Isaya 66:1-24
66 Yehova nambe ngwenyi:
“Melu anapu litanda lyami, mavu anapu chitwamo chakulyata mahinji ami.+Nyi namungutungila zuvo yakufwana ngachilihize?+Nyi chihela chami chakunokela chilihize?”+
2 Yehova+ nambe ngwenyi: “Livoko lyami likiko lyazachile vyuma vyosenevi,Omu mukiko vyateselemo vyumevi.Nangutala ou nahombo nakulyonyinga mumuchima,Ou eji kuchikimanga* mazu ami.+
3 Ou mwajiha ngombe napu nge ou mwajiha mutu.+Ou mwalumba mukoko kupwa wana napu nge ou mwahokola shingo yakawa.+Ou mwahana wana napu nge ou mwahana manyinga angulu.+Ou mwahana lavona+ kupwa wana wakwanukilaho napu nge ou mwakisula mutu namazu avaka-visava.*+Vatu kana vanasakula jijila javo vavene,Veji kwivwilanga kuwaha vyuma vyaunyengwe.
4 Ngocho nangukawana jijila jakuvazangamishilamo,+Nangukavanehela vyuma vize veji kwivwanga woma.Omu ngwasanyikile, naumwe wauchi angukumbulwile.Omu ngwahanjikile, naumwe wauchi angwivwililile.+Valingilenga vyuma vyavipi kumeso ami,Valingilenga vyuma vize vyangwivwishilenga kupihya.”+
5 Ivwenu mazu aYehova, enu mweji kuchikimanga* mazu enyi. Nambe ngwenyi:“Vandumbwenu vaze vamihunga nakumikana mwomwo yalijina lyami vanamisekeleka ngwavo, ‘Mutohwesenunga Yehova.’+Oloze Kalunga mwakasoloka, kaha namukawahilila,Vakiko mwakavevwisa sonyi.”+
6 Munganda muli nakwivwakana vyema, mutembele muli nakwivwakana liuya.Linapu liuya lyavatu vaze ali nakuzangamisa Yehova havyuma vyavipi vanalingi.
7 Pwevo umwe asapulukile shimbu kanda misongo yimulendumukile.+Asapulukile mwana walunga shimbu kanda misongo yakusema yimuwane.
8 Iyaze evwaho lyehi chuma kana?Iyaze amonaho lyehi vyuma kana evi?Uno lifuchi linahase kupwako mulikumbi lyangongo nyi?Kutala vaka-lifuchi vanahase kusemuka mulikumbi limwe numba?Oloze Zeyone asemene vana venyi omu evwile misongo yakusema.
9 Yehova nambe ngwenyi: “Kutala ngunahase kusokolola jila mujimo lyapwevo nakuzeneka kumusapulwisa numba?”Kalunga kove nambe ngwenyi: “Kutala ngunahase kusapulwisa pwevo nakujika jila mujimo lyenyi numba?”
10 Enu mwazanga Yelusalema,+ wahililenunga nayo, twenunga nayo jingunda.+Enu muvosena muli nakulishona hayikiko, lisambenunga nayo hamwe,
11 Mwomwo namukamwa kumavele ayo akumivendejeka, kaha namukekuta,Namukanwa mavele ayo nakwivwila kuwaha upahu wayo.
12 Yehova nambe ngwenyi:“Nangukayihana kuunda nge meya amukalwiji,+Nangukayihana upahu wavaka-mafuchi eka nge meya akalwiji uze nafumika.+Vatu jayo navakamwa, kaha navakavaveleka mujikondo,Navakamilelanga hamambuli.
13 NangukamivendejekaNge omu pwevo eji kuvendejekanga mwanenyi.+Nangukamivendejeka mwomwo yaYelusalema.+
14 Namukamona chumechi, kaha michima yenu nayikawahilila,Vifuwa vyenu navikakwata ngolo nge mwila wachimbete.Yehova mwakajimbula ngolo jenyi kuli vangamba jenyi,Oloze mwakahunga vaka-kole jenyi.”+
15 “Mwomwo Yehova mwakeza nge kakahya,+Matemba enyi ajita anapu nge peho yanyamanganda.+Mwakeza namatoto enyi nakuvashishishilamo,Mwakeza nakuvatenukila namilangi yakakahya.+
16 Yehova mwakazangamisa vatu nakakahya,Mwakavazangamisa vatu vosena napoko yamukwale.Kaha vaze mwakajiha Yehova navakavula chikuma.”
17 Yehova nambe ngwenyi: “Vosena vaze vali nakulijilika nakulitomesa mangana vengile mumilemba*+ nakukavangiza uze ali hakachi, vaze vali nakulya nyama yavangulu,+ navyuma vyakwivwisa unyengwe, navatumbi,+ navakavanongesa.
18 Nangukungulula vatu vakumiyachi yosena nakumalimi osena mwomwo ngwatachikiza milimo yavo navishinganyeka vyavo, kaha navakamona upahu wami.”
19 “Nangukahaka chinjikizo muli vakiko, kaha vamwe vaze navakayovoka nangukavatuma kuli vaka-mafuchi vaze vanazeneka kwivwa puho yami chipwe kumona upahu wami. Nangukavatuma kuTalashishe,+ nakuPule, nakuLute,+ kuli vaka-kwasa mata amanana, nakuTuvale, nakuYavane,+ nakumatungu akwakusuku. Kaha navakambulula upahu wami muli vaka-mafuchi.+
20 Navakafumisa vandumbwenu vosena muli vaka-mafuchi+ osena nakuvaneha kupwa wana kuli Yehova. Navakavaneha kupili yami yajila kuYelusalema hatuvalu, nahavimbulu, nahavangamela namumatemba, namumatemba eka akufwika helu. Navakavaneha nge omu vaIsalele navaneha wana wavo vanambachila muvinoma vitoma kuzuvo yaYehova.” Omu mukiko mwanambe Yehova.
21 Yehova nambe ngwenyi: “Hali vakiko nangukambataho vamwe vakapwe vapilishitu navaLevi.”
22 Yehova nambe nawa ngwenyi: “Vana* venu nalijina lyenu navikelilanga+ nge omu nawakelila melu amahya namavu amahya+ awa nangutenga.”
23 “Kufuma hakumweka chakakweji umwe nakuheta hakumweka chakakweji mukwavo, kufuma hasambata yimwe nakuheta hasambata yikwavo,Vatu vosena navakezanga nakulifukula kuli ami.”*+ Omu mukiko mwanambe Yehova.
24 “Kaha navakalovokanga nakutala mijimba yavatu vaze valikangilenga kuli ami.Mavunu vahamijimba yavo kaveshi kukafwako,Kakahya navakocha mijimba yavo kaveshi kukakajimako.+Mijimba yavo nayikevwisanga vatu vosena* unyengwe.”
Kwinyikila Chamwishi
^ Chipwe “ou eji kulizakaminanga.”
^ Chipwe pamo, “ou mwalemesa likombelo.”
^ Chipwe “enu mweji kulizakaminanga.”
^ Kulumbununa, milemba yakulipwila yize vazachishilenga kukulemesa makombelo.
^ Hepe., “Mbuto.”
^ Chipwe “navakezanga nakungulemesa.”
^ Hepe., “vakwechi mijimba vosena.”
