Jisamu 119:1-176
-
Kusakwilila Kalunga hamazu enyi amalemu
-
‘Vakweze navatomesa ngachilihi jijila javo?’ (9)
-
“Ngwazanga mazu ove akwanukisa” (24)
-
“Jishimbi jove omu ngwajizanga!” (97)
-
“Ngwanangakana chikuma kuhambakana vaka-kungunangula vosena” (99)
-
“Mazu ove apwa linongo kumahinji ami” (105)
-
‘Mazu ove apwa muchano’ (160)
-
Vaze vazanga jishimbi jaKalunga vatwama mukuunda (165)
-
א [Aleph]
119 Vawahilila vaze vazeneka chuma chakuvahanyina mulonga,*Vaze veji kukavangizanga jishimbi jaYehova.+
2 Vawahilila vaze veji kulamanga mazu enyi akwanukisa,+Vaze veji kumutondatondanga namichima yavo yosena.+
3 Kaveshi kulinga chuma chakuhengako.Veji kutambukanga mujijila jenyi.+
4 Ove unahane lushimbi ngwoveJindongi jove vajilamenga kanawa.+
5 Nachiwaha kachi nge nanguzamanga lika*+Mangana ngulamenga jindongi jove.
6 Kaha kaveshi kungwivwisa sonyiko+Omu nangunyingilila jishimbi jove josena.
7 Nangukwalisanga namuchima wakusungamaOmu nangulinangula mazu ove akuyula akwoloka.
8 Nangulamanga jindongi jove.Kanda naunguseza uka wamiko.
ב [Beth]
9 Mukweze nahase kutomesa ngachilihi jila yenyi?Hakulilama nakulinga mwaya mazu ove.+
10 Ngweji kukusakasakanga namuchima wami wosena.Kanda naungwechelela nguseze jishimbi joveko.+
11 Ngweji kulamanga mazu ove mumuchima wami,+Mangana nguzeneke kulinga shili kuli ove.+
12 Vakwalisenga ove Yehova.Ngunangule jindongi jove.
13 Mivumbo yami yeji kuvilikangaMazu akuyula unahanjika.
14 Ngweji kuwahililanga hamazu ove akwanukisa+Kuhambakana omu veji kuwahililanga vatu havikumba.+
15 Nangushinganyekanga* hajindongi jove,+Nangushishikanga hajijila jove.+
16 Ngwazanga jishimbi jove.Kangweshi kukavulyama mazu oveko.+
ג [Gimel]
17 Ngusolwele likoji ami ngamba yove,Mangana nguyoyenga lika nakulinga mwaya mazu ove.+
18 Ngutonese mangana ngumone kanawaVyuma vyakukomwesa vyatwama mujishimbi jove.
19 Ngunapu ngumwiza mulifuchi.+Kanda naunguswekela jishimbi joveko.
20 Ngweji* kufwilanga chikumaMazu ove akuyula lwola lwosena.
21 Weji kutenukilanga vaka-kazamuzamu,Vatu vakwangula vaze vaseza jishimbi jove.+
22 Ngwande sonyi vanangwivwisanga hakunguhenda nakungusaula,Mwomwo ngweji kulamanga mazu ove akwanukisa.
23 Numba nge vilolo vanangutwame punga nakungufulilila,Ami ngamba yove ngweji kushinganyekanga* hajindongi jove.
24 Ngwazanga mazu ove akwanukisa,+Akiko eji kunguhananga mangana.+
ד [Daleth]
