Isaya 44:1-28
44 “Ivwilila ove ngamba yami Yakova,Ove Isalele, ove ngunasakula.+
2 Yehova Tengi yove,Ou akutengele,+Ou nakukafwenga kufuma vene mujimo lyanoko* nambe ngwenyi:‘Kanda nawivwa womako ove ngamba yami Yakova,+Ove Yeshulune,*+ ove ngunasakula.
3 Mwomwo nangukahana meya kuli vaze vanafu lipwila,*+Nangukahaka tulwiji vameya mulifuchi lyaumu.Nangukahingunwina shipilitu yami hali vana* vove,+Kaha nangukakisula vaka-tanga yove.
4 Navakasoka nge mwila wautute,+Nge mitondo yamipopela kutulwiji vameya.
5 Umwe mwakahanjikanga ngwenyi: “Ngwapwa ngumutu waYehova.”+Weka mwakaliluka lijina ngwenyi Yakova,Mukwavo mwakasoneka halivoko lyenyi ngwenyi: “Ngwapwa ngumutu waYehova.”Kaha mwakaliluka lijina ngwenyi Isalele.’
6 Yehova,Ou Mwangana wavaIsalele,+ ou Muka-kumusokola,+ Yehova wamayongomena nambe ngwenyi:‘Ami yami wakulivanga, yami nawa wakukuminyina.+Kakweshi Kalunga wekako shina yami kaha.+
7 Iyaze napu nge ami?+Ambulule, ahanjike nakusolola unjiho kuli ami.+Ambulule vyuma navisolokaNavize vili nakwiza kulutweNganomu ngunalinginga ami kufuma halwola luze ngwasakwile vatu vakushikulu.
8 Kanda namulichikiminako,Kanda namulizuzukila nawomako.+Uno muvosena kangwamilwezele chuma kana shimbu kanda chisoloke nyi?Enu munapu muvinjiho jami.+Kakweshi Kalunga wekako shina yami kaha.Kakweshi Lilolwa lyeka+ lize ngwatachikizako.’”
9 Vosena vaze veji kutenganga makombelo akusonga vanapu vamokomoko,Makombelo avo aze vazanga kaweshi kuvanganyalisako.+Ava vinjiho javo kavatachikiza chipwe kumona chuma numba chimweko.+Ngocho vaze veji kuwatenganga navakavevwisa sonyi.+
10 Mutu mukaze mwatenga kalunga chipwe likombelo lyakuzuzululaLize kalyeshi kumunganyalisako?+
11 Talenu! Masepa jenyi vosena navakavevwisa sonyi.+Vitotombwe vanapu hivatu vamokomoko.Vosena valikungulwile hamwe vemane.Navevwa woma nakwivwa sonyi.
12 Fuli eji kufulanga chikungo hamakala akakahya nachinoma chenyi.Eji kuchifulanga nasandu,Eji kuchipopanga nalivoko lyenyi lyangolo.+Kutwala muze himwevwa zala, kaha ngolo hinajimukuma.Eji kuzeyanga mwomwo yakuzeneka kunwa meya.
13 Muka-kusonga mitondo eji kutanduulanga mukole nakufunjika napemba yichila chuma mwasonga.Eji kuchiwahisanga nakwengo nakuchifunjika nachinoma chakufunjikisa.Eji kuchifwanyisanga kumutu,+Eji kuchiwahisanga kanawa nge mutu,Nakuchihaka muzuvo.*+
14 Kwatwama mutu umwe uze akwechi mulimo wakuteta mitondo yamishitale.Eji kusakulanga mutondo umwe, pamo muvalyu,Kaha eji kuwechanga ukole mumusenge.+Eji kutumbanga mulole, kaha vula hinayiulingisa ukole.
15 Kutwala muze, mutondo kana weji kupwanga jikunyi.Mutu eji kutetangako jikunyi jakwota.Eji kuwikanga kakahya nakwochaho mbolo.Kumutondo woumwe eji kutengangako kalunga nakulifukula kuli ikiye.Eji kutenganga likombelo lyakusonga nakulifukula kulikiko.+
16 Chipinji chimwe chamutondo eji kuchihakanga hajiko.Kaha eji kwochangaho nyama nakulya, kaha himwekuta.Eji kwotanga nawa kakahya nakwamba ngwenyi:“Ngunevu yuku. Nguli nakutala milangi yakakahya.”
