo, “hakachi.”
^ Chipwe “Nangumisa tupila vaNyile.”
^ Hepe., “Ngwavilingile.”
^ Chipwe “Ngwavitengele.”
^ Kulumbununa, Hezekiya.
^ Chipwe “mutembele.”