25 Ngweji* kusavalanga mulukungu.+Ngulame kweseka namazu ove.+
26 Ngwakulwezele jijila jami josena, kaha wangukumbulwile.Ngunangule jindongi jove.+
27 Ngulweze mwalumbunukila jindongi jove,Mangana ngushinganyekenga* hamilimo yove yakukomwesa.+
28 Ngunanyingamanga mwomwo yachinyengo.Ngujikijise kweseka namazu ove.
29 Ngufumise kuvilinga vyakutangisa,+Ngwivwile uselewa hakungunangula jishimbi jove.
30 Ngunasakula kupwa navilinga vyakushishika.+Ngwatachikiza ngwami mazu ove akuyula apwa akwoloka.
31 Ngwalinjilila kumazu ove akwanukisa.+Ove Yehova, kanda naungwechelela ngwivwenga sonyiko.*+
32 Nangulinganga mwaya* jishimbi joveMwomwo unanguhane muchima wauvwovu.*
ה [He]
33 Ove Yehova,+ ngulweze jila yajindongi jove,Kaha nanguyikavangizanga palanga nakusongo.+
34 Nguhane kunangakanaMangana ngukavangizenga jishimbi joveNakujilama namuchima wami wosena.
35 Ngutambukise* mujila yajishimbi jove,+Mwomwo ngwayivwila kuwaha.
36 Talisa muchima wami kumazu ove akwanukisa,Keshi kukufwila nganyo yamakuliko.*+
37 Talisa meso ami kweka mangana nguzeneke kutala vyuma vyamokomoko.+Ngutambukise mujila yove mangana nguyoyenga lika.
38 Tesamo lushiko* lwove washikile ngamba yove,Mangana vakwivwenga woma.*
39 Ngufumise sonyi yize yeji kungulingisanga ngwivwenga woma,Mwomwo mazu ove akuyula apwa amwaza.+
40 Tala omu ngwafwila jindongi jove.Ngulame kweseka nakwoloka chove.
ו [Waw]
41 Ove Yehova, ngusolwele zangi yove yakwilila,+Ngulwile nge kutesa nalushiko* lwove,+
42 Kaha nangukumbulula ou ali nakungutomba,Mwomwo ngwafwelela mumazu ove.
43 Kanda naufumisa mazu amuchano osena mukanwa kamiko,Mwomwo ngwafwelela* mumazu ove akuyula.
44 Nangulamanga lika jishimbi joveHaya myaka namyaka.+
45 Nangutambukanga muchihela chakukingiwa,*+Mwomwo ngweji kutondatondanga jindongi jove.
46 Nanguhanjikanga hamazu ove akwanukisa kumeso avamyangana.Kangweshi kwivwa sonyiko.+
47 Ngwasaka jishimbi jove,Ngwajizanga vene.+
48 Nangwolola mavoko ami kuli ove mwomwo ngwazanga jishimbi jove,+Kaha nangushinganyekanga* hajindongi jove.+
ז [Zayin]
49 Anuka mazu* wahanjikile kuli ami ngamba yove,Aze eji kunguhananga lutalililo.*
50 Akiko eji kunguvendejekanga muvihuli vyami,+Mwomwo mazu ove anangulamenga.
51 Vaka-kazamuzamu veji kungutolekanga chikuma,Oloze ami kangweshi kuseza jishimbi joveko.+
52 Ove Yehova, ngweji kwanukanga mazu ove akuyula akushikulu,+Kaha eji kunguvendejekanga.+
53 Nguli nakwenya namatoto mwomwo yavaka-kuhukaVaze vaseza jishimbi jove.+
54 Jindongi jove jinapu myaso yamiKweshokwo nguli nakutwama.*
55 Ove Yehova, ngweji kwanukanga lijina lyove naufuku,+Mangana ngulamenga jishimbi jove.
56 Ngweji kulinganga vyuma kaneviMwomwo ngweji kulamanga jindongi jove.
ח [Heth]
57 Ove Yehova, ove yove chazano chami.+Ngunalishiki kulama mazu ove.+
58 Ngunakulembelela namuchima wami wosena,+Ngwivwile uselewa+ kweseka nalushiko* lwove.
59 Ngunakekesa jijila jami,Mangana ngukavangize cheka mazu ove akwanukisa.+
60 Ngweji kwanguhwisanga, kangweshi kulangisaKulama jishimbi joveko.+
61 Mikole yavaka-kuhuka yeji kungujinganga.Oloze kangweshi kuvulyama jishimbi joveko.+
62 Ngweji kuhindukanga mukachi kaufuku nakukusakwilila+Mwomwo yamazu ove akuyula akwoloka.
63 Ngwapwa ngusepa lyavosena vaze vakwivwa woma,Navaze veji kulamanga jindongi jove.+
64 Ove Yehova, zangi yove yakwilila yazala hamavu hosena.+Ngunangule jindongi jove.
ט [Teth]
65 Ove Yehova, unalingi mwamwaza kuli ami ngamba yove,Nge kutesa namazu ove.
66 Ngunangule mangana amwenemwene nachinyingi,+Mwomwo ngwafwelela mujishimbi jove.
67 Shimbu kanda ngumone vihuli, ngwapyapumukilenga,*Oloze nguli nakulama jino mazu ove.+
68 Ove wapwa uwamwaza,+ milimo yove nawa yapwa yamwaza.Ngunangule jindongi jove.+
69 Vaka-kazamuzamu veji kutanjisanga vyuma vyamakuli hali ami,Oloze ami ngweji kulamanga jindongi jove namuchima wami wosena.