17 Chize chinasaleko eji kuchitenganga likombelo lyakusonga nakupwa kalunga kenyi.Kaha eji kulifukulanga kulikiko nakulilemesa.Eji kulombanga kulikombelo kana ngwenyi:“Ngulwile mwomwo ove unapu ukalunga kami.”+
18 Kavatachikiza chuma numba chimweko,+ kavanangakanako,Mwomwo meso avo vanawafwiki, kaveshi kuhasa kumonako,Kaha kavatwama namuchima wamanganako.
19 Naumwe wauchi eji kushinganyekanga mumuchima wenyi,Naumwe wauchi anangakana nakupwa nachinyingi, nakwamba ngwenyi:“Chipinji chimwe chamutondo ngwachihakanga hajiko,Kaha hamakala akakahya ngwochangaho mbolo nanyama, kaha ngwalyanga.Kaha chize chinasaleko nguchitenge nawa chuma chaunyengwe?+Uno ngulemese chipinji* chamutondo nyi?”
20 Eji kulyanga uto.Muchima wenyi wakutangisa unamuhungumwisa.Keshi kuhasa kulilwila iveneko* chipwe kwamba ngwenyi:“Echi chuma chili mulivoko lyami lyachilyo chinapu chamokomoko.”
21 “Ove Yakova, ove Isalele anuka vyumevi,Mwomwo unapu ungamba yami.Ami yami ngunakutenge, kahove unapu ungamba yami.+Ove Isalele, kangweshi kukakuvulyamako.+
22 Nangukafwika milonga yove yakuzombwojoka jishimbi kwijiva nge ngunayifwiki nalivwi.+Nangukafwika jishili jove kwijiva nge ngunayifwiki nalivwi lilava.Kinduluka kuli ami mwomwo nangukusokola.+
23 Enu melu, likuwenu,Mwomwo Yehova nalingi chumechi.Enu mavu, twenu jingunda,Enu jipili, wahililenu,+Enu vipapa namitondo yenu yosena, wahililenu.Mwomwo Yehova nasokola Yakova,Nasolola ukelenga wenyi hali Isalele.”+
24 Yehova, ou Muka-kukusokola,+Ou akutengele mujimo lyanoko nambe ngwenyi:“Ami yami Yehova ou atengele vyuma vyosena.Yami ngwatanduwile melu,+Yami ngwalile mavu.+Iyaze apwile nayami hamwe?
25 Ngweji kuhonesanga vinjikizo vyavaka-kuhanjika vyuma vyamokomoko,*Yami ngweji kulingisanga vaka-kutaha vapwenga nge vileya.+Yami ngweji kuluwanganyisanga vaka-manganaNakulingisa chinyingi chavo chipwenga uleya.+
26 Yami ngweji kulingisanga mazu angamba yami atesemo,Yami ngweji kutesangamo vyuma vyakulutwe veji kuhanjikanga valuwa jami.+Yami ngunahanjika hali Yelusalema ngwami, ‘Vatu navakatwamangamo,’+Yami ngunahanjika hajinganda jamuYuta ngwami, ‘Navakajitungulula,+Jingundu jayo nawa nangukajitungulula.’+
27 Yami ngunambe meya amukalungalwiji ngwami, ‘Uma,Kaha nangukomisa tulwiji twove vosena.’+
28 Yami ngunahanjika hali Kuluse+ ngwami, ‘Apwa kafunga kami,Kaha mwatesamo vyuma vyosena ngunajinyi.’+Yami ngunahanjika hali Yelusalema ngwami, ‘Vatu navakatwamangamo,’Yami ngunahanjika hatembele ngwami, ‘Chihela chove navakachala.’”+
Kwinyikila Chamwishi
^ Chipwe “kufuma vene hakusemuka chove.”
^ Ulumbunwiso, “Mutu Wakwoloka,” eyi hivulukiso yayilemu yaIsalele.
^ Chipwe “kuli vaka-lifuchi lyakufwa lipwila.”
^ Hepe., “mbuto.”
^ Chipwe “mutembele yatuponya.”
^ Chipwe “chipinji chaumu.”
^ Chipwe “kulwila mwono wenyiko.”
^ Chipwe “vyavapolofweto vamakuli.”
