Isaya 51:1-23
51 “Enu muli nakufwila kupwa vakwoloka,Enu muli nakutondatonda Yehova, ngwivwililenu.Talenu kulilolwa kuze vamitoteleNakuchilolwa kuze vamifulile.
2 Talenu kuli senu ApalahamaNakuli Sala+ uze amisemene.*Apalahama apwile uka wenyi omu ngwamusanyikile,+Kaha ngwamukiswile nakumuhana vana vavavulu.+
3 Yehova mwakavendejeka Zeyone.+Mwakawahisa vyuma vyayo vize vinalyenyeka,+Mwakalingisa pambo yayo kupwa nge Etene,+Mwakalumuna likundu lyayo kupwa nge milemba yaYehova.+Namukapwanga kuwahilila nakulisamba,Namukapwanga myaso yamwaza yakusakwilila.+
4 Enu vatu jami, ngwivwililenu.Enu vaka-muyachi wami,+ tengelekenu matwitwi enu kuli ami.+Mwomwo nangukahana lushimbi,Kaha nangukalingisa chiyulo chami chikapwe nge musana kuli vatu veka naveka.+
5 Kwoloka chami chinapandama kwakamwihi.+Ulwilo wami uli nakwiza.+Nangukayula vatu veka naveka nangolo* jami.+Matungu nawakatalilila kuli ami,+Kaha nawakavandamina ngolo jami.
6 Andulenu meso enu mutale melu,Kaha talenu nawa mavu.Mwomwo melu nawakalelangana nge wishi.Mavu nawakazemwojoka nge uvwalo,Kaha vatu vatwamaho navakafwa nge tungunungunu.Oloze ulwilo wami naukelilanga,+Kwoloka chami kacheshi kukahonako.*+
7 Enu mwatachikiza kwoloka,Enu mwalama jishimbi* jami mumichima yenu,+ ngwivwililenu.Kanda namwivwa woma vatu vaze vali nakumitolekako,Kanda namulichikimina omu vali nakumitukanako.
8 Mwomwo tututu navakalya vatu kana kwijiva nge uvwalo.Tututu navakalya vatu kana kwijiva nge wanda.+Oloze kwoloka chami nachikelilanga haya myaka yosena,Ulwilo wami naukapwangako kuvisemunwino vyosena.”+
9 Ove livoko lyaYehova,+Tona! Tona! Pwako nangolo.Tona nge muze watonene kushikulu, nge muze watonene kuvisemunwino vyakunyima.Kumana keshi yove wachikile Lahaveko*+ nyi?Kumana keshi yove watuvile kanyama wamunene wamukalungalwijiko nyi?+
10 Uno keshi yove womishile kalungalwiji, meya amwambe wauneneko nyi?+Uno keshi yove womishile kalungalwiji nakupwa jila yakuhitamo vaze vasokweleko nyi?+
11 Vatu vaze nasokola Yehova navakakinduluka.+Navakeza kuZeyone oku vali nakutwa jingunda,+Navakawahililanga haya myaka yosena.+Navakakinyinyinanga nakulisamba,Kaha kaveshi kukalinyenga chipwe kulishimwokako.+
12 “Ami yami nguli nakumivendejeka.+Ikaze namwivwila woma mutu uze mwakafwa+Chipwe mwanamutu uze mwakazuza nge mwila wautute?
13 Ikaze mweji kuvulyaminanga Yehova Tengi yenu,+Uze atanduwile melu+ nakwala chihela chamavu?Makumbi osena mwevwilenga woma muka-kumiyanjisa*Kwijiva nge apwile nangolo jakuminongesa.Uno kulundundu yamuka-kumiyanjisa yili kulihize?
14 Uze vanakase malenge kalinwomu vamusokole.+Keshi kukafwa nakuya muwinako,Kaha keshi kukahona vyakulyako.
15 Ami yami Yehova Kalunga kenu,Uze eji kulingisanga kalungalwiji angwanjange nakukatula makimba.+Lijina lyami yami Yehova wamayongomena.+
16 Nangukahaka mazu ami mutunwa twenu,Nangukamifwika namuvule walivoko lyami,+Mangana ngukakanyike melu nakwala chihela chamavu,+Ngukambe kuli Zeyone ngwami, ‘Enu munapu muvatu jami.’+
17 Ove Yelusalema,+ ove unanu mulupasa lwautenu waYehova luze luli mulivoko lyenyi,Tona! Tona! Katuka.Unanu muchiloso,Unamanyisa vyuma vyakupendesa vyosena vize vyapwanga mulupasa.+
18 Havana vove vosena vaze wasemene kaheshi umwe ali nakukutetekelako.Havana vove vosena vaze walelele kaheshi umwe nakukwate kulivokoko.
19 Vyuma vivali evi navikakuwana.Navakakunongesa nakukwenyeka. Kaha zala napoko yamukwale nawa navikeza hali ove!+Iyaze mwakakwivwila keke?Iyaze mwakakuvendejeka?+
20 Vana vove vanalezumuka.+Vanasavajala kumakanyiko ajijila* josenaKwijiva nge mikoko vamuchipapa vaze vanafu mulyoji.Vanapende namatoto aYehova, vanapende namazu aKalunga kove akuvatenukila.”
21 Ove pwevo vanamwenesa malwa, ove unapende oloze keshi navinyoko,Ivwilila chumechi.
22 Mwata wove, Yehova Kalunga uze eji kukinganga vatu jenyi nambe ngwenyi:“Nangukutambula lupasa lwavyuma vyakupendesa kulivoko lyove,+Lupasa lwamatoto ami.Kaha kaweshi kukalunwa chekako.+
23 Nangukaluhana kuli vaka-kukuyanjisa,+Vaze vambile kuli ove* ngwavo, ‘Savala mangana tutambuke hanyima yove.’Ngocho watengele nyima yove kupwa nge mavu,Nge jila yavo yakutambukamo.”
Kwinyikila Chamwishi
^ Chipwe “uze aminehele namisongo yakusema.”
^ Hepe., “nalivoko.”
^ Chipwe “kaveshi kukachihokolako.”
^ Chipwe “jindongi.”
^ Tala Mukana waMazu.
^ Chipwe “muka-kumishinyinyika.”
^ Hepe., “kumitwe yajijila.”
^ Chipwe “kumwono wove.”
