Isaya 38:1-22
38 Hamakumbi aze, Hezekiya avijile chikuma, kaha hasalile hahandende nakufwa.+ Jino kapolofweto Isaya+ mwanaAmoze ejile kuli ikiye nakumulweza ngwenyi: “Yehova nambe ngwenyi, ‘Shika vaze vakuzuvo yove, mwomwo naufwa, kaweshi kuyoyako.’”+
2 Ngocho Hezekiya alumukile nakutala kumbango, kaha alombele kuli Yehova ngwenyi:
3 “Ngunakulembelela ove Yehova, achanuke+ omu ngunakuzachilanga nakashishi namuchima wami wosena.+ Ngunalinginga vyuma vyamwaza kumeso ove.” Kaha Hezekiya alilile chikuma.
4 Jino Yehova ahanjikile kuli Isaya ngwenyi:
5 “Kinduluka kuli Hezekiya+ umulweze ngwove, ‘Yehova Kalunga kakakuluka yove Ndavichi nambe ngwenyi: “Kulomba chove ngunachivu,+ masoji ove nawa ngunawamono.+ Kukuyoya chove nanguhakilako myaka 15.+
6 Kaha nangukuyovola mumavoko amwangana waAsulya nakulwila nganda yino. Nangukinga nganda yino.+
7 Echi chikiko chinjikizo chakufuma kuli Yehova chakwijivilaho nge Yehova mwatesamo mazu nahanjika:+
8 Nangulingisa muvwimbimbi hajindondelo* jaAhaze uhiluke vimango 10 kunyima.”’”+ Ngocho uze muvwimbimbi wapwile hajindondelo wahilukile vimango 10 kunyima omu walingile hiunashikumuka lyehi hajindondelo.
9 Awa akiko mazu asonekele Hezekiya mwangana wavaYuta omu avijile nomu ahindukile kukuviza chenyi:
10 Ngwambile ngwami: “Nangwingila muvikolo vyaFuka*Hakachi kamyaka yakuyoya chami.Myaka yami yinasaleko vanayikehesa lyehi.”
11 Ngwambile ngwami: “Kangweshi kukamona Ya,* kangweshi kukamona Ya hano hamavuko.+Kangweshi kukamona cheka vatu vavatonyikoOmu nangukapwa navafu kuchihela kuze kakweshi vikilikitako.
12 Chihela chami chakutwama vanachijikula lyehi nakungutambulacho,+Vanachijikula nge mbalaka yakafunga.Kuyoya chami ngunachikoneka lyehi nge omu muka-kungunda mahina mwakoneka kusongo yalihina.Nangutete nge wanda uze vali nakutongesa.Ali nakufwila kungumanusula ufuku namusana.+
13 Ngweji kulivendejekanga ami ivene palanga nakuchimene.Ali nakuhokwojola vifuwa vyami vyosena kwijiva nge ndumba.Ali nakufwila kungumanusula ufuku namusana.+
14 Nguli nakusembaNge kapyasa, nge munyamba.*+Nguli nakulishimwoka nge kambowa.+Meso ami anafuvalala mwomwo yakushishika mwilu,+Kaha ngwambile ngwami, ‘Ove Yehova, ngunayande chikuma.
Ngukafwe.’*+
15 Nanguhanjika vyuma mukaze?Vyuma vize nahanjika kuli ami navilingi lyehi.Nangulinyisanga mukuyoya chami chosenaMwomwo ngunayande chikuma.
16 ‘Ove Yehova, havyumevi* hakiko veji kuyoyelanga vatu vosena,Hakiko nawa hapendamina kuyoya chami.Naungulingisa ngulikangule cheka nakungwitavisa nguyoye.+
17 Ngwamwene makava amavulu mukutela kutwama mukuunda.Oloze ove wanguyowele mangana nguzeneke kuya muwina wakunonga,+Mwomwo wanguzangile chikuma.Jishili jami josena unajimbili kunyima yove.*+
18 Mwomwo Fuka* kayeshi kuhasa kukutohwesako,+Kufwa kacheshi kuhasa kukwalisako.+Vaze navaya muwina kaveshi kuhasa kufwelela kushishika choveko.+
19 Vaze vali nakuyoya vanahase kukwalisa,Nganomu nguli nakukwalisa yami likumbi lyalelo.Chisemi walunga nahase kunangula vana venyi vyakushishika chove.+
20 Ove Yehova, ngulwile,Kaha natwimbanga myaso yami havisaji vyamikole+Muzuvo yaYehova+ mukuyoya chetu chosena.’”
21 Isaya ambile ngwenyi: “Nehenu chindanda chajikuyu jaumu vachishile halihute lyenyi mangana ahinduke.”+
22 Hezekiya ahulishile ngwenyi: “Chinjikizo muka naunguhana chakwijivilaho nge nanguya kuzuvo yaYehova?”+
Kwinyikila Chamwishi
^ Pamo eji jindondelo vajizachishilenga hakulava lwola, nge omu navazachisa kalikina kakulava lwola.
^ Chipwe “vyaSheyole,” kulumbununa fuka yavatu vosena. Tala Mukana waMazu.
^ “Ya” hilijina lyaYehova mukavatu.
^ Hepe., “Pwako uchijikilo chami.”
^ Chipwe pamo, “nge mulombwe.”
^ Kulumbununa, mazu aKalunga navilinga vyenyi.
^ Chipwe “unajifumisa kumeso ove.”
^ Chipwe “Sheyole,” kulumbununa fuka yavatu vosena. Tala Mukana waMazu.