Isaya 61:1-11
61 Shipilitu yaMwata Wakulitulaho Yehova yili hali ami,+Mwomwo Yehova anguwavishile mangana nguvilike mujimbu wamwaza kuvatu vavavwovu.+Angutumine ngukase hajimbandu javaze vali nakulyonyinga mumichima,Nguvilike kuli vafunge mujimbu wakuvasokola,Ngutonese meso avaze vali mutumenga,+
2 Ngwambulule mwaka waYehova wakwivwila vatu uselewa,Nalikumbi lyaKalunga ketu+ lyakulinga sambanjinga,Nguvendejeke vosena vaze vali nakulishona,+
3 Ngukafwe vaze vali nakulishona hali Zeyone,Nguvahane vitambala mangana vawahilile mukutela kulishona nakulikwita uto,Nguvahane maji mangana vawahilile mukutela kulishona,Nguvahane uvwalo mangana vangwalisenga nawo mukutela kuhomba.Kaha navakavavulukanga ngwavo mitondo yayinene yakwoloka,Ngwavo vaze vatumba kuli Yehova mangana vamutohwesenga.+
4 Navakatungulula jingundu jakushikulu.Navakatunga cheka vihela vize vyalyenyekele kunyima,+Navakatungulula jinganda jize vanongesele,+Vihela vize vyapwile jingundu kuvisemunwino vyakunyima.+
5 “Vatu veka navakafunganga mautanga enu,Vaka-mafuchi eka+ navakapwanga vaka-kumilimina mande, vaka-kumizachila mumande amivinyo.+
6 Oloze enu navakamivulukanga ngwavo vapilishitu jaYehova.+Navakamivulukanga ngwavo vaka-kuzachila Kalunga ketu.Namukalyanga luheto lwavaka-mafuchi,+Kaha namukalisashilanga haupahu wavo.*
7 Vatu jami nangukavahana vyazano vivali vyakushishisa musonyi yize vanevunga,Navakatwa jingunda havyazano vanavahane muchishishisa chakusauka vanasaukanga.Navakapwa navyazano vivali mulifuchi lyavo.+Navakawahililanga haya myaka yosena.+
8 Mwomwo ami Yehova ngwazanga chiyulo chakwoloka.+Ngwahunga wiji navilinga vyakuhenga.+Ngwapwa nguwakushishika, kaha vatu jami nangukavahana fweto yavo.Nangukalishika navo lushiko lwahaya myaka yosena.+
9 Vana* vavo navakavatachikiza muli vaka-mafuchi,+Vaka-tanga yavo navakavatachikiza muli vatu veka naveka.Kaha vosena vaze navakavamona, navakatachikizaNgwavo vana* kana vavakisula kuli Yehova.”+
10 Nangulisambila muli Yehova.Muchima wami nauwahilila muli Kalunga kami.+Mwomwo nanguvwiki uvwalo waulwilo.+Nangukupilika chikuto* chakwoloka,Kwijiva nge mwenyamwenga uze nalikase lihina kumutwe nge lize lyakapilishitu,+Kwijiva nge mwenga uze navwale vimbilingwa.
11 Mwata Wakulitulaho YehovaMwakalingisa kwoloka+ nakwalisa vikasoloke+ kuli vaka-mafuchi osena,Nge muze mavu eji kulovolanga vyakusokaho,Nge muze navilovoka vyuma vize vanatumbu mulitepa.
Kwinyikila Chamwishi
^ Chipwe “haluheto lwavo.”
^ Hepe., “Mbuto.”
^ Hepe., “mbuto.”
^ Chipwe “ndeleji yakuzeneka mavoko.”
