Isaya 58:1-14
58 “Vilika nalizu lyakukanguka, kanda nauzeyako.Tezula lizu lyove nge luneta.Lweza vatu jami kulikanga chavo,+Lweza vaze vakuzuvo yaYakova jishili javo.
2 Veji kungutondatonda hakumbi hakumbi,Veji kulisololanga nge vasaka kutachikiza jijila jami,Veji kulisololanga nge hivaka-lifuchi vaze vanalinginga vyuma vyakwoloka,Vaze kavasezele chiyulo chaKalunga kavoko.+Vasaka kupandama kuli Kalunga,+Ngocho veji kunguhulisanga nguvayule mwakwoloka ngwavo:
3 ‘Ikaze weji kuzenekelanga kumona omu tweji kulijilikanga kulya?+Ikaze weji kuzenekelanga kumona omu tweji kuliyanjisanga etu vavene?’*+Halikumbi mweji kulijilikanga kulya mweji kufwilanga kaha kulinganyalisa enu vavene,Nakuyanjisa vaze veji kumizachilanga.+
4 Kulijilika chenu kulya cheji kukumanga navikokojola najindombo,Kaha mweji kulilukulanga jikonyi.Kamweshi kulijilika kulya ngana muze mweji kulinganga mangana mazu enu evwakane mwiluko.
5 Kutala echi chikiko vene kulijilika kulya ngwasakwileNgwami mutu aliyanjise ivene,Azeule mutwe wenyi nge liteve,Asavale havikeleyi namuuto nyi?Uno echi chikiko namwamba ngwenu kulijilika kulya, ngwenu hilikumbi lyakwivwisa Yehova kuwaha tahi?
6 Nduma. Kulijilika kulya ngwasakwile shina echi,Mufumise jikuli munakase vatu mujila yayipi,Mujitule mikole yakujitoka,+Musokole vaze munayanjisa,+Muhokole jitoka.
7 Mulipangile kulya chenu navaze vali nazala,+Munehe vaka-kuhutwa mujizuvo jenu vaze kaveshi namemboko,Muvwike vaze namumona ngwenu vali nauvu,+Muzeneke kuliula vausoko wenu.
8 Ngocho kumunyika chenu nachimunyika nge omu lyeji kumunyikanga likumbi hakututuka,+Kaha navamyuka washiwashi.Kwoloka chenu nachimitwaminyinanga,Upahu waYehova naumikinganga munyima yenu.+
9 Namusanyika, kaha Yehova mwamikumbulula.Namutwa kawelele, kaha mwamba ngwenyi, ‘Yami uno.’Kachi nge namufumisa jitoka muli enu,Nakuzeneka kwinyijeka vakwenu minwe nakuvamba vyuma vyavipi,+
10 Kachi nge namuhanako vaze vali nazala vyuma vize mwazanga,*+Nakusuulwisa vaze vanayanjisa,Kaha mumunyi wenu naumunyikanga mumilima,Milima nayipwa nge musana kuli enu.+
11 Yehova mwamitwaminyinanga lwola lwosena,Mwakamisuulwisa namulifuchi lyaumu.+Mwakajikijisa vifuwa vyenu,Kaha namukapwa nge milemba yakutukumwina kanawa meya,+Nge kaselwoke uze keshi kuma meyako.
12 Vatu navakatungulula jingundu mwomwo yayenu,+Kaha namukatungulula vihela vyavaka-visemunwino vyakunyima.+Navakamivulukanga ngwavo vaka-kutungulula jikembwe jakupuzuka,+Ngwavo vaka-kuwahisa jijila jakutwamako vatu.
13 Kachi nge namukana kulinganyalisa enu vavene halikumbi lyami lyajila+ mwomwo yaSambata,Kachi nge namuvuluka likumbi lyaSambata ngwenu likumbi lyakuwahilila, likumbi lyaYehova lyajila, likumbi lyalilemu,+Kachi nge likumbi kana namulimona kupwa lyalilemu nakukana kulinganyalisa enu vavene, nakuzeneka kuhanjika mazu amokomoko,
14 Kaha namukevwila kuwaha Yehova,Nangukamilingisa mukatambukile havihela vyakulunduka vyahamavu.+Nangukamilingisa mukalye kuuswana wakakuluka yenu Yakova,+Mwomwo Yehova nahanjikamo lyehi.”