70 Michima yavo yambumbula lyehi,*+Oloze ami ngwazanga jishimbi jove.+
71 Chinawahe omu vanangumwenesa vihuli,+Mangana ngulinangule jindongi jove.
72 Jishimbi unahanjika jinapu jamwaza kuli ami+Kuhambakana makombakaji ajimbongo jaulu napalata.+
י [Yod]
73 Mavoko ove akiko angutengele.Nguhane kunangakana
Mangana ngulinangule jishimbi jove.+
74 Vaze vakwivwa woma veji kuwahililanga hakungumona,Mwomwo ngwafwelela mumazu ove.*+
75 Ove Yehova, ngwatachikiza ngwami mazu ove akuyula apwa akwoloka,+Ngwami unangumwenesa vihuli mwomwo yakushishika chove.+
76 Zangi yove yakwilila+ yinguvendejekengaNge kutesa nalushiko* wangushikile ami ngamba yove.
77 Ngwivwile keke mangana nguyoyenga lika,+Mwomwo ngwazanga jishimbi jove.+
78 Vaka-kazamuzamu vavevwise sonyi,Mwomwo veji kungulinganga mwamupi chakuzeneka mulonga.*Oloze ami nangushinganyekanga* hajindongi jove.+
79 Vaze vakwivwa woma, vaze vatachikiza mazu ove akwanukisaVakinduluke kuli ami.
80 Nangukavangizanga jindongi jove namuchima wakuzeneka katenga,+Mangana vazeneke kungwivwisa sonyi.+
כ [Kaph]
81 Ngwatalilila* ulwilo wove+Mwomwo ngwafwelela mumazu ove.*
82 Meso ami atalilila mazu ove,+Oku nguli nakwamba ngwami: “Mwaka uka naukanguvendejeka?”+
83 Ngunapu nge tuku yize yinominyina muwishi.Oloze kangweshi kuvulyama jindongi joveko.+
84 Makumbi angahi nanguvandaminanga ami ngamba yove?Mwaka uka naukasopesa vaze vali nakunguyanjisa?+
85 Vaka-kazamuzamu, vaze veji kulikanganga kujishimbi joveVeji kungufulilanga mena.
86 Jishimbi jove josena jatamo kujifwelela.Vatu veji kunguyanjisanga chakuzeneka mulonga, ngocho ngukafwe.+
87 Hasalile hahandende kachi vangunongesele hamavu,Oloze ami kangwasezele jindongi joveko.
88 Ngulame mwomwo yazangi yove yakwilila,Mangana ngulamenga mazu ove akwanukisa aze unahanjika.
ל [Lamed]
89 Ove Yehova, mazu ove nawapwangakoHaya myaka yosena mumelu.+
90 Kushishika chove kuchatwama kuvisemunwino vyosena.+Wazamisa mavu mangana azenekenga kuswenya.+
91 Vyuma watenga kuvyatwama palanga nakulelo mwomwo yamazu ove akuyula,Vyosena vyeji kukuzachilanga.
92 Kachi nge kangwazangile jishimbi joveko,Kachi ngwafwa lyehi navihuli.+
93 Kangweshi kukavulyama jindongi joveko,Mwomwo unangulame najindongi kana.+
94 Ami ngwapwa nguwove, ngocho ngulwile,+Mwomwo ngunatondotondo jindongi jove.+
95 Vaka-kuhuka veji kunguvandaminanga vangunongese,Oloze ami ngweji kunyingililanga mazu ove akwanukisa.
96 Ngunamono ngwami vyuma vyakukupuka mwosena vyosena vyatwama noho vyakumina,Oloze jishimbi jove kajatwama noho jakuminako.*
מ [Mem]
97 Jishimbi jove omu ngwajizanga!+Ngweji kujishinganyekanga* lwola lwosena.+
98 Jishimbi jove jeji kungulingisanga ngupwenga namangana kuhambakana vaka-kole jami,+Mwomwo ngwatwama najo haya myaka yosena.
