Jisamu 106:1-48
106 Mwalisenunga Ya.*Musakwililenunga Yehova, mwomwo apwa wamwaza.+Zangi yenyi yakwilila kuyatwama haya myaka yosena.+
2 Iyaze nahase kwambulula milimo yaYehova yangolo yosena,Chipwe kuvilika vyuma vyenyi vyakutela kwalisa vyosena?+
3 Vawahilila vaze veji kulinganga mwaya chiyulo,Vaze veji kulinganga mwakwoloka lwola lwosena.+
4 Ove Yehova, ngwanuke omu nawivwila vatu jove uselewa.*+Nguzakame, ngulwile
5 Mangana ngumone kuwaha weji kusolwelanga vatu jove wasakula,+Mangana nguwahilile navaka-lifuchi lyove hamwe,Mangana ngukwalishile* nauswana wove hamwe.
6 Tunalingi shili ngana mwavakakuluka jetu.+Tunahengesa, tunalingi vyuma vyavipi.+
7 Vakakuluka jetu muEjipitu kavatachikijile mwalumbunukilile milimo yove yakukomwesako.Kavanukile zangi yove yakwililako,Valikangile omu vapwile kuKalungalwiji Uchila.+
8 Oloze avalwilile mwomwo yalijina lyenyi,+Mangana ajimbule ngolo jenyi.+
9 Atenukilile Kalungalwiji Uchila, kaha omine chau.Avahichishilemo kwijiva nge vali nakuhita mulikundu.*+
10 Avalwilile kuli vaze vavahungile,+Avapululwile kuli vaka-kole.+
11 Meya afwikile vaka-kole javo.Kakwayovokele* numba umweko.+
12 Ngocho vafwelelele lushiko lwenyi.+Vaputukile kwimba mwaso wakumwalisa.+
13 Oloze nakushimbula chiku, vavulyamine vyuma alingile.+Kavavandaminyine avalweze vyakulingako.
14 Vasolwele muchima waupi wakufwila vyuma mupambo.+Vesekele Kalunga mulikundu.+
15 Avahanyine vyuma vamulombele,Oloze avazangamishile namusongo uze wavahokamishile.+
16 Vevwilile Mose lushiushiu mujimbalaka javo,Vevwilile nawa lushiushiu Alone,+ ou wajila waYehova.+
17 Ngocho mavu asamine nakumina Ndatane,Afwikile vosena vaze vakungulukile naAvilame.+
18 Kakahya kepukile mulizavu lyavo.Mulangi wakakahya wochele vaze vaka-kuhuka.+
19 Vatengele mwanangombe kuHoleve,Valifukwile kulikombelo lyakuzuzulula.+
20 Vatambasanyine upahu wenyiNachifwanyisa changombe wakulya mwila.+
21 Vavulyamine Mulwilo+ wavo Kalunga,Uze alingile vyuma vyakukomwesa muEjipitu,+
22 Uze azachile milimo yakukomwesa mulifuchi lyaHame,+Uze alingile nawa vyuma vyakwivwisa woma haKalungalwiji Uchila.+
23 Ambile kuvanongesa,Oloze Mose, ou asakwile amulembelelele*Mangana atulise utenu wenyi waunene.+
24 Kufumaho, valumbilishile lifuchi lyamwaza.+Kavafwelelele lushiko lwenyiko.+
25 Vatatwokelenga mujimbalaka javo.+Kavevwililile mulizu lyaYehovako.+
26 Ngocho olwele livoko lyenyi nakulishinga,Ngwenyi mwakavalindumwina mupambo,+
27 Mwakalindumwina vaka-tanga yavo muli vaka-mafuchi eka,Mwakavasanjila kumafuchi eka.+
28 Kufumaho, vaputukile kulemesa* Mbale wakuPeyole,+Kaha valilenga vimuna vakuvatula vaze vahanyinenga kuvafu.*
29 Vamusangumwine navilinga vyavo vyavipi,+Ngocho musongo wachihita wejile muli vakiko.+
30 Oloze omu Fwinehase akatukile nakwolola vyuma,Uze musongo wachihita wakumine.+
31 Ngocho vamuvulukile kupwa wakwolokaMuvisemunwino vyosena, haya myaka yosena.+
32 Vasangumwine cheka Kalunga kumeya akuMeliva,*Ngocho vahichikishilemo Mose.+
33 Vamupihishile kumuchima,Ngocho alusukile kuhanjika namivumbo yenyi.+
34 Kavanongesele vatu veka naveka+Nganomu avalwezele Yehovako.+
35 Oloze valikachile navaka-mafuchi eka,+Kaha valondezezele* vilinga vyavo.+
36 Valemeselenga makombelo avo,+Kaha makombelo kana apwile jino himuheto kuli vakiko.+
37 Vahanyinenga vana vavo vamalungaNavava vamapwevo kupwa wana wakuvatwila vandemone.+
38 Vamwangilenga manyinga avatu vakuzeneka mulonga,+Manyinga avana vavo vamalunga navava vamapwevoVaze vahanyinenga kupwa wana wakuvatwila kumakombelo avaKanane.+Ngocho lifuchi lyapihile namanyinga aze vamwangilenga.
39 Vapihile mwomwo yavilinga vyavo vyavipi,Valingile ujila wakushipilitu mwomwo yavilinga vyavo vyavipi.+
40 Ngocho Yehova akwachilile vatu jenyi utenu,Evwilile unyengwe uswana wenyi.
41 Avahanyinenga kuli vaka-mafuchi eka mapapa kakavulu,+Mangana vaze vavahungile vavayule.+
42 Vavayanjishile kuli vaka-kole javo,Vavashinyinyikile.
43 Avapululwile mapapa kakavulu,+Oloze valikangilenga nakuzeneka kumwononoka,+Kaha vavenyishilenga hakuhenga chavo.+
44 Oloze amwenenga luyando lwavo,+Evwilenga kawelele kavo.+
45 Ngocho anukilenga lushiko lwenyi mwomwo yavakiko,Avevwililenga keke mwomwo yazangi yenyi yakwilila yayinene.+
46 Alingishilenga vaze vavakwachile ufunge+Vavevwile keke.
47 Ove Yehova Kalunga ketu, tulwile,+Tukungulule kufuma kumafuchi eka+Mangana twalisenga lijina lyove lyajila,Tulisambenga hakukwalisa.+
48 Yehova Kalunga kaIsalele vamwalisengaHaya myaka yosena.*+Vatu vosena vambenga ngwavo, “Amene!”*Mwalisenunga Ya.*
Kwinyikila Chamwishi
^ Chipwe “Haleluya!” “Ya” hilijina lyaYehova mukavatu.
^ Chipwe “kuwaha.”
^ Chipwe “ngulisashile hali ove.”
^ Chipwe “mupambo.”
^ Chipwe “Kakwasalile.”
^ Hepe., “emanyine kulihanya kumeso enyi.”
^ Chipwe “kulipanjika kuli.”
^ Kulumbununa, vimuna vakuvatula vaze vahanyinenga kuvafu chipwe kutulunga vakuzeneka kuyoya.
^ Ulumbunwiso, “Kulikokojwesa.”
^ Chipwe “valinangwile.”
^ Chipwe “kufuma kumyaka yosena nakutwala kumyaka yosena.”
^ Chipwe “Chipwenga vene ngocho.”
^ Chipwe “Haleluya!” “Ya” hilijina lyaYehova mukavatu.
