Isaya 6:1-13
6 Mumwaka uze afwile Mwangana Ujiya,+ ngwamwene Yehova natwame halitanda lize lyapwile helu hakuzandama,+ kaha chikuto chenyi chachisuku avwalile chazalishile mutembele mwosena.
2 Helu lyenyi hemanyine vaselafwe. Selafwe hiselafwe apwile namavava 6, kaha alifwikile mavava avali kumeso enyi, mavava avali kumahinji enyi, kaha mavava avali akiko atukilenga nawo.
3 Selafwe umwe atambakanyine mukwavo ngwenyi:“Wajila, wajila, wajila Yehova wamayongomena.+Hamavu hosena hazala upahu wenyi.”
4 Manungililo amikwilichi alinyikile mwomwo yamazu vatambakanyinenga,* kaha muzuvo mwazalile wishi.+
5 Jino ngwambile ngwami: “Mama leloNgunafu!*Mwomwo mivumbo yami kayatomako,Kaha vatu ngwatwama navo nawa mivumbo yavo kayatomako.+Mwomwo meso ami anamono Mwangana, Yehova wamayongomena.”
6 Jino selafwe umwe atukile nakwiza kuli ami, kaha mulivoko lyenyi mwapwile likala lyakakahya+ lize okwele nalumanya halijiko lyakulumbila.+
7 Alinangikile hakanwa kami nakwamba ngwenyi:“Tala! Eli likala linakwate hamivumbo yove.Kuhenga chove vanakufumisacho,Kaha shili yove vanakukonekelayo.”
8 Jino ngwevwile lizu lyaYehova ngwenyi: “Iya nangutuma? Iya mwatuyilako?”+ Kaha ngwamukumbulwile ngwami: “Yami uno. Ngutume.”+
9 Kaha angwambile ngwenyi, “Yako ukalweze vatu ava ngwove:‘Kwivwa namwivwanga vene,Oloze kavyeshi kumilumbunukilako.Kumona namumonanga vene,Oloze kamweshi kutachikizako.’+
10 Lingisa michima yavatu ava yimbumbule+Mangana vahone kumona mwalumbunukila vyuma,+Jika matwitwi avoMangana vahone kwivwa,Vafwike kumeso avoMangana vahone kumona,Kuchina navakinduluka vavoke.”
11 Jino ngwahulishile ngwami: “Ove Yehova, palanga nakumwaka uka?” Kaha angukumbulwile ngwenyi:“Palanga nomu najikashiuka jinganda josena nakupwa jingundu,Nomu jizuvo najikazeneka mutu wakutwamamo,Nomu lifuchi lyosena nalikalyenyeka nakusala lyamupolongwa.+
12 Palanga nomu Yehova mwakahangila vatu kwakusuku,+Nomu lifuchi lyosena nalikapwa ngundu lika.
13 “Oloze mulifuchi namukasala vyakusokesa mumakumi, kaha navikiko navakavyocha, nge omu navocha mutondo waunene uze vanapakula nakuseza chimbunji. Kaha chimbunji chawo ikiye muka-tanga wajila.”
Kwinyikila Chamwishi
^ Hepe., “yamazu vasanyikilenga.”
^ Hepe., “Vanangulingisa kupwa nguwahwilichi.”