99 Ngwanangakana chikuma kuhambakana vaka-kungunangula vosena,+Mwomwo ngweji kushinganyekanga* hamazu ove akwanukisa.
100 Ngweji kulinganga vyuma mukunangakana kuhambakana vakulwane,Mwomwo ngweji kulamanga jindongi jove.
101 Kangweshi kutambuka mujila yaupiko,+Mangana ngulingenga mwaya mazu ove.
102 Kangweshi kuseza mazu ove akuyulako,Mwomwo unangunangula.
103 Mazu ove omwo ayema mundakwila yami!Ayema kuhambakana uchi mukanwa kami.+
104 Ngweji kulinganga vyuma mukunangakana mwomwo yajindongi jove.+Shikaho ngwahungila jijila jamakuli josena.+
נ [Nun]
105 Mazu ove apwa linongo kumahinji ami,Apwa mumunyi mujila yami.+
106 Ngunalishingi lushingo ngwami nangulamanga mazu ove akuyula akwoloka,Kaha nangulutesamo.
107 Vali nakungumwenesa vihuli chikuma.+Ove Yehova, ngulame kweseka namazu ove.+
108 Ove Yehova, ivwila kuwaha mawana ami akulisakila akukwalisa,*+Ngunangule mazu ove akuyula.+
109 Mwono wami uli muponde lwola lwosena,*Oloze ami kangwavulyamine jishimbi joveko.+
110 Vaka-kuhuka vanangutela muheto,Oloze ami kangwasezele jindongi joveko.+
111 Mazu ove akwanukisa apwa nge luheto* lwami haya myaka yosena,Mwomwo eji kungwivwisanga kuwaha kumuchima.+
112 Ngunalikase* kwononoka jindongi joveLwola lwosena palanga nakusongo.
ס [Samekh]
113 Ngwahunga vatu vamichima yivali,+Oloze ngwazanga jishimbi jove.+
114 Ove yove uswamo wami, yove kepwe yami.+Mwomwo ngwafwelela mumazu ove.*+
115 Enu vaka-kulinga mwamupi, ngusosolokenu,+Mangana ngulamenga jishimbi jaKalunga kami.
116 Ngukafwe kweseka nomu wangushikile*+Mangana nguyoyenga lika.Kanda naungulingisa ngutalilile tuhu chamokomokoko.+
117 Ngukafwe mangana nguyovoke,+Kaha nanguhakanga lika muchima wami kujindongi jove.+
118 Ove weji kukananga vosena vaze veji kusezanga jindongi jove,+Mwomwo vapwa vaka-makuli, vaka-kutangisa.
119 Weji kumbilanga vaka-kuhuka vahamavu vosena kwijiva nge vizozo vyamokomoko.+Shikaho ngwazangila mazu ove akwanukisa.
120 Mujimba* wami weji kundendanga mwomwo yakukwivwa woma.Ngweji kwivwanga woma mazu ove akuyula.
ע [Ayin]
121 Ngunalingi mwaya chiyulo, mwakwoloka.Kanda naungwechelela mumavoko avaze vali nakungushinyinyikako.
122 Ngufwelelese ami ngamba yove ngwove naungukafwa.Vaka-kazamuzamu kanda navanguyanjisako.
123 Meso ami anafuvalala mwomwo yakutalilila ulwilo wove+Nalushiko* lwove lwakwoloka.+
124 Ngusolwele zangi yove yakwilila ami ngamba yove,+Ngunangule jindongi jove.+
125 Ami ngungamba yove. Nguhane kunangakana+Mangana ngutachikize mazu ove akwanukisa.
126 Ove Yehova, lwola lwove lwakuvazangamisa lunahete,+Mwomwo vanahokola jishimbi jove.
127 Shikaho ngwazangila jishimbi joveKuhambakana ulu, ulu wakutomesa kanawa.+
128 Ngocho ngwamona jindongi* jakufuma kuli ove josena kupwa jakwoloka.+Ngwahunga jijila jamakuli josena.+
פ [Pe]
