Isaya 64:1-12
64 Nachiwaha nge naupula melu nakwiza hano hamavu,Mangana jipili jilinyike mwomwo yayove,
2 Nge omu kakahya nakakwata kujitete,Nge omu nakasavisa meya,Kaha lijina lyove kachi vanalitachikiza kuli vaka-kole jove,Vaka-mafuchi nawa kachi vanachikima woma kumeso ove.
3 Omu wejile hano hamavu, walingile vyuma vyakwivwisa woma vize katwapwile nakutalililako,+Kaha jipili jalinyikile kumeso ove.+
4 Kufuma kushikulu, naumwe wauchi evwililaho lyehi, chipwe kutengeleka matwitwi enyi kuli Kalunga wekako, shina kuli ove kaha.Naumwe wauchi amonaho lyehi Kalunga weka, yove kaha vamona.Wapwa uKalunga uze eji kukafwanga vatu vaze veji kumutalililanga.+
5 Uneza kuli vaze veji kulinganga vyuma vyakwoloka namuchima wakuwahilila,+Vaze veji kukwanukanga nakukavangiza jijila jove.Wapihililile mwomwo twalingilenga shili.+Twalingile ngocho hatando yayisuku.Kutala chinatemo kutulwila nyi?
6 Tuvosena tunapu nge mutu uze napihi,Vilinga vyetu vyakwoloka vyosena vinapihi kwijiva nge lihina avwalanga pwevo uze ali kukakweji.+Tuvosena natukazuza nge mafwo,Vilinga vyetu vyakuhenga navikatupekumuna nge peho.
7 Naumwe wauchi ali nakusanyika lijina lyove,Naumwe wauchi ali nakufwila kukukwata nakukulinjilila,Mwomwo unalisweke kuchina natukumona,+Kaha weji kutulingisanga tunonge mwomwo yakuhenga chetu.
8 Ove Yehova, ove unapu uSetu.+Etu tunapu tuunonga, kaha ove unapu uTengi yetu.+Tuvosena tunapu tumilimo yamavoko ove.
9 Ove Yehova,+ kanda naupihilila chikumako,Kanda nawanuka kuhenga chetu haya myaka yosenako.Tala, etu tunapu tuvatu jove.
10 Jinganda jove jajila jinapu jino pambo.Nganda yaZeyone yinapu hipambo,Yelusalema yinapu hingundu.+
11 Zuvo* yetu yajila, yaupahu,Yize vakulemeselele vakakuluka jetuVanayocho nakakahya.+Kaha vyuma vyosena vize twazangilenga vinasale malala.
12 Ove Yehova, uno nautwama lika chakuzeneka kulingako chuma chimwe nyi?Uno nauhola lika kulu nakutwechelela tumone malwa apwaha ngana?+
Kwinyikila Chamwishi
^ Chipwe “Tembele.”
