Jisamu 18:1-50
Kuli mukulwane wavaka-kwimba. Mwaso wangamba yaYehova Ndavichi. Ahanjikile mazu amwaso uno kuli Yehova halikumbi lize Yehova amupululwile mumavoko avaka-kole jenyi vosena namulivoko lyaSaulu. Ambile ngwenyi:+
18 Ove ngolo jami Yehova, ngwakuzanga.+
2 Yehova ikiye lilolwa lyami, ikiye chihela chami chakukola, ikiye Muka-kungupululula.+Kalunga kami ikiye lilolwa lyami,+ muli ikiye mukiko ngweji kuchinyinanga,Ikiye kepwe yami, ikiye lumbinga* lwami lwaulwilo,* ikiye uchinyino wami wakukola.+
3 Nangusanyika Yehova, Ou atamo kumwalisa,Kaha mwangulwila kuli vaka-kole jami.+
4 Mikole yakuneha kufwa yangujingile,+Tuvihu vaze vangukatukilile kwijiva nge mihuji yameya vangwivwishile woma.+
5 Mikole yaFuka* yangujingile,Miheto yakufwa yangukwachile.+
6 Omu ngwapwile muluyando, ngwasanyikile Yehova,Ngwatwilenga kawelele kuli Kalunga kami.Kaha evwile lizu lyami mutembele yenyi muze atwama,+Kawelele kami kahetele mumatwitwi enyi.+
7 Jino mavu aputukile kulinyika nakundenda,+Jipili nawa jandendele,Jalinyikile noku noku mwomwo Kalunga apihililile.+
8 Mumazulu enyi mwafwinjile wishi,Mukanwa kenyi mwafumine kakahya kakunongesa.+Kuli ikiye kwapwile makala akakahya.
9 Azembwile melu omu asulukile hamavu.+Kaha mwishi yavilyachilo vyenyi mwapwile milima wi.+
10 Atwamine hakeluve, kaha ejile oku ali nakutuka,+Ashikumukile washiwashi hamavava akangelo.*+
11 Kaha milima yamufwikile,+Yamufwikile jingulwishi nge chisakila,Nge mavwi avula elava.+
12 Kumunyika chakumeso enyiChanokesele vula yamalolwa namakala akakahya vize vyapulasanyine mumavwi.
13 Yehova aputukile kulilima mumelu,+Ou Wakulitulaho Chikuma ahanjikile+Navula yamalolwa namakala akakahya.
14 Ashile mivwi yenyi nakuvasanda mwamwa.+Avesele miveso yenyi nakuvaluwanganyisa.+
15 Hamashima atulwiji* hasolokele,+Vihela vyamavu vyakekumukile mwomwo yautenu wove, ove Yehova,Mwomwo yakuhwimasana chamumazulu ove.+
16 Angwolovelele haze helu apwile,Angukwachile nakunguzambula mumeya amavulu.+
17 Angupululwile kuli muka-kole wami wangolo,+Angupululwile kuli vaze vanguhungile vaze vapwile nangolo chikuma kuhambakana ami.+