129 Mazu ove akwanukisa apwa amwaza.Shikaho ngweji* kuwalaminanga.
130 Mazu ove walumbununa eji kunehanga kumunyika,+Eji kuhananga kunangakana kumutu wakuzeneka chinyingi.+
131 Ngweji kwasamanga mukanwa nakulishimwoka,*Mwomwo ngwafwila jishimbi jove.+
132 Ngutale ungwivwile uselewa+Mangana ulame mazu ove akuyula kuli vaze vazanga lijina lyove.+
133 Twaminyina kanawa* jitambo jami namazu ove.Vyuma vyavipi kanda navingufungululako.+
134 Ngupululule* kuvatu valuyanjisa,Kaha nangulamanga jindongi jove.
135 Ngwivwile uselewa ami ngamba yove,+Ngunangule jindongi jove.
136 Masoji eji kupwelumukanga kumeso amiMwomwo vatu kaveshi nakulama jishimbi joveko.+
צ [Tsade]
137 Ove Yehova, ove wapwa uwakwoloka,+Mazu ove akuyula nawa asungama.+
138 Mazu akwanukisa weji kuhananga apwa akwoloka,Kaha atamo kuwafwelela.
139 Twima yili nakungulya,+Mwomwo vaka-kole jami vanavulyama mazu ove.
140 Mazu ove apwa akutomesa kanawa,+Ami ngamba yove ngwawazanga.+
141 Ngwapwa nguwamokomoko, nguwakulumbilisa,+Oloze kangwavulyamine jindongi joveko.
142 Kwoloka chove chapwa chahaya myaka yosena,+Jishimbi jove japwa jamuchano.+
143 Numba tuhu ngweji kumonanga luyando naukalu,Oloze ngwazanga lika jishimbi jove.
144 Kwoloka chamazu ove akwanukisa chapwa chahaya myaka yosena.Nguhane kunangakana+ mangana nguyoyenga lika.
ק [Qoph]
145 Ngweji kukusanyikanga namuchima wami wosena. Ove Yehova, ngukumbulule.Nangulamanga jindongi jove.
146 Ngweji kukusanyikanga, ngocho ngulwile.Nangulamanga mazu ove akwanukisa.
147 Ngweji kuhindukanga havandemba* nakutwa kawelele,+Mwomwo mazu ove eji kunguhananga lutalililo.*
148 Ngweji kutonanga mukachi kaufuku,Mangana ngushinganyeke* hamazu ove.+
149 Ivwa lizu lyami mwomwo yazangi yove yakwilila.+Ove Yehova, ngulame kweseka nachiyulo chove.
150 Vaze veji kulinganga vilinga vyakwivwisa sonyi* veji kupandamanga kuli ami.Vatwama hahasuku najishimbi jove.
151 Ove Yehova, ove watwama hakamwihi nayami,+Jishimbi jove josena japwa jamuchano.+
152 Ngwalinangwile kushikulu ngwami, mazu ove akwanukisaWawazamisa mangana apwengangako haya myaka yosena.+
ר [Resh]
153 Tala vihuli vyami, ngupululule,+Mwomwo kangwavulyamine jishimbi joveko.
154 Nguhakwile,* ngupululule.+Ngulame kweseka nalushiko* lwove.
155 Ulwilo watwama hahasuku navaka-kuhuka,Mwomwo kaveshi kutondatonda jindongi joveko.+
156 Ove Yehova, keke yove yapwa yayinene.+Ngulame kweseka nachiyulo chove.
157 Vaka-kunguyanjisa navaka-kole jami vanavulu,+Oloze kangwasezele mazu ove akwanukisako.
158 Ngweji kwivwanga unyengwe omu nangutala vaka-kumbembejeka,Mwomwo kaveshi kulinga mwaya mazu oveko.+
159 Tala omu ngwazanga jindongi jove!Ove Yehova, ngulame mwomwo yazangi yove yakwilila.+
160 Mazu ove osena apwa muchano,+Mazu ove akuyula osena kuwatwama haya myaka yosena.
ש [Sin] chipwe [Shin]
