Isaya 60:1-22
60 “Ove pwevo,+ katuka, munyika, mwomwo kumunyika chove chineza.Upahu waYehova unamunyika hali ove.+
2 Tala! Milima nayikafwika hamavu,Mavwi elava nawakafwika vaka-mafuchi.Oloze Yehova mwakamunyika hali ove,Kaha upahu wenyi navakaumwena hali ove.
3 Vaka-mafuchi navakeza kumumunyi wove,+Vamyangana+ navakeza kukumunyika chaupahu wove.+
4 Andula meso ove utale kwosena.Vosena vali nakulikungulwila hamwe. Vali nakwiza kuli ove.Vana vove vamalunga vali nakwiza kufuma kwakusuku,+Vana vove vamapwevo vanavaveleka mujikondo.+
5 Halwola luze naukawahilila omu naukamona chuma kana,+Muchima wove naukaluta, naukasuuluka,Mwomwo luheto lwakukalungalwiji nalukeza kuli ove,Navikumba vyavaka-mafuchi nawa navikeza kuli ove.+
6 Mautanga avangamela nawakazala mulifuchi lyove,*Vana vavangamela vakuMichane navava vakuEfwa+ navakazala mulifuchi lyove.Vatu vosena vakuSheva navakeza.Navakaneha ulu nalavona.Navakavilikanga mujimbu wakumwalisa Yehova.+
7 Mautanga avimuna osena aKetale+ nawakalikungulwila kuli ove.Vizamba jamikoko vaNevayote+ navakakuzachilanga.Nangukavetavila omu navakeza kulijiko lyami lyakulumbila.+Nangukawahisa zuvo yami yaupahu.+
8 Veya ava vali nakuhita mwilu nge mavwi,Nge tukwilimba vaze vali nakwingila mujimbelo jajizuvo javo?
9 Matungu nawakatalilila kuli ami.+Mato akuTalashishe nawakalivanga,Nawakaneha vana vove kufuma kwakusuku,+Napalata yavo naulu wavo hamwe,Mangana vakalise lijina lyaYehova Kalunga kove, Ou Wajila waIsalele.Mwomwo mwakakutohwesa.*+
10 Vaka-mafuchi eka navakatunga jikembwe jove,Vamyangana javo navakakuzachilanga.+Ngwapihililile shikaho ngwakuvetele,Oloze nangukakutetela mwomwo ngunakwivwila uselewa.+
11 Vikolo vyove navikapwanga vyahululu lwola lwosena,+Kaveshi kukavisokako namusana naufuku,Mangana vakakunehelenga luheto lwavaka-mafuchi.Kaha vamyangana javo vakiko navakalivanga kulinga ngocho.+
12 Lifuchi chipwe wangana uze naukakana kukuzachila navakaunongesa,Vaka-mafuchi vaze navakakana kukuzachila navakavanongesa ndolokoto.+
13 Upahu wakuLevanone,+Namitondo yaminjunyipe, namiwashi, namishipulese navikeza kuli ove,+Mangana vakawahise chihela chami chajila.Ngocho nangukatohwesa chihela chakulyata mahinji ami.+
14 Vana vavaze vakuyanjishilenga navakeza nakulifukula kuli ove.Vosena vaze vazenekelenga kukuvumbika navakalifukula kumahinji ove.Navakakuvulukanga ngwavo nganda yaYehova,Ngwavo Zeyone yayou Wajila waIsalele.+
15 Numba tuhu vakusezele uka wove, chipwe vakuhungile, chakuzeneka mutu wakuhita muli ove,+Oloze ami nangukakulingisa mangana vatu vakalisashile hali ove haya myaka yosenaNakukulingisa ukawahililenga muvisemunwino vyosena.+
16 Naukanwa mavele avaka-mafuchi,+Naukamwa kumavele avamyangana.+Naukatachikiza ngwove ami Yehova, yami Mulwilo wove,Kaha Ou Wangolo waYakova ikiye Muka-kukusokola.+
17 Nangukaneha ulu nakuushishisa muunengu,Nangukaneha palata nakuyishishisa mufwelu,Nangukaneha unengu nakuushishisa muvitondo,Nangukaneha fwelu nakuyishishisa mumalolwa.Nangukatongola kuunda chikapwe kalama kove,Nangukatongola kwoloka chikapwe muka-kukuhana milimo.+
18 Mulifuchi lyove kamweshi kukapwa ulyanyiko,Kaha jingiza jove kaveshi kukajinongesako chipwe kwenyekako.+Jikembwe jove naukajivuluka ngwove Ulwilo,+ kaha vikolo vyove nawa ngwove Kwalisa.
19 Likumbi kalyeshi kukakumunyikila namusanako,Kakweji nawa keshi kukakulowela myejiko.Mwomwo Yehova ikiye mwakapwanga mumunyi wove wahaya myaka yosena,+Kaha Kalunga kove ikiye mwakapwanga upahu wove.+
20 Likumbi lyove kalyeshi kukalaukako,Myeji yakakweji kove kayeshi kukafuvalalako.Mwomwo Yehova ikiye mwakapwanga mumunyi wove wahaya myaka yosena,+Kaha makumbi akulishona chove nawakakuma.+
21 Vatu jove vosena navakapwanga vakwoloka.Navakaswana lifuchi haya myaka yosena.Vanapu mutango uze ngwatumbile,Vanapu milimo yamavoko ami+ mangana vanguwahisenga.+
22 Vavandende navakapwa likombakaji,Kaha vavapululu navakapwa lifuchi lyangolo.Ami Yehova yami nangukachanguhwisa halwola lwacho.”