18 Valitalasanyine nayami halikumbi lyaukalu wami,+Oloze Yehova angukafwile.
19 Angumbachile nakungutwala muchihela chakukingiwa,*Angupululwile mwomwo angwivwililile kuwaha.+
20 Yehova eji kungufwetanga kweseka nakwoloka chami,+Eji kungufwetanga nge kutesa namavoko ami akuzeneka mulonga.*+
21 Mwomwo ngunalamenga jijila jaYehova,Kaha kangwahukile nakuseza Kalunga kamiko.
22 Ngweji kukavangizanga jishimbi jenyi josena,Kaha kangweshi kuleununa jindongi jenyiko.
23 Nangupwanga nguwakuzeneka chuma chakunguhanyina mulonga kumeso enyi,+Kaha nangulilama nguzeneke kuvulumuna.+
24 Yehova angufwete kweseka nakwoloka chami,+Kweseka namavoko ami akuzeneka mulonga kumeso enyi.+
25 Kuli mutu wakushishika weji kupwanga uwakushishika,+Kaha kuli mutu wakulonga weji kulinganga mwakulonga.+
26 Kuli mutu utoma weji kulisololanga kupwa utoma,+Oloze kuli muka-kuhenga weji kulisololanga kupwa uwakuvanguluka.+
27 Mwomwo weji kulwilanga vatu vakulinyisa,*+Oloze weji kwinyisanga vaka-kulivwimba.*+
28 Mwomwo ove Yehova yove weji kumunyikanga linongo lyami.Kalunga kami eji kungumunyikilanga mumilima.+
29 Nanguhasa kulitalasana nalizavu lyavaka-kungunyemukila hakungukafwa kuli yove.+Nanguhasa kunyina hakembwe mungolo jove.+
30 Jila yaKalunga wamuchano yapwa yakukupuka,+Mazu aYehova apwa atoma.+Kalunga apwa kepwe kuli vosena vaze navachinyina muli ikiye.+
31 Kutala kuli Kalunga weka wakuhambakana Yehova numba?+Iyaze napu lilolwa kuhambakana Kalunga ketu?+
32 Kalunga wamuchano ikiye eji kunguhananga ngolo,+Kaha mwawahisa kanawa jila yami.+
33 Eji kulingisanga mahinji ami alahe nge aze akapaji,Eji kungwimikanga havihela vyakulunduka.+
34 Eji kunangulanga mavoko ami mwakwashila jita,Kaha mavoko ami anahase kulema uta wamanana waunengu.
35 Weji kunguhananga kepwe yove yaulwilo,+Livoko lyove lyachilyo lyeji kungujikijisanga,Kaha kulinyisa chove cheji kungunehelanga ulemu.+
36 Weji kutohwesanga jila yakutambukamo mahinji ami,Mahinji* ami kaweshi kusenunukako.+
37 Nanguhangasana vaka-kole jami nakuvakwata,Kangweshi kukindulukako kuvanga vananongo.
38 Nanguvachika mangana vahone kukatuka cheka,+Nanguvalyatangila namahinji ami.
39 Naunguhana ngolo jakwasa jita,Naulimbwila vaka-kole jami kumahinji ami.+
40 Naulingisa vaka-kole jami vakinduluke nakuchina,*Kaha vaze vanguhunga nanguvanongesa.*+
41 Veji kutwanga tuwelele, oloze naumwe wauchi eji kuvalwilanga,Veji kutetanga miteto kuli Yehova, oloze keshi kuvakumbululako.
42 Nanguvatwa vapwenga nge lukungu luli mupeho,Nanguvamwanga nge ulova wamujijila.
43 Naungupululula kuvatu vaze vasaka kunguwanyina tutenga,+Naungutongola kupwa twamina wavaka-mafuchi.+Vatu vaze kangwatachikizako navanguzachilanga.+
44 Navangwononoka hakungwivwa kaha.Vaka-mafuchi eka naveza kuli ami nachiwomawoma.+
45 Vaka-mafuchi eka navalizuzukila nawoma,*Naveza nakulichikimina kufuma kuvihela vyavo vyakukola.
46 Yehova ayoya. Vamwalisenga Lilolwa lyami,+Vamutohwesenga Kalunga muka-kungulwila.+
47 Kalunga wamuchano eji kungulingilangako sambanjinga,+Eji kulingisanga vatu veka naveka valiluule kuli ami.
48 Eji kungupulululanga kuli vaka-kole jami vaukenya,Ove Kalunga, weji kunguzezulanga helu lyavaze veji kungufumbukilanga,+Weji kungulwilanga kumutu waulyanyi.
49 Shikaho nangukwalisanga ove Yehova muli vaka-mafuchi,+Nangwimbanga myaso yakwalisa lijina lyove.+
50 Eji kulingilanga mwangana wenyi vilinga vyavinene vyaulwilo,*+Eji kusololanga zangi yakwilila kuli ou wenyi awavisa,+Kuli Ndavichi navaka-tanga* yenyi haya myaka yosena.+
Kwinyikila Chamwishi
^ Tala Mukana waMazu.
^ Chipwe “ikiye mulwilo wami wangolo.”
^ Chipwe “yaSheyole,” kulumbununa fuka yavatu vosena. Tala Mukana waMazu.
^ Hepe., “hamavava ashipilitu.”
^ Chipwe “atupila vameya.”
^ Chipwe “muchihela chachinene.”
^ Hepe., “namavoko ami atoma.”
^ Chipwe “vakuyanda.”
^ Hepe., “kwinyisanga meso akulipambula.”
^ Chipwe “Tusendengele.”
^ Chipwe “vangutalise jinyima.”
^ Hepe., “nanguvaholesa kulu.”
^ Chipwe “navapiluka.”
^ Chipwe “Eji kufungulwilanga mwangana wenyi.”
^ Hepe., “nambuto.”