161 Vilolo veji kunguyanjisanga+ chakuzeneka mulonga,Oloze muchima wami weji kwivwanga woma mazu ove.+
162 Ngweji kuwahililanga hamazu ove+Nge mutu uze nawane vyuma vyakupupa vyavivulu.
163 Ngwahunga makuli, ngwawevwila unyengwe.+Ami ngwazanga jishimbi jove.+
164 Ngweji kukwalisanga mapapa 7 halikumbiMwomwo yamazu ove akuyula akwoloka.
165 Vaze vazanga jishimbi jove vatwama mukuunda,+Kakweshi chuma numba chimwe nachivahukanyisako.*
166 Ove Yehova, ngwatalilila vilinga vyove vyaulwilo,Ngweji kulamanga jishimbi jove.
167 Ngweji* kulamanga mazu ove akwanukisa,Kaha ngwawazanga chikuma.+
168 Ngweji kulamanga jindongi jove namazu ove akwanukisa,Mwomwo ove unatachikiza vyuma vyosena ngweji kulinganga.+
ת [Taw]
169 Ove Yehova, kawelele kami kahete kuli ove.+Nguhane mangana kweseka namazu ove.+
170 Kulomba chami nangukulomba ungwivwile uselewa chihete kuli ove.Ngulwile kweseka nalushiko lwove.*
171 Mivumbo yami yikwalisenga chikuma,+Mwomwo weji kungunangulanga jindongi jove.
172 Lilimi lyami limbenga vyamazu ove,+Mwomwo jishimbi jove josena japwa jakwoloka.
173 Livoko lyove lilizange kungukafwa,+Mwomwo ngunasakula kwononoka jindongi jove.+
174 Ove Yehova, ngwatalilila ulwilo wove,Ngwazanga jishimbi jove.+
175 Nguyoyenga lika mangana ngukwalisenga.+Mazu ove akuyula angukafwenga.
176 Nguli nakulumbwangila nge mukoko wakujimbala.+ Ngutondetonde ami ngamba yove,Mwomwo kangwavulyamine jishimbi joveko.+
Kwinyikila Chamwishi
^ Chipwe “vaze vapwa vakulonga.”
^ Hepe., “kachi nge jijila jami najizamanga mbe.”
^ Chipwe “Nangulinangulanga.”
^ Chipwe “Mwono wami weji.”
^ Chipwe “ngweji kulinangulanga.”
^ Chipwe “Mwono wami weji.”
^ Chipwe “ngulinangulenga.”
^ Chipwe “vangwivwise sonyiko.”
^ Hepe., “Nangulahanga mujila.”
^ Chipwe pamo, “Mwomwo weji kulingisanga muchima wami umike.”
^ Chipwe “Ngutwaminyine.”
^ Chipwe “nganyoko.”
^ Chipwe “mazu.”
^ Chipwe pamo, “Lushiko luze washikile vaze vakwivwa woma.”
^ Chipwe “namazu.”
^ Chipwe “ngwatalilila.”
^ Chipwe “muchihela chachinene.”
^ Chipwe “nangulinangulanga.”
^ Chipwe “lushiko.”
^ Chipwe “Aze wangulingishile ngutalilile.”
^ Chipwe “Muzuvo muze ngwazuzumana.”
^ Chipwe “namazu.”
^ Chipwe “ngwalingilenga shili hakulimbenja.”
^ Hepe., “kayeshi kwivwa chuma numba chimweko nge maji.”
^ Chipwe “ngwatalilila mazu ove.”
^ Chipwe “namazu.”
^ Chipwe pamo, “hakunguvangijikila vyuma vyamakuli.”
^ Chipwe “nangulinangulanga.”
^ Chipwe “Mwono wami wafwila chikuma.”
^ Chipwe “ngwatalilila mazu ove.”
^ Hepe., “japwa jajinene.”
^ Chipwe “kulinangulangajo.”
^ Chipwe “kulinangulanga.”
^ Hepe., “mawana akulisakila amukanwa kami.”
^ Chipwe “uli mulivoko lyami lwola lwosena.”
^ Chipwe “uswana.”
^ Hepe., “Ngunatalisa muchima wami.”
^ Chipwe “ngwatalilila mazu ove.”
^ Chipwe “kweseka namazu ove.”
^ Hepe., “Nyama.”
^ Chipwe “Namazu.”
^ Chipwe “jishimbi.”
^ Chipwe “mwono wami weji.”
^ Hepe., “nakutesukila.”
^ Chipwe “Zamisa.”
^ Hepe., “Ngusokole.”
^ Chipwe “muze zwalala.”
^ Chipwe “Mwomwo ngweji kutalililanga mazu ove.”
^ Chipwe “ngulinangule.”
^ Chipwe “vilinga vyaunyengwe.”
^ Chipwe “Sopa mulonga wami.”
^ Chipwe “namazu.”
^ Chipwe “Kuli vakiko kakweshi chimbunji chakuvahukanyisako.”
^ Chipwe “Mwono wami weji.”
^ Chipwe “kweseka namazu ove.”